ରାହାମା,୨ା୨(ଡି.ଏନ.ଏ.): କୁଜଙ୍ଗ ବ୍ଲକ ଅଧୀନ ବଡ଼ବାଲିକଣି ପଞ୍ଚାୟତରେ ଥିବା ସାନବାଲିକଣି ପ୍ରାଥମିକ ବିଦ୍ୟାଳୟରେ ନାନା ଅନିୟମିତତା ହୋଇଥିବା ଅଭିଯୋଗ ହୋଇଛି। ବିଦ୍ୟାଳୟ ପ୍ରଧାନଶିକ୍ଷକ ବିଭୁପ୍ରସାଦ ଦାଶ ଏସବୁ ଅନିୟମିତତା କରିଥିବା ନେଇ ଛାତ୍ରାଭିଭାବକ ଓ ବିଦ୍ୟାଳୟ କମିଟି ସଭ୍ୟମାନେ କୁଜଙ୍ଗ ମଣ୍ଡଳ ଶିକ୍ଷା ଅଧିକାରୀଙ୍କ ନିକଟରେ ଅଭିଯୋଗ କରିଛନ୍ତି।
ସେମାନେ ଅଭିଯୋଗରେ ଦର୍ଶାଇଛନ୍ତି, ବିଦ୍ୟାଳୟରେ ୩୦ରୁ ଊର୍ଦ୍ଧ୍ୱ ଛାତ୍ରୀଛାତ୍ର ପଢ଼ୁଥିବାବେଳେ ସେମାନଙ୍କ ପାଇଁ ମାତ୍ର ଦୁଇ ଜଣ ଶିକ୍ଷକ ନିୟୋଜିତ ଅଛନ୍ତି। ବିଭିନ୍ନ ସମୟରେ ପ୍ରଧାନଶିକ୍ଷକ ଦାଶ ଅଫିସ କାମ ଥିବା ବାହାନା କରି ବିଦ୍ୟାଳୟରେ ଅନୁପସ୍ଥିତ ରହୁଛନ୍ତି। ସେହିପରି ପିଲାଙ୍କ ମଧ୍ୟାହ୍ନଭୋଜନ ଦାୟିତ୍ୱ ସେ ବୁଝୁଥିଲେ ବି ନିମ୍ନମାନର ଖାଦ୍ୟ ଯୋଗାଉଛନ୍ତି। ମିଥ୍ୟା ଭାଉଚର ପ୍ରସ୍ତୁତ କରି ମଧ୍ୟାହ୍ନଭୋଜନ ପାଇଁ ଆସୁଥିବା ଅର୍ଥ ଆମତ୍ସାତ କରୁଛନ୍ତି। ବିଦ୍ୟାଳୟର ପାରିପାର୍ଶ୍ୱିକ ଉନ୍ନତି ଏବଂ ମରାମତି ପାଇଁ ଆସୁଥିବା ଅର୍ଥର ଠିକା କାମକୁ ନିଜେ କରୁଛନ୍ତି। କମିଟିର କୌଣସି ସଦସ୍ୟ କିମ୍ବା ସଭାପତିଙ୍କୁ ବି ଜଣାଉନାହାନ୍ତି। ଏବେ ପ୍ରଧାନଶିକ୍ଷକ ଅନୁପସ୍ଥିତ ଥିବାରୁ ୧୫ ଦିନ ହେବ ଛାତ୍ରୀଛାତ୍ର ବିଦ୍ୟାଳୟକୁ ଆସୁନାହାନ୍ତି। ଏସମ୍ପର୍କରେ ସଭ୍ୟ କିମ୍ବା ସଭାପତି ତାଙ୍କୁ ପଚାରିଲେ ସେ ପାଲଟା ଜବାବ ଦେଉଛନ୍ତି। ତେଣୁ ତାଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ଏଠାରୁ ବଦଳି କରିବାକୁ ଈଶ୍ୱର ଚନ୍ଦ୍ର ପାଣି, ସଞ୍ଜୟ ପଟ୍ଟନାୟକ, ସୋମକାନ୍ତ ପଲେଇ, ଦୀପ୍ତିମୟୀ ପାଣି, ପ୍ରଭାତୀ ପଣ୍ଡା, ସୁବାସ ସାମନ୍ତରାୟ, ବିପିନ ସାମନ୍ତରାୟ ପ୍ରମୁଖ ଦାବି କରିଛନ୍ତି। ଏ ସମ୍ପର୍କରେ ପ୍ରଧାନଶିକ୍ଷକ ଦାଶଙ୍କୁ ପଚାରିବାରେ ସେ କହିଥିଲେ, ମୋତେ ବଦନାମ୍ କରିବା ପାଇଁ କିଛି ଅଭିଭାବକଙ୍କ ଏହା ହୀନ ପ୍ରୟାସ। ଏଥିରେ କୌଣସି ସତ୍ୟତା ନାହିଁ। ଏସମ୍ପର୍କରେ କୁଜଙ୍ଗ ମଣ୍ଡଳ ଶିକ୍ଷାଧିକାରୀ ସୁଦର୍ଶନ ନନ୍ଦଙ୍କୁ ପଚରାଯିବାରେ ସେ କହିଥିଲେ, ପ୍ରଧାନଶିକ୍ଷକ ଅସୁସ୍ଥତା କାରଣରୁ ଛୁଟିରେ ଅଛନ୍ତି। ଯାହା ଅଭିଯୋଗ ଆସିଛି ସେ ସବୁର ତଦନ୍ତ କରାଯିବ। ଯଦି ଏଥିରେ କିଛି ବେଆଇନ କାର୍ଯ୍ୟ ହୋଇଥିବା ଜଣାପଡ଼ିବ ତେବେ ତାଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ସୂଚନାଯୋଗ୍ୟ, ପୂର୍ବରୁ ଏହି ପ୍ରଧାନଶିକ୍ଷକ ଅନୁପସ୍ଥିତ ରହୁଥିବା ଓ ସ୍କୁଲର ଅନ୍ୟ କାର୍ଯ୍ୟରେ ଅନିୟମିତତା କରିଥିବା ନେଇ ୨୦୧୨ରେ ତତ୍କାଳୀନ ଜିଲା ଶିକ୍ଷାଧିକାରୀଙ୍କ ନିକଟରେ ଅଭିଯୋଗ ହୋଇଥିଲା।
