କୋକସରା,୧୩ା୮(ଡି.ଏନ୍.ଏ.) :
କଳାହାଣ୍ଡି ଜିଲା କୋକସରା ବ୍ଲକ ରେଙ୍ଗାଲପାଲି ପଁଚେତ୍ ଅଧୀନ ପାଣିଗଁା ଶବରପଡ଼ାକେ ଆଏଜ୍ ବି ଫିଦିନିଅଁା ରାସ୍ତା ନଁାଇଁନ। ଇ ଗଁାରେ ୩୦ ଆଦିବାସୀ ପରିବାରର ପାଖାପାଖି ୨ଶହ ଲୋକ୍ ବାସ୍ କରୁଛନ୍। ଗଁାକେ ଯିବାର ଆଏବାର ଲାଗି ରେଙ୍ଗାଲପାଲିରୁ ଗୁଟେ ମାଟି ରାସ୍ତା ଅଛେ। ହେଲେ କେଭେ ସରକାରୀ ଅନୁଦାନରୁ ଇ ରାସ୍ତାର ମରାମତି ନାଇଁ ହେଇଥିବାର ଜନାଯାଇଛେ। ଯେନ୍ଥିରଲାଗି ବରଷା ଦିନେ ଇ ରାସ୍ତାରେ ଅଁାଠେ କାଦୋ ହେଉଥିଲାବେଲେ ଶବରପଡ଼ାବାସୀ ଖେତ୍ ଆଡିରେ ଯିବାର ଆଏବାର କରୁଛନ୍। ଗଁାର ସବୁ ଲୋକ୍ ସଖାଲ ପାଏଲେ କାମ୍ଧଁଦାର ଲାଗି କୋକସରା ଉପରେ ନିରଭର କରୁଛନ୍। ସେନ୍ତା ପଡ଼ାର ଛାତ୍ରୀଛାତ୍ର କୋକସରା ପାଠ୍ପଢ଼ି ଯାଉଥିଲାବେଲେ ବିପଦ୍ ଅବସ୍ତାରେ ଅଁାଠେ କାଦୋରେ ଖେତ୍ଆଡ଼ିରେ ଯାଆସ କରୁଛନ୍। ସେନ୍ତା ଗଁାରେ ଅଙ୍ଗନଓ୍ବାଡି କେନ୍ଦ୍ରଟେ ବି ନଁାଇଁନ। ଯେନ୍ଥିରଲାଗି ଛୁଆ ଆର ଗରଭ୍ବତୀ, ପ୍ରସୂତି ମହିଲାମାନେ ସେବା ପାଏବାରୁ ବଁଚିତ୍ ହେଉଥିବାର ଗଁାବାସୀ ଅଭିଯୋଗ କରିଛନ୍। ସେନ୍ତା ଗଁାର ସୁଶାନ୍ତ ଶବର, ଲିଙ୍ଗରାଜ ଶବର, ଚନ୍ଦ୍ରଭାନୁ ଶବର, ବୈକୁଣ୍ଠ ଶବର, ଧନୁର୍ଯ୍ୟ ଶବର, ପୁରନ୍ଦର ଶବର, ମୁକୁନ୍ଦ ଶବର, ଲଲିତ ଶବର ପରମୁଖ ସମସିଆର ସମାଧାନ ଲାଗି ଅନେକ ଥର ବ୍ଲକ ପରଶାସନକେ ଗୁହାରି କରି ନିରାଶ ହେଇଥିବାର କହିଛନ୍। ଏନ୍ତାଥି ଗଁାବାସୀ ନିଜର ନିଜର ଭାଏଗ୍କେ ଆଦ୍ରି ପଡ଼ି ରହିଛନ୍। ଇ ବାବ୍ଦେ କୋକସରା ବିଡିଓ ବସନ୍ତ କୁମାର ସେଠିକୁଁ ପଚରାଲାରୁ ଆମର ପାସ୍କେ ଏନ୍ତା କିଛି ଅଭିଯୋଗ ନାଇଁ ଆସି। ଘଟନାର ତଦଁତ୍ କରି ବରଷା ଦିନ୍ ଉତାରୁ ପଁଚେତ୍ ଅନୁଦାନରୁ ଶବରପଡ଼ାକେ ରାସ୍ତା ତିଆରି କରବାର ବେବସ୍ତା କରାଯିବା ବଲି ସେ କହିଥିଲେ। ହେଲେ କେଭେ ଶବରପଡ଼ାବାସୀ ଇ ସମସିଆରୁ ମୁକ୍ତି ପାଉଛନ୍ ଦେଖ୍ବାକେ ବାକି ରହିଲା।
