କେନ୍ଦୁଝର, ୨୯ା୫(ଡି.ଏନ୍.ଏ.)-କେନ୍ଦୁଝର ସହରରେ ଅବୈଧ କବ୍ଜା ଦିନକୁ ଦିନ ବୃଦ୍ଧି ପାଉଥିବାରୁ ଟ୍ରାଫିକ ସମସ୍ୟା ଲାଗି ରହିଛି। ପୌରପାଳିକା ଅଧୀନ ଥିବା ବିଭିନ୍ନ ଗଳିକନ୍ଦି ଏପରିକି ଜାତୀୟ ରାଜପଥ କଡ଼ଗୁଡିକୁ କେତେକ ପ୍ରଭାବଶାଳୀ ବ୍ୟକ୍ତି କବଜା କରିଥିବାରୁ ସାଧାରଣରେ ଯିବା ଆସିବା ଲାଗି ସମସ୍ୟା ଲାଗି ରହିଛି। ଯାହାରକି ଜ୍ୱଳନ୍ତ ଉଦାହରଣ ହେଉଛି ରାମରାମ ଗଳିର ଦଳେଇ ଫଳ ଗୋଦାମ। ଏହି ଗୋଦାମରେ ସକାଳୁ ସନ୍ଧ୍ୟା ପର୍ଯ୍ୟନ୍ତ ଘଣ୍ଟାଘଣ୍ଟା ଧରି ଫଳ ବୋଝେଇ ଟ୍ରକ ଗୁଡିକ ଛିଡା ହୋଇ ରହୁଥିବାରୁ ଏହି ରାସ୍ତା ଦେଇ ଯାଆସ କରିବାରେ ନାନା ସମସ୍ୟା ଲାଗି ରହିଛି। ଏପରିକି ଛୋଟ ବଡ ଗାଡିଗୁଡିକ ଯିବା ଆସିବା କଲାବେଳେ ମଝିରେ ମଝିରେ ଦୁର୍ଘଟଣା ଘଟିବା ସହ ଘଣ୍ଟା ଘଣ୍ଟା ଧରି ଟ୍ରାଫିକ ଜାମ ହେଉଥିବାର ଦୃଶ୍ୟ ଦେଖିବାକୁ ମିଳିଛି। ଏହି ଗଳିର ଉଭୟ ପାର୍ଶ ବିଭିନ୍ନ ଦୋକାନୀ ମାନଙ୍କର ବେଆଇନ କବ୍ଜା ଯୋଗୁ ଅଣ ଓସାରିଆ ହୋଇଥିବାରୁ ଫଳ ବାଲାର ଫଳ ବୋଝେଇ ଟ୍ରକ ଗୁଡିକର ଦୈରାତ୍ମ୍ୟ ସୀମା ଟପିବାକୁ ବସିଛି। ଏହି ଗଳିର ଗୁରୁତ୍ୱକୁ ଉପଲବଧି କରି ପୂର୍ବରୁ ଦୁଇ ଦୁଇ ଜଣ ଜିଲାପାଳ ଭାରିଯାନ ଯାଆସ ଉପରେ କଟକଣା ପାଇଁ ଗଳିର ଉଭୟ ମୁଣ୍ଡରେ ଲୁହା ଖମ୍ବ ଲଗାଇବାକୁ ପୌର ପ୍ରଶାସନକୁ ନିର୍ଦ୍ଦେଶ ଦେଇଥିଲେ। କିନ୍ତୁ ଏହା କାର୍ଯ୍ୟକ୍ଷମ ହୋଇପାରିଲା ନାହିଁ। ଜିଲା ଆରକ୍ଷୀ ଅଧୀକ୍ଷକ ଏବଂ ଜିଲାପାଳଙ୍କ କାର୍ଯ୍ୟାଳୟ ଠାରୁ ମାତ୍ର ୨୦୦ମିଟର ଦୂର ବ୍ୟବଧାନରେ ଥିବା ଏହି ଗଳିର ଅବ୍ୟବସ୍ଥା ପ୍ରତି ପ୍ରଶାସନ ଦୃଷ୍ଟି ନ ଦେଲେ ଆଗାମୀ ଦିନରେ ଆନ୍ଦୋଳନାତ୍ମକ ପରିସ୍ଥିତି ସୃଷ୍ଟି ହେବ ବୋଲି ସ୍ଥାନୀୟ ଲୋକେ କହିଛନ୍ତି। ଏସମ୍ପର୍କରେ କେନ୍ଦୁଝରଗଡ ପୌରପାଳିକାର ନିର୍ବାହୀ ଅଧିକାରୀ ମଧୁସ୍ମିତା ସାମନ୍ତରାୟଙ୍କୁ ପଚାରିବାରୁ ତଦନ୍ତ କରାଯାଇ ପଦକ୍ଷେପ ନିଆଯିବ ବୋଲି ପ୍ରକାଶ କରିଛନ୍ତି।
