ଯୋଡ଼ା,୩୦।୯(ଡି.ଏନ.ଏ.)-କେନ୍ଦୁଝର ଜିଲା ବାମେବାରୀ ଥାନା ଅନ୍ତର୍ଗତ ପିଢପୋଖରୀ ଗ୍ରାମରେ ରବିବାର ଏକ ଅଭାବନୀୟ ଘଟଣା ଘଟିଛି ା ପାରିବାରିକ କଳହକୁ କେନ୍ଦ୍ର କରି ଜଣେ ଯୁବକଙ୍କ ଠେଙ୍ଗା ମାଡ଼ରେ ତାଙ୍କ ୪ବର୍ଷ ପୁଅଙ୍କ ମୃତ୍ୟୁ ଘଟିଛି । ସ୍ତ୍ରୀ ଗୁରୁତର ହୋଇଛନ୍ତି । ପୋଲିସ ଏକ ମାମଲା(ନଂ.୧୨୭/୧୯) ରୁଜୁ କରି ତଦନ୍ତ ଆରମ୍ଭ କରିଛି । ମୃତଦେହ ବ୍ୟବଚ୍ଛେଦ ପରେ ତାଙ୍କ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି । ଅଭିଯୁକ୍ତ ବାପା ଫେରାର ଅଛନ୍ତି । ପୋଲିସ ତାଙ୍କୁ ଗିରଫ ପାଇଁ ତନାଘନା ଚଳାଇଛି ।
ମିଳିଥିବା ସୂଚନା ଅନୁଯାୟୀ, ପିଢପୋଖରୀ ଗ୍ରାମରେ ରହୁଥିବା ରାମ ମୁଣ୍ଡାଙ୍କ ସହ ତାଙ୍କ ସ୍ତ୍ରୀ ସରୋଜିନୀଙ୍କ କୌଣସି କାରଣରୁ ରବିବାର ସନ୍ଧ୍ୟାରେ ଝଗଡ଼ା ଲାଗିଥିଲା । ଏହି ପାରିବାରିକ କଳି ଶେଷରେ ଉଗ୍ରରୂପ ଧାରଣ କରିଥିଲାା ଏଥିରେ ଉତ୍କ୍ଷିପ୍ତ ହୋଇ ରାମ ଏକ ଠେଙ୍ଗାରେ ସରୋଜିନୀଙ୍କୁ ପିଟି ଚାଲିଥିଲେ ା ସରୋଜିନୀଙ୍କ ଚିତ୍କାର ଶୁଣି ଘରେ ଖେଳୁଥିବା ତାଙ୍କ ୪ ବର୍ଷର ପୁଅ ମା’ଙ୍କ ପାଖକୁ ଦୌଡି ଆସିଥିଲେ । ହେଲେ ରାମଙ୍କ ଠେଙ୍ଗା ମାଡ଼ରୁ ସେ ବର୍ତ୍ତି ପାରି ନ ଥିଲେ। ରାମଙ୍କ ଠେଙ୍ଗା ମାଡ଼ରେ ଉଭୟ ମା’ ଓ ପୁଅ ଗୁରୁତର ହୋଇଥିଲେ । ସ୍ଥାନୀୟ ଲୋକେ ଉଭୟଙ୍କୁ ଉଦ୍ଧାର କରି କେନ୍ଦୁଝର ଡାକ୍ତରଖାନାରେ ଭର୍ତ୍ତି କରିଥିଲେ। ହେଲେ ସୋମବାର ସକାଳେ ପୁଅଙ୍କ ମୃତ୍ୟୁ ଘଟିଥିବା ଥାନା ଅଧିକାରୀ ପରେଶ କୁମାର ମହାନ୍ତି କହିଛନ୍ତି । ସରୋଜିନୀ ସେଠାରେ ଚିକିତ୍ସାଧୀନ ଅଛନ୍ତି।
