କାନବେରା,୭।୧: ଅଷ୍ଟ୍ରେଲିଆରେ ଥିବା ଜଙ୍ଗଲରେ ଭୟଙ୍କର ନିଆ ଲାଗିଛି। ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ଅଗ୍ନିଶମ ବିଭାଗ କର୍ମଚାରୀ ରାତିଦିନ ଲାଗିପଡିଛନ୍ତି। କିଛିଦିନ ପୂର୍ବରୁ ଅଗ୍ନିଶମ ବିଭାଗ କର୍ମଚାରୀମାନେ ନିଜ ଜୀବନକୁ ବାଜି ଲଗାଇ ନିଆଁ ଲିଭାଉ ଥିବା ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା। ନିଆଁ ଭିତରୁ କର୍ମଚାରୀମାନେ ଏକ ଟ୍ରକ୍ରେ ବସି ବାହାରୁଥିବା ଉକ୍ତ ଭିଡିଓରେ ଦେଖିବାକୁ ମିଳିଥିଲା। ଏବେ ଆଉ ଏକ ଲୋମଟାଙ୍କୁରା ଫଟୋ ଏବେ ଭାଇରାଲ ହୋଇଛି। ଜଣେ ଯୁବତୀ ଅଗ୍ନିଶମ କର୍ମଚାରୀ ଥିବା ନିଜ ପିତାଙ୍କ ଫଟୋ ସୋସିଆଲ ମିଡିଆରେ ଛାଡିଛନ୍ତି। ଯେଉଁ ଫଟୋରେ ତାଙ୍କ ପିତା ତଳେ ଶୋଇଥିବାର ନଜର ଆସିଛନ୍ତି। ଜଙ୍ଗଲରେ ରାତିଦିନ ନିଆଁ ଲିଭାଉଥିବାବେଳେ ଟିକେ ସମୟ ପାଇଁ ସେ ତଳେ ବିଶ୍ରାମ ନେଉଥିବାବେଳେ ଫଟୋଟି ଉଠାଯାଇଛି। ଦୀର୍ଘ ୫୦ ଦିନ ହେବ ନିଆଁକୁ ଆୟତ କରିବାକୁ ଚେଷ୍ଟା କରାଯାଉଥିଲେ ମଧ୍ୟ ଏହା ସମ୍ଭବ ହୋଇପାରୁନାହିଁ। ଏହି ଫଟୋ ଦେଖି ୟୁଜର୍ସ ଭାବୁକ ହୋଇ କମେଣ୍ଟ ଦେଉଛନ୍ତି। ସୂଚନାଯୋଗ୍ୟ, ଅଷ୍ଟ୍ରେଲିଆ ଜଙ୍ଗଲରେ ନିଆଁ ଲାଗିବା ଫଳରେ ପାଖାପାଖି ୫୦ କୋଟି ଜୀବଜନ୍ତ ଏବଂ ପକ୍ଷୀ ପୋଡ଼ି ହୋଇଯାଇଛନ୍ତି। ଏହି ନିଆଁ ଅଷ୍ଟ୍ରେଲିଆର ଭିକ୍ଚୋରିଆ ଏବଂ ନ୍ୟୁ ସାଉଥେଓୱଲସ ଅଞ୍ଚଳରେ ଲାଗିଛି। ଏହି ନିଆଁରେ ୨୦୦ରୁ ଅଧିକ ଘର ପୋଡ଼ି ନଷ୍ଟ ହୋଇଯାଇଛି। ଅଷ୍ଟ୍ରେଲିଆ ଗଣମାଧ୍ୟମର ରିପୋର୍ଟ ଅନୁଯାୟୀ ଏଯାବତ ୧୮ ଜଣ ଲୋକଙ୍କ ମୃତ୍ୟୁ ଘଟିଛି। ହେଲେ ଆଗାମୀ ସମୟରେ ଏହି ସଂଖ୍ୟା ବଢ଼ିପାରେ।
