ପାରଳାଖେମୁଣ୍ଡି, ୧୭।୪ (ସ୍ବ.ପ୍ର.): ଗଜପତି ଜିଲା ଏକ ଜଙ୍ଗଲ ପରିବେଷ୍ଟିତ ଅଞ୍ଚଳ ହୋଇଥିଲେ ମଧ୍ୟ ଏଠାରେ ଗ୍ରୀଷ୍ମତାତି ଦିନକୁ ଦିନ ବଢ଼ୁଛି। ଗ୍ରାମାଞ୍ଚଳ ଏବଂ ସହରଞ୍ଚଳରେ କଂକ୍ରିଟ ରୋଡମାନ ବୃଦ୍ଧି ପାଉଥିବାରୁ ଏହା ତାପମାତ୍ରା ବୃଦ୍ଧିର ପ୍ରମୁଖ ଏକ କାରଣ ବୋଲି କୁହାଯାଉଛି। ଗତ ୨୦୧୮ ଅକ୍ଟୋବର ୧୦ରେ ହୋଇଥିବା ତିତ୍ଲି ବାତ୍ୟାରେ ଜିଲାର ବିଭିନ୍ନ ସ୍ଥାନରେ ବହୁ ପୁରାତନ ବୃକ୍ଷମାନ ଉପୁଡି ଯିବା କାରଣରୁ ଏହା ଚଳିତବର୍ଷ ଉଷ୍ମତାକୁ ଅଧିକ ପ୍ରଭାବିତ କରିଛି। ଫଳରେ ଜିଲା ସଦର ମହକୁମା ପାରଳାଖେମୁଣ୍ଡି ସହର ଏକ ଉତ୍ତପ୍ତ ସହର ପାଲଟିଛି। ଦିନ ୧୧ଟା ପରେ ଘରୁ ବାହାରିବା କଷ୍ଟକର ହୋଇପଡୁଛି। କୌଣସି ସ୍ଥାନରେ ବୃକ୍ଷରାଜି ଦେଖିବାକୁ ମିଳୁନି। ଗ୍ରୀଷ୍ମପ୍ରବାହ ସନ୍ଧ୍ୟା ୫ଘଣ୍ଟା ପର୍ଯ୍ୟନ୍ତ ଜନସାଧାରଣଙ୍କୁ ପ୍ରଭାବିତ କରି ରଖୁଛି। ଦିନ ୧୧ଟାରୁ ଅପରାହ୍ନ ୩ଟା ପର୍ଯ୍ୟନ୍ତ ସହରର ସମସ୍ତ ମୁଖ୍ୟ ରାସ୍ତାଗୁଡିକ ଜନଶୂନ୍ୟ ହୋଇପଡୁଛି। କାଭଁ। ଜରୁରୀକାଳୀନ କାର୍ଯ୍ୟ ପାଇଁ ଲୋକେ ଘରୁ ପଦାକୁ ବାହାରୁଛନ୍ତି। ପୌର ପରିଷଦ ଭାଙ୍ଗିବା ପରେ ପ୍ରଶାସନ ହାତରେ ଏବେ ପୌର ପରିଷଦ ପରିଚାଳନା ଦାୟିତ୍ୱ ରହିଥିଲେ ମଧ୍ୟ ଗ୍ରୀଷ୍ମତାପର ମୁକାବିଲା ପାଇଁ ଉଚିତ୍ ପଦକ୍ଷେପ ନିଆଯାଇନାହିଁ। କେବଳ ନାମକୁମାତ୍ର କେତେକ ସ୍ଥାନରେ ଜଳଛତ୍ର ଖୋଲି ଦାୟିତ୍ୱ ସାରିଛି। ତେବେ ରାଜ୍ୟର ସମସ୍ତ ଜିଲା ସଦର ମହକୁମାର ତାପମାତ୍ରା ସୂଚନାଙ୍କ ପ୍ରଦାନ କରାଯାଉଥିବାବେଳେ ଏଠାରେ ଜିଲା ପ୍ରଶାସନ ପକ୍ଷରୁ କିମ୍ବା ଜିଲା ପାଣିପାଗ ପକ୍ଷରୁ ପର୍ଯ୍ୟାୟକ୍ରମେ ସୂଚନା ପ୍ରଦାନ ବ୍ୟବସ୍ଥା ନାହିଁ ।
