ନୂଆଦିଲ୍ଲୀ,୨୬।୯: ପାର୍ୱଣ ଋତୁ ପୂର୍ୱରୁ କର୍ମଚାରୀମାନେ ବୋନସକୁ ଅପେକ୍ଷା କରି ରହିଛନ୍ତି। ବିଭିନ୍ନ ସରକାରୀ ଏବଂ ଘରୋଇ ସଂସ୍ଥା ବୋନସ ଘୋଷଣା ମଧ୍ୟ କରୁଛନ୍ତି। ଏହି ସମୟରେ ପ୍ରତିରକ୍ଷା ମନ୍ତ୍ରଣାଳୟ (Defense Ministry) ଅଧୀନରେ କାର୍ଯ୍ୟ କରୁଥିବା TCL ଅର୍ଥାତ ଟ୍ରୁପ କମ୍ଫଟର୍ସ ଲିମିଟେଡ ମଧ୍ୟ ନିର୍ଦ୍ଦେଶ ଜାରି କରି ବୋନସ ପ୍ରଦାନକୁ ମଞ୍ଜୁରୀ ଦେଇଛି। ଏହି ସରକାରୀ କମ୍ପାନୀ ୨୦୨୫-୨୬ ଆର୍ଥିକ ବର୍ଷ ପାଇଁ ମାତ୍ର ୧୮.୫୬ ଦିନର ବୋନସ ଦେବାକୁ ଘୋଷଣା କରିଛି। AINPSEF ଏହାକୁ ବେସାମରିକ (ସିଭିଲିଆନ) କର୍ମଚାରୀଙ୍କ ପାଇଁ ଏକ ବଡ଼ ଝଟକା ବୋଲି କହିଛି।
ପର୍ୱପର୍ୱାଣି ପୂର୍ୱରୁ ଏତେ କମ ଦିନର PLB ଅର୍ଥାତ୍ ପ୍ରଡକ୍ଟିଭିଟି ଲିଙ୍କ୍ଡ ବୋନସ (Productivity Linked Bonus) ଘୋଷଣା ପରେ TCL କର୍ମଚାରୀଙ୍କ ମଧ୍ୟରେ ନିରାଶା ଦେଖାଦେଇଛି। କର୍ମଚାରୀମାନଙ୍କ ଚିନ୍ତାର କାରଣ ହେଉଛି, ପୂର୍ୱରୁ ଅର୍ଡନାନ୍ସ କାରଖାନାଗୁଡ଼ିକରେ କାର୍ଯ୍ୟରତ ଏହି କର୍ମଚାରୀମାନଙ୍କୁ ଏହାଠାରୁ ଅଧିକ ଦିନର PLB ମିଳୁଥିଲା।
AINPSEFର ରାଷ୍ଟ୍ରୀୟ ସଭାପତି ଡାକ୍ତର ମନଜିତ ସିଂହ ପଟେଲଙ୍କ କହିବା ଅନୁଯାୟୀ, ପୂର୍ୱରୁ କର୍ମଚାରୀମାନଙ୍କୁ ସାଧାରଣତଃ ୩୦ ରୁ ୪୧ ଦିନ କିମ୍ୱା ତା’ଠାରୁ ଅଧିକ ଦିନର PLB ମିଳୁଥିଲା। ଆଉ ଏକ ଖରାପ ଖବର ହେଉଛି, ବୋନସର ହିସାବ ସର୍ୱାଧିକ ୭,୦୦୦ ଟଙ୍କାର ସୀମା (ସିଲିଂ) ଉପରେ କରାଯାଉଛି।
TCLର ଆଦେଶ ଅନୁଯାୟୀ, ଆର୍ଥିକ ବର୍ଷ ୨୦୨୫-୨୬ ପାଇଁ ଗ୍ରୁପ-ବି (ନନ-ଗେଜେଟେଡ) ଏବଂ ଗ୍ରୁପ-ସି କର୍ମଚାରୀମାନଙ୍କୁ ୧୮.୫୬ ଦିନର ମଜୁରୀ ବରାବର PLB ପ୍ରଦାନ କରାଯିବ।
ବୋନସ ଗଣନା ପାଇଁ ମାସକୁ ହାରାହାରି ୩୦.୪ ଦିନ ଧରାଯାଇଛି। ଏହା ସହିତ ବୋନସ ପାଇଁ ମାସିକ ୭,୦୦୦ ଟଙ୍କାର ସର୍ୱାଧିକ ସୀମା ଲାଗୁ ରହିବ। ଅର୍ଥାତ ଯଦି କୌଣସି କର୍ମଚାରୀଙ୍କ ପ୍ରକୃତ ମାସିକ ଦରମା ୭,୦୦୦ ଟଙ୍କାରୁ ଅଧିକ ହୋଇଥାଏ, ତଥାପି PLBର ହିସାବ ସର୍ୱାଧିକ ୭,୦୦୦ ଟଙ୍କା ଆଧାରରେ ହିଁ କରାଯିବ। ଏହି ହିସାବ ଅନୁସାରେ ୧୮.୫୬ ଦିନର ବୋନସ ରାଶି ପ୍ରାୟ ୪,୨୭୪ ଟଙ୍କା ହେଉଛି।
AINPSEFର ରାଷ୍ଟ୍ରୀୟ ସଭାପତି ଡାକ୍ତର ପଟେଲଙ୍କ କହିବା ଅନୁସାରେ, TCL ଗଠନ ପୂର୍ୱରୁ ଯେତେବେଳେ ଅର୍ଡନାନ୍ସ କାରଖାନାଗୁଡ଼ିକ ସିଧାସଳଖ ପ୍ରତିରକ୍ଷା ମନ୍ତ୍ରଣାଳୟ ଅଧୀନରେ ଥିବା ଅର୍ଡନାନ୍ସ ଫ୍ୟାକ୍ଟ୍ରି ବୋର୍ଡ (OFB) ଜରିଆରେ ସରକାରୀ ବିଭାଗ ଭାବେ କାର୍ଯ୍ୟ କରୁଥିଲା, ସେତେବେଳେ ସିଭିଲ କର୍ମଚାରୀମାନଙ୍କୁ PLB ଅଧୀନରେ ୪୧ ଦିନ କିମ୍ୱା ତା’ଠାରୁ ଅଧିକ ଦିନର ବୋନସ ମିଳୁଥିଲା। ତାଙ୍କ ମତରେ, ଏହି ବୋନସ ସାଧାରଣତଃ ୩୦ ରୁ ୪୧ ଦିନ ମଧ୍ୟରେ ରହୁଥିଲା।
ସେତେବେଳେ ମଧ୍ୟ ବୋନସର ସର୍ୱାଧିକ ସୀମା ୭,୦୦୦ ଟଙ୍କା ଥିଲା। କିନ୍ତୁ ଅଧିକ ଦିନର ହିସାବ କାରଣରୁ ୪୧ ଦିନ ଅନୁସାରେ ପ୍ରାପ୍ତ ରାଶି ପ୍ରାୟ ୯,୪୪୧ ଟଙ୍କା ହେଉଥିଲା। ସେହିପରି ୧୮.୫୬ ଦିନ ହିସାବରେ ଏହି ରାଶି ପ୍ରାୟ ୪,୨୭୪ ଟଙ୍କା।
ଏହିପରି ୪୧ ଦିନ ଏବଂ ୧୮.୫୬ ଦିନ ମଧ୍ୟରେ ପ୍ରାୟ ୫,୧୬୭ ଟଙ୍କାର ପାର୍ଥକ୍ୟ ରହୁଛି। ଡାକ୍ତର ପଟେଲଙ୍କ ଅନୁଯାୟୀ କର୍ମଚାରୀମାନଙ୍କର ପ୍ରାୟ ୫,୦୦୦ ଟଙ୍କାର କ୍ଷତି ହୋଇଛି। ସେ କହିଛନ୍ତି ଯେ ପ୍ରାୟ ୪,୨୦୦ ଟଙ୍କାରେ କର୍ମଚାରୀଙ୍କ ଦୀପାବଳି କିଭଳି ବା ପାଳନ ହେବ!
ଡାକ୍ତର ପଟେଲ କହିଛନ୍ତି ଯେ ଅର୍ଡନାନ୍ସ କାରଖାନାଗୁଡ଼ିକର ନିଗମୀକରଣ (Corporatisation) ପରେ ଏଗୁଡ଼ିକୁ କର୍ପୋରେଟ ଡିଫେନ୍ସ ପବ୍ଲିକ ସେକ୍ଟର ଅଣ୍ଡରଟେକିଂ (DPSU) ଭାବରେ ପରିଚାଳିତ କରାଯାଉଛି। ଏହା ସହିତ ଉତ୍ପାଦନକ୍ଷମତା (Productivity) ଏବଂ ବୋନସ ର୍ନିଦ୍ଧାରଣ ପ୍ରକ୍ରିୟାରେ ମଧ୍ୟ ପରିବର୍ତ୍ତନ ଘଟିଛି।
ପୂର୍ୱରୁ ଯେଉଁଠି କର୍ମଚାରୀମାନଙ୍କୁ ଅଧିକ ଦିନର PLB ମିଳୁଥିଲା, ଏବେ ତାହା ହ୍ରାସ ପାଇ ୧୮.୫୬ ଦିନରେ ସୀମିତ ହୋଇଯାଇଛି। ଫଳରେ କର୍ମଚାରୀଙ୍କ ବୋନସ ରାଶି କମିଯାଇଛି। ସେ ପ୍ରଶ୍ନ ଉଠାଇଛନ୍ତି ଯେ ନିଗମୀକରଣର ଉଦ୍ଦେଶ୍ୟ ଥିଲା କମ୍ପାନୀଗୁଡ଼ିକରୁ ଅଧିକ ରାଜସୱ ଆଦାୟ କରିବା ଏବଂ ସେଗୁଡ଼ିକୁ ଉନ୍ନତ ପ୍ରଦର୍ଶନକାରୀ ସଂସ୍ଥାରେ ପରିଣତ କରିବା। ଏଭଳି ସ୍ଥିତିରେ କର୍ମଚାରୀଙ୍କ ବୋନସ କମିବା ଏକ ଚିନ୍ତାର ବିଷୟ।
