କରାଚୀ,୭।୩(ପି.ଟି.)- ଦୁଇ ବର୍ଷ ପୂର୍ବେ ଓ୍ବେଷ୍ଟଇଣ୍ଡିଜ ଦଳ ଅନ୍ତର୍ଜାତୀୟ ଟି୨୦ ସିରିଜ୍ ପାଇଁ ପାକିସ୍ତାନ ଗସ୍ତ କରିଥିଲା। ଏଥିନେଇ ଭ୍ରମଣକାରୀ ଦଳର ସଦସ୍ୟଙ୍କୁ ଅଧିକ ଅର୍ଥ ଦିଆଯାଇଥିଲା ବୋଲି ପାକିସ୍ତାନ କ୍ରିକେଟ ବୋର୍ଡ (ପିସିବି) ମୁଖ୍ୟ ଏହସାନ ମାନି କହିଛନ୍ତି। ନ୍ୟାଶନାଲ ଆସେମ୍ବଲି ଷ୍ଟାଣ୍ଡିଂ କମିଟିରେ ପିସିବି ମୁଖ୍ୟ ମାନି କହିଛନ୍ତି, ବୋର୍ଡ ପାକିସ୍ତାନ ଗସ୍ତ କରିଥିବା ପ୍ରତ୍ୟେକ ଓ୍ବେଷ୍ଟଇଣ୍ଡିଜ ଖେଳାଳିଙ୍କୁ ୨୫ ହଜାର ଆମେରିକୀୟ ଡଲାର ଦେଇଥିଲା। ଏହା ଭାରତୀୟ ମୁଦ୍ରାରେ ପ୍ରାୟ ସାଢ଼େ ୧୮ ଲକ୍ଷ ଟଙ୍କା। ସେହିଭଳି ଅନ୍ୟ ଏକ ଦଳକୁ ପାକିସ୍ତାନରେ ଅନ୍ତର୍ଜାତୀୟ ସିରିଜ୍ ଖେଳିବା ଲାଗି ଖେଳାଳି ପିଛା ୧୫ ହଜାର ଡଲାର ପ୍ରଦାନ କରାଯାଇଥିଲା। ୨୦୦୯ରେ ଶ୍ରୀଲଙ୍କା ଦଳ ଉପରେ ଆତଙ୍କବାଦୀ ଆକ୍ରମଣ ପରେ କୌଣସି ଅନ୍ତର୍ଜାତୀୟ ଦଳ ପାକିସ୍ତାନ ଗସ୍ତ କରିବାକୁ ଚାହୁଁ ନ ଥିଲେ। ଏଣୁ ଭ୍ରମଣକାରୀ ଦଳକୁ ଆକୃଷ୍ଟ କରିବା ଲାଗି ପିସିବି ଏଭଳି କରିଥିଲା। ଏହାପରେ ଅନ୍ୟ କୌଣସି ଭ୍ରମଣକାରୀ ଦଳକୁ ପ୍ରାପ୍ୟରୁ ଅଧିକ ଦିଆଯାଇନାହିଁ ବୋଲି ସେ ପ୍ରକାଶ କରିଛନ୍ତି। ନିକଟରେ ଶ୍ରୀଲଙ୍କା ଓ ବାଂଲାଦେଶ ବିପକ୍ଷ ସିରିଜ୍ ସମ୍ପୂର୍ଣ୍ଣ ଅଫିସିଆଲ ଥିଲା। ଏଥିନେଇ ପ୍ରାପ୍ୟ ଅନୁଯାୟୀ ଖେଳାଳିଙ୍କୁ ଦରମା ଦିଆଯାଇଛି।
