ଦେଓଗାଁ, ୨୫ା୫(ଡି.ଏନ.ଏ.)-ବଲାଙ୍ଗୀର ଜିଲା ଦେଓଗାଁ ବ୍ଲକ ମକୁନ୍ଦୁପୁର ପଞ୍ଚାୟତର ସରପଞ୍ଚ ବାଳକ ପଧାନ ପ୍ରବାସୀ ଶ୍ରମିକଙ୍କୁ ଫୋନରେ ଗାଲିଗୁଲଜ କରିବା ଭିଡିଓ ଭାଇରାଲ ହୋଇଛି। ଏହାକୁ ନେଇ ସରପଞ୍ଚ ଅଡୁଆରେ ପଡିଛନ୍ତି ା ସୋମବାର ମୂଳନିବାସୀ ଏକତା ମିଶନ ସଭାପତି ପ୍ରଭାତ ମହାନନ୍ଦ, ଭୀମ ଆର୍ମୀର ଶିବ ପ୍ରସାଦ ନାଗ, ଦଳିତ ଏକ୍ଟିଭିଷ୍ଟ ନେତ୍ରାନନ୍ଦ ଦୀପ ,ମାଞ୍ଚନ ବାରିକ ପ୍ରମୁଖ ବିଡିଓ ନବୀନ କିଶୋର ପାଢ଼ୀଙ୍କୁ ଭେଟି ସରପଞ୍ଚଙ୍କ ବିରୋଧରେ ତଦନ୍ତପୂର୍ବକ କାର୍ଯ୍ୟାନୁ୍ଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି ା ସେହିପରି ଜାତିଆଣ ଆକ୍ଷେପ କରିବା ଅଭିଯୋଗରେ ବ୍ଲକ କୁଲୁତା ସମାଜ ତରଫରୁ କାନ୍ତେଶ୍ୱର ପଧାନ, ସୁରେଶ ଚନ୍ଦ୍ର ଭୋଇ, ପୂର୍ବତନ ସରପଞ୍ଚ ଅନ୍ତର୍ଯ୍ୟାମୀ ଭୋଇ, ରାଜେନ୍ଦ୍ର ବିଶ୍ୱାଳ, ଗୋବର୍ଦ୍ଧନ ସାହୁ, ସୁଶାନ୍ତ ସାହୁ ପ୍ରମୁଖ ତୁଷୁରା ଥାନାଧିକାରୀ ଯଶୋବନ୍ତ ପ୍ରଧାନୀଙ୍କ ନିକଟରେ ଲିଖିତ ଅଭିଯୋଗ କରିଛନ୍ତି ା ଅନ୍ୟପକ୍ଷେ ଜିଲା ଯୁବ କୁଲୁତା ସମାଜ ସଭାପତି ଅସିମ ଭୋଇଙ୍କ ନେତୃତ୍ୱରେ ଜିଲା ଜରୁରୀକାଳୀନ ଅଧିକାରୀ ଶଙ୍କର୍ଷଣ ପ୍ରଧାନଙ୍କୁ ଭେଟି ବିହିତ କାର୍ଯ୍ୟାନୁଷ୍ଠାନ ସକାଶେ ଅଭିଯୋଗ କରିଛନ୍ତି ା
ଅଭିଯୋଗ ଅନୁସାରେ ଚଳିତ ମାସ ୨୦ ତାରିଖରେ ଜାମଝରଣ, ତେଲପାଲି ଅଞ୍ଚଳର କେତେକ ପ୍ରବାସୀ ଶ୍ରମିକ ଦେଓଗାଁ ବସ୍ଷ୍ଟାଣ୍ଡରେ ଓହ୍ଲାଇବାପରେ ସ୍ଥାନୀୟ ନୋଡାଲ ୟୁପି ସ୍କୁଲରେ ଆଶ୍ରୟ ନେଇଥିଲେ। ସେଠାରୁ ନିଜ ପଞ୍ଚାୟତର ସରପଞ୍ଚ ବାଳକ ପଧାନଙ୍କୁ କ୍ୱାରାଣ୍ଟାଇନରେ ରଖିବା ଓ ଖାଇବା ବ୍ୟବସ୍ଥା କରିବା ପାଇଁ ଯୋଗାଯୋଗ କରିଥିଲେ ା ହେଲେ ଅପରାହ୍ନ ୧୨ଟା ପର୍ଯ୍ୟନ୍ତ କୌଣସି ବ୍ୟବସ୍ଥା କରା ନ ଯିବାରୁ ସେମାନେ ପୁଣିଥରେ ସରପଞ୍ଚଙ୍କୁ ଫୋନ କରିଥଇଲେ। ଏଥିରେ ଉତ୍କ୍ଷିପ୍ତ ହୋଇ ସରପଞ୍ଚ ଉକ୍ତ ପ୍ରବାସୀମାନଙ୍କୁୁ ଗାଲିଗୁଲଜ କରି ଜାତିଆଣ ଆକ୍ଷେପ କରିଥିଲେ ବୋଲି ଅଭିଯୋଗ ହୋଇଛି। ଉକ୍ତ ବାର୍ତ୍ତାଳାପକୁ ସୋସିଆଲ ମିଡିଆରେ ପୋଷ୍ଟ କରିବା ପରେ ସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଇଛି ା ଏ ନେଇ ସରପଞ୍ଚ ପଧାନଙ୍କ ମତ ଲୋଡିବାରୁ ପ୍ରବାସୀ ଶ୍ରମିକଙ୍କୁ ପ୍ରଶାସନ ଖାଇବା ଓ ରହିବା ବ୍ୟବସ୍ଥା କରିବା କଥା ା ହେଲେ ମୋତେ ସେମାନେ ବାରମ୍ବାର ଫୋନ କରି ଗାଳି କରିବାରୁ ତାର ପ୍ରତିଉତ୍ତର ଦେଇଥିଲି ା କୁଲୁତା ସମାଜକୁ ମୁଁ ସମ୍ମାନ କରେ, ଏଣୁ କିଛି ତ୍ରୁଟି ହୋଇଥିଲେ ସେଥିପାଇଁ କ୍ଷମା ପ୍ରାର୍ଥନା କରୁଛି ା ତେବେ ସମ୍ପୂର୍ଣ୍ଣ କଲ ରେକର୍ଡକୁ ଯାଞ୍ଚ କରାଗଲେ ସବୁକଥା ସାମ୍ନାକୁ ଆସିବ ବୋଲି ସେ କହିଥିଲେ ା
