ବଡ଼ଖଣ୍ଡାଏତା ଷ୍ଟେଶନରେ ରେଳରୋକୋ
10:40 amMarch 4, 2020 / 43

କଟକ ସଦର,୪ା୩(ଡି.ଏନ୍‌.ଏ.): ବିଳମ୍ବରେ ଯାତ୍ରୀବାହୀ ଟ୍ରେନ ଚଳାଚଳ କରିବା ପ୍ରତିବାଦରେ କଟକ-ପାରାଦୀପ ରେଳପଥର ବଡ଼ଖଣ୍ଡାଏତା ଷ୍ଟେଶନରେ ମଙ୍ଗଳବାର ସକାଳେ ଯାତ୍ରୀମାନେ ୨ଘଣ୍ଟା ରେଳରୋକୋ କରିଥିଲେ। ସୂଚନା ଅନୁଯାୟୀ, ପାରାଦୀପ-ଭଦ୍ରକ ଟ୍ରେନ୍‌ ବିଳମ୍ବରେ ବଡ଼ଖଣ୍ଡଏତା ଷ୍ଟେଶନରେ ପହଞ୍ଚିଥିଲା। ଠିକ୍‌ ସେହି ସମୟରେ କଟକ ପଟୁ ପୁରୀ-ପାରଦୀପ ଟ୍ରେନ ମଧ୍ୟ ସେଠାରେ ପହଞ୍ଚିଥିଲା। ଏହା ପରେ କେତେଜଣ ଯାତ୍ରୀ ରେଳରୋକୋ କରିଥିଲେ। ପ୍ରତ୍ୟେକଦିନ ପାରାଦୀପ ପଟୁ ପାରାଦୀପ-ଭଦ୍ରକ ପାସେଞ୍ଜର ଟ୍ରେନ୍‌ ବିଳମ୍ବରେ ଛାଡୁଛି। ଫଳରେ କଟକ ଷ୍ଟେଶନରେ ଉକ୍ତ ଟ୍ରେନ୍‌ ବିଳମ୍ବରେ ପହଞ୍ଚିବା ଦ୍ୱାରା ଭୁବନେଶ୍ୱର ଯିବା ପାଇଁ ଯାତ୍ରୀମାନେ କୌଣସି ଟ୍ରେନ୍‌ ପାଇପାରନ୍ତି ନାହିଁ। ଏହି ସମସ୍ୟା ପ୍ରାୟ ୧ବର୍ଷ ଧରି ଲାଗିରହିଥିଲେ ମଧ୍ୟ ରେଲ୍‌ଓ୍ବେ କର୍ତ୍ତୃପକ୍ଷ କୌଣସି ପଦକ୍ଷେପ ନେଉନାହାନ୍ତି ବୋଲି ଅନେକ ଯାତ୍ରୀ କହିଛନ୍ତି। ମାଲଗାଡିକୁ ସକାଳ ଓ ସନ୍ଧ୍ୟାରେ ଅଗ୍ରାଧିକାର ଦିଆଯାଉଥିବାରୁ ଯାତ୍ରୀବାହୀ ଟ୍ରେନ ଠିକ୍‌ ସମୟରେ ପହଞ୍ଚି ପାରୁନାହାନ୍ତି। ଗତ ଫେବୃୟାରୀ ୧୮ରେ ମଧ୍ୟ ଏହି ଷ୍ଟେଶନରେ ଏକା ସମସ୍ୟାକୁ ନେଇ ରୋଳରୋକୋ କରାଯାଇଥିଲା। ପୂର୍ବାହ୍ନ ପ୍ରାୟ ୧୧ଟାରେ ଆନ୍ଦୋଳନ ପ୍ରତ୍ୟାହୃତ ହେବା ପରେ ଦୁଇ ଯାତ୍ରୀବାହୀ ଟ୍ରେନ୍‌ ଗନ୍ତବ୍ୟସ୍ଥଳକୁ ଯାତ୍ରା କରିଥିଲା।