ଚଣ୍ଡିଗଡ଼,୫।୬: ଟିକ୍ଟକ୍ ଷ୍ଟାର ତଥା ଭାଜପା ନେତ୍ରୀ ସୋନାଲି ଫୋଗାଟ ପ୍ରାୟ ସମୟରେ ଚର୍ଚ୍ଚାରେ ରହିଥାନ୍ତି। ଚଳିତ ଥର ମଧ୍ୟ ସେ ଏଭଳି ଏକ କାମ କରିଛନ୍ତି ଯାହା ତାଙ୍କୁ ଚର୍ଚ୍ଚାର ପରିସରକୁ ଟାଣିଆଣିଛି। ହରିୟାଣା ହିସାରର ଆଦମପୁର ବିଧାନସଭା ମଣ୍ଡଳୀର ବିଧାୟିକା ସୋନାଲି ଫୋଗାଟ ହରିୟାଣା କୃଷକ ବଜାର କମିଟିର ଜଣେ ଅଧିକାରୀଙ୍କୁ ଶୁକ୍ରବାର ଚପଲରେ ପିଟିଛନ୍ତି। ଯାହାର ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ସୂଚାଯୋଗ୍ୟ, ହିସାରରେ ଥିବା କୃଷକ ବଜାରକୁ ସୋନାଲି ଯାଞ୍ଚ କରିବାକୁ ପହଞ୍ଚିଥିଲେ। ସେଠାରେ ବଜାର କମିଟିର ସେକ୍ରେଟାରୀ ସୁଲତାନ ସିଂହଙ୍କ ସହ କୌଣସି ଏକ କଥାକୁ ନେଇ ତାଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା। ଏହି ବିବାଦ ଏତେ ବଢ଼ିଯାଇଥିଲା ଯେ, ଶେଷରେ ସୋନାଲି ସମସ୍ତଙ୍କ ସାମ୍ନାରେ ସୁଲତାନଙ୍କୁ ଚାପୁଡ଼ା ମାରିବା ସହ ଚପଲରେ ପିଟିଥିଲେ। ଏହାର ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଅପରପକ୍ଷେ ଏହାକୁ ନେଇ ଏବେ ରାଜନୀତି ସରଗରମ ଦେଖାଦେଇଛି। ବିରୋଧୀ ଦଳର ନେତାମାନେ ରାଜ୍ୟର ମୁଖ୍ୟମନ୍ତ୍ରୀଙ୍କୁ ଟାର୍ଗେଟ କରିବା ସହ ସୋନାଲିଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି।
