ଭୁବନେଶ୍ୱର,୨୬ା୮(ବ୍ୟୁରୋ) : କମିଶନରେଟ୍ ପୋଲିସକୁ ଖୋଲାଖୋଲି ଚ୍ୟାଲେଞ୍ଜ ଦେଇ ପୁଣି ଲୁଟେରା ମାତିଛନ୍ତି। ପାତ୍ରପଡା ଅଞ୍ଚଳରେ ଥିବା ଦୋକାନରେ ପଶି ମୁଣ୍ଡରେ ପିସ୍ତଲ ଲଗାଇ ଟଙ୍କା ଓ ମୋବାଇଲ ଲୁଟ୍ କରିବା ଘଟଣା ଆତଙ୍କ ଖେଳାଇ ଦେଇଛି। ସିସିଟିଭିରେ କଏଦ ସମ୍ପୂର୍ଣ୍ଣ ଦୃଶ୍ୟ କଏଦ୍ ହୋଇଥିଲା। ଏ ନେଇ ଖଣ୍ଡଗିରି ଥାନାରେ ଅଭିଯୋଗ ହୋଇଛି।
ସୂଚନା ମୁତାବକ ହରମୋହନ ବେହେରାଙ୍କ ପାତ୍ରପଡା ଭେନସ ଭୋଜନାଳୟ ନିକଟରେ ଏକ ବହି ଦୋକାନ ରହିଛି। ଶନିବାର ରାତି ସାଢେ ୧୦ଟା ବେଳେ ଦୋକାନ ବନ୍ଦ କରିଥିଲେ। ପ୍ରତିଦିନ ପରି ଦୋକାନ ବନ୍ଦ ପରେ ତାଙ୍କ ଭିଣୋଇ ଦୋକାନକୁ ଶୋଇବାକୁ ଅସିବା ପରେ ହରମୋହନ ବେପାର ଟଙ୍କା ଧରି ଘରକୁ ଯାଇଥିଲେ। ହରମୋହନ ଆସିବାର ୧୦ ମିନିଟ୍ ପରେ ଏକ ପଲସର ବାଇକ୍ରେ ୩ ଜଣ ଦୁର୍ବୃତ୍ତ ଆସି ବାଇକ୍ ରଖି ସିଧାସଳଖ ଦୋକାନରେ ପଶିଥିଲେ। ତାଙ୍କ ଭିଣୋଇଙ୍କ ମୁଣ୍ଡରେ ବନ୍ଧୁକ ଲଗାଇ ଯାହା ଅଛି ବାହାର କର ନଚେତ ଗୁଳି ଫୁଟେଇ ଦେବୁ କହିଥିଲେ। ଭୟଭୀତ ଅବସ୍ଥାରେ ତାଙ୍କ ଭିଣେଇ କିଛି ନ ଥିବା ମନା କରିବାରୁ ତାଙ୍କ ମୋବାଇଲ ଏବଂ ମୋବାଇଲ କଭର ଭିତରେ ଥିବା ୨୧ ଶହ ଟଙ୍କାକୁ ଛଡାଇ ନେଇ ଫେରାର ହୋଇଯାଇଥିଲେ। ଖବରପାଇ ହରମୋହନ ଆସିବା ବେଳକୁ ଲୁଟେରାମାନେ ଫେରାର ହୋଇ ଯାଇଥିଲେ। ଦୋକାନରେ ଲାଗିଥିବା ସିସିଟିଭି ଫୁଟେଜରେ ସମସ୍ତ ଦୃଶ୍ୟ କଏଦ ହୋଇଥିଲା। ସିସିଟିଭି ଫୁଟେଜ ସହ ହରମୋହନ ଥାନାରେ ଅଭିଯୋଗ କରିବା ପରେ ପୋଲିସ ଅଭିଯୁକ୍ତମାନଙ୍କୁ ଧରିବା ଲାଗି ତନାଘନା ଚଳାଇଥିବା ବେଳେ ସେମାନଙ୍କ ଟେର ପାଇ ପାରିନି।
