ବରଗଡ଼ ଅଫିସ୍,୮।୫: ବରଗଡ଼ ଜିଲାରେ ଶୁକ୍ରବାରଠାରୁ ରବିଋତୁ ଧାନ କିଣାବିକା ପ୍ରକ୍ରିୟା ଆରମ୍ଭ ହୋଇଛି। ପ୍ରଥମ ଦିବସରେ ବରଗଡ଼ ଓ ଅତାବିରା ନିୟନ୍ତ୍ରିତ ବଜାର କମିଟି (ଆରଏମସି) ଅଧୀନ ମଣ୍ଡି ଗୁଡ଼ିକରେ ସମୁଦାୟ ୯୨୭୬ ପ୍ୟାକେଟ୍ ଧାନ ସଂଗୃହୀତ ହୋଇଛି। ସେଥିମଧ୍ୟରୁ ୧୯୮୯ ପ୍ୟାକେଟ୍ ଧାନ ବିକ୍ରି ହେବା ପରେ ମିଲର୍ସମାନେ ତାକୁ ଉଠାଇଛନ୍ତି । ଅନ୍ୟପଟେ ଆହୁରି ୭୨୮୭ ପ୍ୟାକେଟ୍ ଧାନ ମଣ୍ଡିରେ ପଡ଼ି ରହିଛି। ଧାନ ଅମଳ ଜୋର୍ ଧରିଥିବାରୁ ଆଗକୁ ମଣ୍ଡିରେ ସଂଗୃହୀତ ଧାନ ପରିମାଣ ଯଥେଷ୍ଟ ବୃଦ୍ଧି ପାଇବ । ଫଳରେ ଧାନ ଉଠାଣ ଦିଗରେ ତତ୍ପରତା ପ୍ରକାଶ କରିବାର ଆବଶ୍ୟକତା ରହିଛି ବୋଲି ଚାଷୀମାନେ କହିଛନ୍ତି। ନଚେତ କାଳବୈଶାଖୀ ଝଡ଼ବର୍ଷାରେ ଚାଷୀଙ୍କ ଅମଳ ଧାନ କ୍ଷତିଗ୍ରସ୍ତ ହେବାର ଯଥେଷ୍ଟ ସମ୍ଭାବନା ରହିଛି ।
ବରଗଡ଼ ଆରଏମସି ଅଧୀନ କଲାପାଣି ମଣ୍ଡିକୁ ବରାହଗୋଡ଼ା ଗ୍ରାମର ଚାଷୀ ଦିଲୀପ ଭୋଇ ୨୨୬ ପକେଟ୍ ଧାନ ଆଣିଥିଲେ । ସେଠାରେ ସମବାୟ ଉପନିବନ୍ଧକ (ଡିଆରସିଏସ) ଭକ୍ତବନ୍ଧୁ ସାହୁ, ଜିଲା ଯୋଗାଣ ଅଧିକାରୀ (ସିଏସ୍ଓ) ଦୁର୍ଗାଚରଣ ଭେସ୍ରା, ସହକାରୀ ସମବାୟ ନିବନ୍ଧକ (ଏଆର୍ସିଏସ୍) ଗଜେନ୍ଦ୍ର ପଣ୍ଡା, ଆରଏମ୍ସି ସମ୍ପାଦକ ଦୁର୍ଗାପ୍ରସାଦ ଛୁରିଆ ପ୍ରମୁଖ ଉପସ୍ଥିତ ରହି ଧାନ କିଣାବିକାର ଶୁଭାରମ୍ଭ କରିଥିଲେ । ଧାନ କ୍ରୟ ହେବା ପରେ ସ୍ଥାନୀୟ ସିଦ୍ଧେଶ୍ୱର ରାଇସ୍ ମିଲ୍କୁ ସେହି ଧାନ ଯାଇଥିଲା । ସେହିପରି ଅତାବିରା ଆରଏମସି ଅଧୀନ ବିଭିନ୍ନ ମଣ୍ଡିକୁ ୯୦୫୦ ପ୍ୟାକେଟ୍ ଧାନ ଆସିଥିଲା । ସେଥିରୁ ୧୭୬୩ ପ୍ୟାକେଟ୍ ଧାନ ବିକ୍ରି ପରେ ମିଲ୍କୁ ଯାଇଥିବା ଅତାବିରା ଆରଏମସି ସମ୍ପାଦକ ବିଶ୍ୱଜିତ ବାରିକ ସୂଚନା ଦେଇଛନ୍ତି ।
ଉଲ୍ଲେଖଯୋଗ୍ୟ, ଧାନ କିଣାବିକା ପାଇଁ ସମୁଦାୟ ୧୩୭ଟି ମଣ୍ଡି ଖୋଲାଯିବା ବ୍ୟବସ୍ଥା ରହିଛି । ସେଥିରୁ ୧୨୪ଟି ମଣ୍ଡିରେ ପ୍ରାଥମିକ କୃଷି ସମବାୟ ସମିତି (ପ୍ୟାକ୍ସ) ଏବଂ ଅନ୍ୟ ୧୩ଟିରେ ମହିଳା ସ୍ବୟଂ ସହାୟିକା ଗୋଷ୍ଠୀ ଧାନକ୍ରୟ କରିବାର ବ୍ୟବସ୍ଥା କରାଯାଇଛି । ଧାନ କିଣାବିକାରେ ଏଥର ଜିଲାର ୧୧୪ଟି ରାଇସ୍ ମିଲକୁ ସାମିଲ୍ କରାଯାଇଛି । ତେବେ କରୋନା ଭୂତାଣୁ ସଂକ୍ରମଣକୁ ପ୍ରତିହତ କରିବା ପାଇଁ ଏଥର ମଣ୍ଡିରେ ମଧ୍ୟ ସାମାଜିକ ଦୂରତ୍ୱ ଅବଲମ୍ବନକୁ ଗୁରୁତ୍ୱ ଦିଆଯାଇଛି । ଏକର ପ୍ରତି ୨୬ କୁଇଣ୍ଟାଲ ହାରରେ ପ୍ରତି ମଣ୍ଡିକୁ ଦିନକୁ କେବଳ ୩୦ଜଣ ଚାଷୀ ସାମାଜିକ ଦୂରତା ରଖି ଧାନ ବିକ୍ରି ପାଇଁ ଆସିପାରିବେ ବୋଲି କଟକଣା କରାଯାଇଛି ।
