ଅକ୍ଲାଣ୍ଡ,୫।୨- ଭାରତୀୟ ମହିଳା ହକି ଦଳ ବିଜୟ ସହ ନ୍ୟୁଜିଲାଣ୍ଡ ଗସ୍ତ ଶେଷ କରିଛି। ଦଳ ତା’ର ଅନ୍ତିମ ମ୍ୟାଚ୍ରେ ନ୍ୟୁଜିଲାଣ୍ଡକୁ ୩-୦ ଗୋଲରେ ହରାଇ ଦେଇଛି। ବିଜୟୀ ଦଳ ପାଇଁ ନବନିତ କୌର ଡବଲ ଗୋଲ ଦେଇଥିବାବେଳେ ଶର୍ମିଲା ଗୋଟିଏ ଗୋଲ ସ୍କୋର କରିଥିଲେ।
ମ୍ୟାଚ୍ର ପ୍ରଥମାର୍ଦ୍ଧ ଗୋଲ ଶୂନ୍ୟ ରହିଥିଲା। ତୃତୀୟ କ୍ୱାର୍ଟରର ୪୫ତମ ମିନିଟ୍ରେ ନବନିତ ପ୍ରଥମ ଗୋଲ କରିଥିଲେ। ଏହାର ୯ ମିନିଟ୍ ପରେ ଭାରତୀୟ ଦଳର ଅଗ୍ରଣୀ ବ୍ୟବଧାନକୁ ଦୁଇଗୁଣିତ କରିଥିଲେ ଶର୍ମିଲା (୫୪ତମ)। ୫୬ ମିନିଟ୍ରେ ନବନିତ ବ୍ୟକ୍ତିଗତ ଦ୍ୱିତୀୟ ଓ ଭାରତ ପାଇଁ ତୃତୀୟ ଗୋଲ ସ୍କୋର କରିଥିଲେ। ଭାରତୀୟ ଦଳ ଟୁରର ପ୍ରଥମ ମ୍ୟାଚ୍ରେ ୪-୦ ଗୋଲରେ ନ୍ୟୁଜିଲାଣ୍ଡ ଡେଭଲପମେଣ୍ଟ ଦଳକୁ ହରାଇଥିଲା। ଦ୍ୱିତୀୟ ଓ ତୃତୀୟ ମ୍ୟାଚ୍ରେ ଭାରତ ୧-୨ ଓ ୦-୧ ଗୋଲରେ ପରାସ୍ତ ହୋଇଥିଲା। ଅଧିନାୟିକା ରାଣୀ ରାମ୍ପାଲଙ୍କ ଗୋଲ ବଳରେ ଭାରତ ଚତୁର୍ଥ ମ୍ୟାଚ୍ ଜିତିନେଇଥିଲା। ନ୍ୟୁଜିଲାଣ୍ଡ ବିପକ୍ଷ ଅନ୍ତିମ ମ୍ୟାଚ୍ରେ ଆମେ ୩ ଗୋଲ ସ୍କୋର କରିଥିବାରୁ ଆମେ ବହୁତ ଖୁସୀ। ଏହି ଟୁରରୁ ଆମେ ଜାଣି ପାରିଛୁ, କେଉଁ ବିଭାଗରେ ଆମକୁ ଉନ୍ନତି ଦରକାର। ଦଳ ଶୀଘ୍ର ଗୋଲ ସ୍କୋରିଂ ସୁଯୋଗ ସୃଷ୍ଟି କରିପାରୁଛୁ ବୋଲି ଭାରତୀୟ ମହିଳା ଦଳର ମୁଖ୍ୟ କୋଚ୍ ଜୋର୍ଡ ମାରିଜନେ କହିଛନ୍ତି। ଆସନ୍ତା ୭ ତାରିଖରେ ଭାରତୀୟ ଦଳ ଘରକୁ ଗସ୍ତ କରିବ।
