ଭୁବନେଶ୍ୱର, ୨୪ା୨(ବ୍ୟୁରୋ):ଆମେ ଓଡ଼ିଆ, ଆମ ଭାଷା ଓଡ଼ିଆ। ଆମର ୧୨ ମାସରେ ୧୩ ପରବ, ଆଉ ସେହି ପରବରେ ବିଭିନ୍ନ ପ୍ରକାରର ମିଠା ଓ ପିଠା ପଣା ପ୍ରସ୍ତୁତ ହୁଏ। ରବିବାର ଭୁବନେଶ୍ୱରର ଇନ୍ଦିରା ଗାନ୍ଧୀ ଓ ମଧୁସୂଦନ ଦାସ ପାର୍କରେ ଓଡ଼ିଆ ଘରର ଏହି ସଂସ୍କୃତି, ପରମ୍ପରା ଓ ଚଳଣି ବାରିହୋଇପଡ଼ିଥିଲା। ଓଡ଼ିଆ ଘରର ମିଠା ଓ ପିଠାରେ ମହକି ଉଠିଥିଲା ଦୁଇ ପାର୍କ। ଲୋକେ ବିଭିନ୍ନ ପ୍ରକାରର ମିଠା ଓ ପିଠା ତିଆରି କରି ପ୍ରଦର୍ଶିତ କରିଥିବାବେଳେ ଏଥିପାଇଁ ପାର୍କ ଉତ୍ସବରେ ପ୍ରବଳ ଭିଡ଼ ଲାଗିଥିଲା।
ଚଳିତଥର ‘ଓଡ଼ିଆ ଭାଷା, ସଂସ୍କୃତି ଓ ପରମ୍ପରା’କୁ ନେଇ ତୃତୀୟ ପାର୍କ ଉତ୍ସବର ଆୟୋଜନ କରାଯାଇଥିଲା। ଗୋଟିପୁଅ ନୃତ୍ୟ, ଚିତ୍ରକଳା, କାହାଣୀ, ଯୋଗ, ମାଟି କଳାକୃତି ତିଆରି, ଆମୋଦପ୍ରମୋଦ ଆଦି ସମସ୍ତ କାର୍ଯ୍ୟକ୍ରମ ଓଡ଼ିଆଙ୍କ କଥା କହିଥିଲା। ଲୋକେ ନାଚଗୀତ ସହ ଜଗିଂ ଓ ସ୍ବାସ୍ଥ୍ୟ ଶିବିରରେ ନିଜକୁ ସାମିଲ୍ କରିଥିଲେ। ଏହାବ୍ୟତୀତ ଭୁବନେଶ୍ୱର ମହାନଗର ନିଗମ (ବିଏମ୍ସି) ଦ୍ୱାରା ‘ଇଜ୍ ଅଫ୍ ଲିଭିଂ’ ସର୍ଭେରେ ନାଗରିକମାନେ ସାମିଲ ହେବା ପାଇଁ ସଚେତନ କରାଯାଇଥିଲା। ବିଏମ୍ସି କମିଶନର ପ୍ରେମଚନ୍ଦ୍ର ଚୌଧାରୀ କହିଛନ୍ତି, କେନ୍ଦ୍ର ସରକାରଙ୍କ ଦ୍ୱାରା ଦେଶର ୧୦୦ଟି ସ୍ମାର୍ଟସିଟିକୁ ନେଇ ଆରମ୍ଭ ହୋଇଥିବା ଏହି ସର୍ଭେରେ ଭୁବନେଶ୍ୱରକୁ ଏକ ବାସ ଉପଯୋଗୀ ସହର ବୋଲି ପ୍ରମାଣିତ କରିବାର ସମୟ ଆସିଛି। ଭୁବନେଶ୍ୱରର ସମସ୍ତ ନାଗରିକ ନିଜ ସହରକୁ ସ୍ମାର୍ଟସିଟି ଭଳି ଦେଶର ନଂ.୧ ବାସ ଉପଯୋଗୀ କରିବା ପାଇଁ ଚୌଧାରୀ ଆହ୍ବାନ ଦେଇଥିଲେ। ତା’ସହ ବିଏମ୍ସି ଦ୍ୱାରା ‘ମୁଁ ସଫେଇବାଲା ଅଭିଯାନ’ରେ ନାଗରିକଙ୍କୁ ସାମିଲ କରିବା ପାଇଁ ମଧ୍ୟ ସଚେତନ କରାଯାଇଥିଲା। ଏହି ଅବସରରେ ଓଲିଉଡ୍ କଳାକାରମାନେ ଯୋଗଦେଇ ସହରବାସୀଙ୍କୁ ନାଚଗୀତରେ ହଜାଇ ଦେଇଥିଲେ।
ଉଲ୍ଲେଖଯୋଗ୍ୟ, ସହରର ୭ ମୁଖ୍ୟ ଓ ବଡ଼ ପାର୍କରେ ଆସନ୍ତା ମାର୍ଚ୍ଚ ୧୫ ଯାଏ ପ୍ରତି ରବିବାର ସକାଳ ୭ଟାରୁ ୯ଟା ଯାଏ ଏହି ଉତ୍ସବ ହେବ। ରବିବାର ତୃତୀୟ ପାର୍କ ଉତ୍ସବରେ ୩ ହଜାରରୁ ଊର୍ଦ୍ଧ୍ୱ ଲୋକଙ୍କ ସମାଗମ ହୋଇଥିଲା। ଉଭୟ ପାର୍କରେ ୧୦ ଜଣ ଲେଖାଏ ସୁରକ୍ଷା କର୍ମୀଙ୍କୁ ନିୟୋଜିତ କରାଯାଇଥିଲା। ଆସନ୍ତା ରବିବାର ୧୦ ତାରିଖରେ ମହାତ୍ମା ଗାନ୍ଧୀ ଓ ବୁଦ୍ଧ ଜୟନ୍ତୀ ପାର୍କରେ ପାର୍କ ଉତ୍ସବ କରାଯିବ ବୋଲି ବିଡିଏ ପକ୍ଷରୁ ସୂଚନା ଦିଆଯାଇଛି।
