ଯାଜପୁର ଅଫିସ/କଳିଙ୍ଗନଗର/ ଧର୍ମଶାଳା (ଡି.ଏନ.ଏ.),୨୦ା୪ : ପୋଷ୍ଟମର୍ଟମ ରିପୋର୍ଟ ପ୍ରଦାନ ପାଇଁ ୨୦ ହଜାର ଟଙ୍କା ଦାବି କରି ଦାନଗଦି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ମେଡିକାଲ ଅଫିସର ପବିତ୍ର କୁମାର ସେଠୀ ବୁଧବାର ଭିଜିଲାନ୍ସ ହାତରେ ଧରା ପଡିଛନ୍ତି। ଏଥିରେ ସହଯୋଗ କରିଥିବା ସିକ୍ୟୁରିଟି ଗାର୍ଡ ଅଭିରାମ କାଣ୍ଡିଙ୍କୁ ମଧ୍ୟ ଗିରଫ କରାଯାଇଛି। ଏନେଇ କଟକ ଭିଜିଲାନ୍ସ କେଶ ନମ୍ବର ୮/୧୮ା୪ା୨୦୨୩ ଧାରା ୭ପିସି ଆଇନ ୧୯୮୮ରେ ଏକ ମାମଲା ରୁଜୁ କରି ଅଧିକ ତଦନ୍ତ ଜାରି ରହିଛି।
ଅଭିଯୋଗ ଅନୁଯାୟୀ, ଯାଜପୁର ଜିଲା କାଳିଆପାଣି ଥାନା ଅନ୍ତର୍ଗତ ଗିରିଙ୍ଗାମାଳି ଗ୍ରାମରେ ଗତ ୩୧ା୩ା୨୦୨୩ରେ ବଜ୍ରପାତ ଯୋଗୁ ଦୁଃଖବନ୍ଧୁ ମହନ୍ତଙ୍କ ମୃତ୍ୟୁ ହୋଇଥିଲା। ରାଜ୍ୟ ସରକାରଙ୍କ ପ୍ରାକୃତିକ ବିପର୍ଯ୍ୟୟ କ୍ଷୟକ୍ଷତି ଯୋଜନାରେ ବଜ୍ରପାତରେ ମୃତକଙ୍କ ପରିବାରକୁ ୪ଲକ୍ଷ ଟଙ୍କା ପ୍ରଦାନ କରାଯିବାକୁ ଘୋଷଣା ହୋଇଛି। ଏଥିପାଇଁ ଆବେଦନକାରୀ ତଥା ମୃତକଙ୍କ ପୁଅ ବିକାଶ ମହନ୍ତଙ୍କୁ ପୋଷ୍ଟମର୍ଟମ ରିପୋର୍ଟର ଆବଶ୍ୟକତା ପଡିଥିଲା। ତେଣୁ ପୋଷ୍ଟମର୍ଟମ ରିପୋର୍ଟ ପାଇଁ ଡାକ୍ତରଙ୍କ ପାଖକୁ ଦୌଡି ଦୌଡି ସେ ନିରାଶ ହୋଇଥିଲେ। ଡାକ୍ତର ସେଠୀ ୨୦ ହଜାର ଟଙ୍କା ଦେଲେ ରିପୋର୍ଟ ମିଳିବ ବୋଲି ଦାବି କରୁଥିଲେ। ଏହି ଲାଞ୍ଚ ଅର୍ଥ ନ ଦେଲେ ବ୍ୟବଚ୍ଛେଦ ରିପୋର୍ଟ ଦିଆଯିବ ନାହିଁ ବୋଲି ଡାକ୍ତର ବିକାଶଙ୍କୁ କହିବା ପରେ ସେ ଭିଜିଲାନ୍ସ ଅଧିକାରୀଙ୍କ ସହ ଯୋଗାଯୋଗ କରିଥିଲେ। ଏହାପରେ ଭିଜିଲାନ୍ସ ବିଭାଗ ଅଧିକାରୀମାନେ ପୂର୍ବ ଯୋଜନା ଅନୁସାରେ ସିକ୍ୟୁରିଟି ଗାର୍ଡ କାଣ୍ଡିଙ୍କ ମାଧ୍ୟମରେ ଡାକ୍ତର ସେଠୀଙ୍କୁ କେମିକାଲ ପ୍ରଲେପ ଦିଆଯାଇଥିବା ଟଙ୍କା ପ୍ରଦାନ କରାଯାଇଥିଲା। ଏହାପରେ ସାକ୍ଷୀଙ୍କ ଉପସ୍ଥିତିରେ ଡାକ୍ତରଙ୍କ ଠାରୁ ଲାଞ୍ଚ ଟଙ୍କା ଜବତ କରାଯାଇଥିଲା। ଏହାବାଦ୍ ଡାକ୍ତର ସେଠୀଙ୍କ ଧର୍ମଶାଳା ଥାନା ଅନ୍ତର୍ଗତ ଥାନୁଆଳ ଘରେ ଏବଂ ସରକାରୀ କ୍ବାର୍ଟର୍ସରେ ଚଢ଼ାଉ କରାଯାଇ ନଗଦ ୧ ଲକ୍ଷ ୨୦ ହଜାର ଟଙ୍କା ଜବତ କରାଯାଇଛି। ଉଭୟ ଡାକ୍ତର ସେଠୀ ଓ ସିକ୍ୟୁରିଟି ଗାର୍ଡ କାଣ୍ଡିଙ୍କୁ ଗିରଫ କରି ବୁଧବାର କୋର୍ଟଚାଲାଣ କରାଯାଇଛି।
