ବନ୍ତଳା,୩୧।୭(ଡି.ଏନ.ଏ.)-ଅନୁଗୋଳ ଜିଲା ବନ୍ତଳା ଥାନା ଅଞ୍ଚଳରେ ଚୋରି ଘଟଣା ବୃଦ୍ଧି ପାଉଛି। ପୋଲିସ ଗ୍ରାମାଞ୍ଚଳବାସଙ୍କ ଧନଜୀବନ ରକ୍ଷା ଉପରେ ଗୁରୁତ୍ୱ ଦେଉ ନ ଥିବାରୁ ଗଁା ଲୋକେ ଏଣିକି ନିଜେ ରାତି ଉଜାଗର ହୋଇ ସାହି ଜଗିବାକୁ ବିଭିନ୍ନ ସ୍ଥାନରେ ବୈଠକ କରି ନଷ୍ପତ୍ତି ନେଉଥିବା ଜଣାପଡ଼ିଛି। ପୋକତୁଙ୍ଗା ରଣେଶ୍ୱର ଛକ ସାହିରେ ମଙ୍ଗଳବାର ଏ ନେଇ ଏକ ସାଧାରଣ ବୈଠକ ବସିଥିଲା। ସାହି ସଭାପତି ପ୍ରଫୁଲ୍ଲ ଦେହୁରୀ, ସମ୍ପାଦକ ପ୍ରସନ୍ନ ପ୍ରଧାନଙ୍କ ନେତୃତ୍ୱରେ ଏହି ବୈଠକ ଅନୁଷ୍ଠିତ ହୋଇଥିଲା। ଏକ ସପ୍ତାହ ମଧ୍ୟରେ ସାହିର ଚତୁଃପାର୍ଶ୍ୱରେ ଚୋରି ବୃଦ୍ଧି ପାଉଥିବାରୁ ସାହିବାସିନ୍ଦାଙ୍କୁ ସୁରକ୍ଷା ଦେବା ପାଇଁ ଗଁା ଲୋକେ ରାତ୍ର ସମୟରେ ଠେଙ୍ଗା ପାଳି କରିବେ। ରାତି ୧୦ଟାରୁ ଭୋର ୪ ଟା ପର୍ଯ୍ୟନ୍ତ ପ୍ରତିଦିନ ୪ ଜଣ ଲେଖାଏ ଠେଙ୍ଗା ଧରି ସୁରକ୍ଷା ଦେବା ସହିତ ହ୍ବୁସିଲ ବଜାଇବା ପାଇଁ ବୈଠକରେ ନିଷ୍ପତ୍ତି ହୋଇଥିଲା। ଏଥିସହିତ ବିଭିନ୍ନ ସମସ୍ୟା ବିଷୟରେ ଆଲୋଚନା କରାଯାଇ ସମାଧାନ କରିବା ସହିତ ଠେଙ୍ଗା ପାଳି ବିଷୟରେ ସ୍ଥାନୀୟ ପୋଲିସକୁ ମଧ୍ୟ ଜଣାଇବା ପାଇଁ ନିଷ୍ପତ୍ତି ନିଆଯାଇଥିଲା। ବୈଠକରେ ଜଗବନ୍ଧୁ ଦେହୁରୀ, ରଞ୍ଜିତ ପ୍ରଧାନ, ବସନ୍ତ ସାହୁ, ଗୁହାଳୁ ଦେହୁରୀ, ସୁରେଶ ପ୍ରଧାନ, ବାପୁନ ଦେହୁରୀ, ପ୍ରଶାନ୍ତ ପ୍ରଧାନ, ସରୋଜ ପ୍ରଧାନ, ନଗେଶ ଦେହୁରୀ, ଲମ୍ବୋଦର ଦେହୁରୀ, ବତିଷ୍ଠ ପ୍ରଧାନଙ୍କ ସମେତ ୧୦୦ ପରିବାରର ସମସ୍ତ ସଦସ୍ୟ ଯୋଗ ଦେଇଥିଲେ।
