କେନ୍ଦୁଝର,୧୫।୪(ସ୍ବ.ପ୍ର.): କରୋନା ମୁକାବିଲା ନିମନ୍ତେ ରାଜ୍ୟରେ ସମ୍ପ୍ରତ୍ତି ଲକ୍ ଡାଉନ ସ୍ଥିତି ଜାରି ରହିଛି। ତେବେ ଏହି ସମୟରେ କେବଳ ଅତ୍ୟାବଶ୍ୟକୀୟ ସେବାଗୁଡ଼ିକ ଜାରି ରହିଛି। ଏହି କ୍ରମରେ ବ୍ୟାଙ୍କ ଖୋଲା ରହିଛି। ହେଲେ କେନ୍ଦୁଝର ଜିଲାର କେତେକ ବ୍ୟାଙ୍କରେ ଉପଭୋକ୍ତାମାନଙ୍କ ପରିଚାଳନା ପାଇଁ ସ୍ବତନ୍ତ୍ର ବ୍ୟବସ୍ଥା ନ ଥିବାରୁ ଭିଡ଼ ଜମୁଛି। ବ୍ୟାଙ୍କରୁ ଟଙ୍କା ଉଠାଇବା ଓ ଜମା କରିବା ପାଇଁ ଏହି ଭିଡ଼ ଲାଗୁଛି। ସରକାର ବିଭିନ୍ନ ଯୋଜନାରେ ହିତାଧିକାରୀଙ୍କ ଖାତାରେ ସହାୟତା ରାଶି ଜମା କରିଥିବାରୁ ଏହି ଟଙ୍କା ଉଠାଇବା ପାଇଁ ଖାତାଧାରୀଙ୍କ ଭିଡ଼ ଲାଗୁଛି। ଅପେକ୍ଷା ଗୃହ ନ ଥିବାରୁ ଏବଂ ସ୍ଥାନ ଅଭାବରୁ କେତେକ ବ୍ୟାଙ୍କରେ ବାହାରେ ରାସ୍ତା ପର୍ଯ୍ୟନ୍ତ ଭିଡ଼ ଲାଗୁଥିବା ଏବଂ ସାମାଜିକ ଦୂରତ୍ୱ ପାଳନ ହେଉନଥିବାରୁ ଅସନ୍ତୋଷ ପ୍ରକାଶ ପାଉଛି । କେତେକ ଏଟିଏମ୍ ରେ ମଧ୍ୟ ଅନେକ ସମୟରେ ଟଙ୍କା ନ ଥିବାରୁ ଲୋକ ଅସୁବିଧା ଭୋଗୁଛନ୍ତି। ଫଳରେ ବ୍ୟାଙ୍କରେ ବାଧ୍ୟ ହୋଇ ଭିଡ଼ ଜମାଉଥିବା ଅଭିଯୋଗ ହେଉଛି। କାମରେ ବ୍ୟସ୍ତ ବ୍ୟାଙ୍କ କର୍ମଚାରୀମାନେ ଏହାକୁ ଗୁରୁତ୍ୱ ଦେଉ ନ ଥିବାରୁ ସରକାରଙ୍କ ଲକ୍ ଡାଉନ କଟକଣା ପ୍ରହସନରେ ପରିଣତ ହେଉଛି। ଏନଇ ପଦକ୍ଷେପ ନେବାକୁ ଦାବି ହେଉଛି।
