ନୂଆଦିଲ୍ଲୀ,୧୬।୯: ଚଳିତ ଆର୍ଥିକବର୍ଷର ଏପ୍ରିଲରୁ ଅଗଷ୍ଟ ମଧ୍ୟରେ ମାରୁତି ସୁଜୁକି ଇଣ୍ଡିଆ ଓ ଟାଟା ମୋଟର୍ସର ପାସେଞ୍ଜର ଗାଡ଼ି ବିକ୍ରି ହ୍ରାସ ପାଇଛି। ଅନ୍ୟପକ୍ଷରେ ମହିନ୍ଦ୍ରା ଆଣ୍ଡ ମହିନ୍ଦ୍ରା ଓ ହ୍ୟୁଣ୍ଡାଇ ମୋଟର୍ସର ବିକ୍ରି ବଢ଼ିଛି ବୋଲି ଅଟୋ ନିର୍ମାତା ସଂଗଠନ ସିଆମ୍ ପକ୍ଷରୁ ପ୍ରକାଶିତ ରିପୋର୍ଟରେ କୁହାଯାଇଛି। ମାରୁତିର ଏପ୍ରିଲ-ଅଗଷ୍ଟରେ ମୋଟ୍ ଗାଡ଼ି ବିକ୍ରି ୫,୫୫,୦୬୪ ଥିବା ବେଳେ ବର୍ଷକ ପୂର୍ବରୁ ଏହି ଅବଧିରେ ଏହା ୭,୫୭,୨୮୯ ଥିଲା। ଫଳରେ କମ୍ପାନୀ ବଜାର ଅଂଶ ୫୨.୧୬ରୁ ହ୍ରାସ ପାଇ ୪୯.୮୩ ପ୍ରତିଶତ ହୋଇଛି। ସେହିପରି ଟାଟା ମୋଟର୍ସର ବିକ୍ରି ଏହି ସମୟରେ ୧.୩୯% ହ୍ରାସ ପାଇଛି। ଆଲୋଚ୍ୟ ମାସ ମଧ୍ୟରେ କମ୍ପାନୀ ୬୦,୦୯୩ ଗାଡ଼ି ବିକ୍ରି କରିଥିଲା, ଯାହାକି ପୂର୍ବ ବର୍ଷ ୯୮,୭୦୨ ଥିଲା। ଏହାର ବଜାର ଅଂଶ ୬.୭୯ରୁ ୫.୪୧ ପ୍ରତିଶତକୁ ହ୍ରାସ ପାଇଛି। ଅନ୍ୟପକ୍ଷରେ ଏହି ସମୟରେ ହ୍ୟୁଣ୍ଡାଇ ମୋଟର ଇଣ୍ଡିଆର ବିକ୍ରି ୨.୭୭% ବୃଦ୍ଧି ପାଇଛି। ଏହା ଏପ୍ରିଲ-ଅଗଷ୍ଟ ମଧ୍ୟରେ ୨,୦୩,୭୨୯ ଗାଡ଼ି ବିକ୍ରି କରିଛି, ଯାହା କି ପୂର୍ବ ବର୍ଷ ୨,୨୬,୩୯୬ ବିକ୍ରି କରିଥିଲା। ତେବେ ଚଳିତ ଆର୍ଥିକ ବର୍ଷରେ କମ୍ପାନୀ କମ୍ ଗାଡ଼ି ବିକ୍ରି କରିଥିଲେ ସୁଦ୍ଧା ଏହାର ବଜାର ଅଂଶ ୧୫.୫୯ ପ୍ରତିଶତରୁ ୧୮.୩୬ ପ୍ରତିଶତକୁ ବୃଦ୍ଧିପାଇଛି। ସେହିପରି ମହିନ୍ଦ୍ରା ଆଣ୍ଡ ମହିନ୍ଦ୍ରା ୮୯,୭୩୩ ଗାଡ଼ି ବିକ୍ରି କରିଛି। କିନ୍ତୁ ଗତ ଆର୍ଥିକ ବର୍ଷର ଏହି ସମୟରେ ଏହା ୧,୦୦,୦୧୫ ଗାଡ଼ି ବିକ୍ରି କରିଥିଲା। କିନ୍ତୁ ଏହାର ବଜାର ଅଂଶ ୬.୮୯ରୁ ୮.୦୮ ପ୍ରତିଶତକୁ ବଢ଼ିଛି।
