ପାଟନା,୨୯।୪: ବିହାର ଭୋଜପୁର ଜିଲାରେ ଘଟିଛି ଏକ ଅଭାବନୀୟ ଘଟଣା। ଏଠାରେ ୧୩ ବର୍ଷର ଜଣେ ବାଳିକା ବଧୂ ବିବାହ ପୂର୍ବରୁ ପୋଲିସ ସହାୟତା ଲୋଡିଥିଲେ। ଏନେଇ ସେ ସ୍ଥାନୀୟ ମହିଳା ଥାନାକୁ ଏକ ଚିଠି ଲେଖି ବିବାହ କରିବାକୁ ତାଙ୍କର ଇଛା ନ ଥିବା ଏବଂ ବରଙ୍କ ବୟସ ୩୪ ବର୍ଷ ବୋଲି ଉଲ୍ଲେଖ କରିଥିଲେ। ତେବେ ପୋଲିସ ନିଷ୍କ୍ରିୟତା ଯୋଗୁ ତାଙ୍କର ବିବାହ ହୋଇଯାଇଥିଲା। ଏହି ଘଟଣା ପ୍ରଚାର ହେବାରୁ ସନ୍ଦେଶ ଥାନା ପକ୍ଷରୁ ୨୦ ଦିନ ପରେ ଆରମ୍ଭ ହୋଇଛି ଖୋଳତାଡ଼। ମହିଳା ଥାନା ଅଧିକାରୀ ମାଧୁରୀ କୁମାରୀ କହିଛନ୍ତି ଯେ, ଚିଠି ମିଳି ନ ଥିଲା। ତେବେ ଫୋନ୍ କରି ନାବାଳିକା ଜଣକ ପୋଲିସକୁ ଅବଗତ କରାଇଥିଲେ। ପୋଲିସ ବିବାହ କରିଥିବା ଅଖଗାଓ୍ବଁ ମନ୍ଦିର ପୂଜାରୀଙ୍କୁ ଏନେଇ ପଚରାଉଚରା କରିଥିଲେ। ପୂଜାରୀ କନ୍ୟାର ବୟସ ୧୮ ବୋଲି କହିଥିଲେ। ନାବାଳିକା ସ୍ଥାନୀୟ ଥାନାର ଟାଳଟୁଳ ନୀତି ଯୋଗୁ ସଦର ଏସଡିଓଙ୍କୁ ମଧ୍ୟ ଚିଠି ଲେଖିଥିଲେ। ଏସଡିଓ ଏନେଇ ତଦନ୍ତ ପାଇଁ ଧନଗାଇ ପୋଲିସ ଥାନାକୁ ନିର୍ଦ୍ଦେଶ ଦେଇଥିଲେ। ବିବାହ ହେବ ନାହିଁ ବୋଲି ପୋଲିସ ପକ୍ଷରୁ ଆଶ୍ୱାସନା ମଧ୍ୟ ଦିଆଯାଇଥିଲା। ତେବେ ଏଭଳି ଏକ ସମ୍ବେଦନଶୀଳ ଘଟଣାରେ ପୋଲିସର ନିଷ୍କ୍ରିୟତା ନେଇ ଲୋକଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇବାରେ ଲାଗିଛି।
