ଭୁବନେଶ୍ୱର, ୪ା୧(ବ୍ୟୁରୋ): ଇନ୍ଫୋସିଟି ଥାନା ଅନ୍ତର୍ଗତ ପଟିଆ ଛକସ୍ଥିତ ଏକ ଘରୋଇ ହଷ୍ଟେଲରେ ଜଣେ ଛାତ୍ରୀଙ୍କ ଆତ୍ମହତ୍ୟା ଘଟଣା ଭିନ୍ନ ମୋଡ ନେଇଛି। ପରିବାର ଲୋକେ ସମ୍ପୃକ୍ତ ଘରୋଇ ଇଞ୍ଜିନିୟରିଂ କଲେଜ କର୍ତ୍ତୃପକ୍ଷଙ୍କ ଦାୟିତ୍ୱହୀନତାକୁ ଅଙ୍ଗୁଳି ନିର୍ଦ୍ଦେଶ କରିଛନ୍ତି। ପଶ୍ଚିମବଙ୍ଗର ଝୁମ୍ପା ଦେବନାଥ(୨୭) ନାମକ ଛାତ୍ରୀ ଉକ୍ତ ଘରୋଇ ହଷ୍ଟେଲରେ ରହୁଥିଲେ। ତାଙ୍କ ସାଙ୍ଗ ନବବର୍ଷ ପାଇଁ ଘରକୁ ଯାଇଥିବାବେଳେ ଝୁମ୍ପା ବେକରେ ଓଢଣି ଲଗାଇ ଫ୍ୟାନରେ ଆତ୍ମହତ୍ୟା କରିଥିଲେ। ଏ ନେଇ ପୋଲିସ ଏକ ଅପମୃତ୍ୟୁ ମାମଲା (ନଂ. ୨/୨୦୨୦) ରୁଜୁ କରି ଘଟଣାର ତଦନ୍ତ କରୁଥିବା ବେଳେ ମୃତଦେହ ବ୍ୟବଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଛି।
ସୂଚନା ମୁତାବକ, ଝୁମ୍ପାଙ୍କ ପରିବାର ଲୋକେ ଶୁକ୍ରବାର ପଶ୍ଚିମବଙ୍ଗରୁ ଆସି ଭୁବନେଶ୍ୱରରେ ପହଞ୍ଚିଥିଲେ। ପ୍ରେମିକଙ୍କ ସହ ଝଗଡ଼ାକୁ ନେଇ ଝୁମ୍ପା ଆତ୍ମହତ୍ୟା କରିଥିବା ନେଇ ସନ୍ଦେହ ପ୍ରକାଶ ପାଇଥିବା ବେଳେ ପରିବାର ଲୋକେ ଭିନ୍ନ ଅଭିଯୋଗ ଆଣିଛନ୍ତି। ପରିବାର ଲୋକେ କଲେଜ କର୍ତ୍ତୃପକ୍ଷଙ୍କ ଅବହେଳାକୁ ସମ୍ପୂର୍ଣ୍ଣ ରୂପେ ଦାୟୀ କରିଛନ୍ତି। ପରିବାର ଲୋକେ ଅଭିଯୋଗ କରିଛନ୍ତି ଯେ, ୪ ମାସ ପୂର୍ବରୁ କଲେଜ ହଷ୍ଟେଲରେ ନିଶା ଖାଇବାକୁ କେନ୍ଦ୍ରକରି ଝୁମ୍ପାଙ୍କୁ ହଷ୍ଟେଲରୁ କର୍ତ୍ତୃପକ୍ଷ ବାହାର କରିଦେଇଥିଲେ। ଯାହାକୁ ନେଇ ଝୁମ୍ପା ମାନସିକ ସ୍ତରରେ ଭାଙ୍ଗି ପଡ଼ିିବା ସହ ଅନେକ ଥର ଘରକୁ ଫୋନ କରି କାନ୍ଦବା ସହ ହଷ୍ଟେଲରୁ ଚାଲିଯିବାକୁ ଚାହେଁ ବୋଲି କହିଥିଲେ। ମାତ୍ର କଲେଜ କର୍ତ୍ତୃପକ୍ଷ ଏହାକୁ ଗୁରୁତ୍ୱର ସହ ଗ୍ରହଣ କରିଥିଲେ ତାଙ୍କ ଝିଅର ଏପରି ଅବସ୍ଥା ହୋଇ ନ ଥାନ୍ତା। ସେହିପରି ଝୁମ୍ପାଙ୍କ ପୁରୁଷ ବନ୍ଧୁ କହିଛନ୍ତି, ଉଭୟଙ୍କ ଭିତରେ ଛୋଟ ମୋଟ ଝଗଡ଼ା ହୁଏ। ମାତ୍ର ଝୁମ୍ପା ଓ ତାଙ୍କ ଭିତରେ ଏମିତି କିଛି ଝଗଡ଼ା ନ ଥିଲା ଯାହାକି ସିଏ ଆତ୍ମହତ୍ୟା ପନ୍ଥା ବାଛିନେବେ। ଅନ୍ୟପଟେ ପୋଲିସ ଝୁମ୍ପାଙ୍କ ରୁମ୍ରୁ ଲାପଟପ୍, ଡାଏରୀ ଓ କିଛି ଚିଠି ଜବତ କରି ଘଟଣାର ତଦନ୍ତ ଜାରି ରଖିଛି।
