ଭବାନୀପାଟଣା, ୪।୩ (ଡି.ଏନ୍.ଏ.)- କଳାହାଣ୍ଡି ଜିଲା ମଦନପୁର ରାମପୁର, ଲାଞ୍ଜିଗଡ଼ ଆର ଥୁଆମୂଳ ରାମପୁର ବ୍ଲକର ଅତଡ଼ିଆ ଅଂଚଲମାନକେ ଥିବାର ଗଁାଗଁଡ଼ାର ଲୋକ୍ ଏଭ୍ଠାନୁ ପିଇଲା ପାଏନ୍ ଲାଗି ଦହଗଁଜ୍ ହେଲେନ। ଆଗ୍କେ ଖରାଦିନ ମାଡ଼ି ଆସୁଛେ। ପରଶାସନ ଏଭ୍ଠାନୁ ସମସିଆର ସମାଧାନ ଲାଗି ପଦକ୍ଷେପ ନେବାକେ ଅଂଚଲବାସୀ ଦାବି ହେଉଛେ।
ସୂଚନା ଅନ୍ସାରେ କଳାହାଣ୍ଡି ଜିଲାର ମଦନପୁର ରାମପୁର, ଲାଞ୍ଜିଗଡ଼ ଆର ଥୁଆମୂଳ ରାମପୁର ବ୍ଲକର ପାଖାପାଖି ୩୪ ପଁଚେତ୍ର ୧ ଲାଖ୍ରୁ ଅଧ୍କା ଲୋକ୍ ପିଇଲା ପାଏନ୍ ସମସିଆ ସଂଗେ ଯୁଝୁଛନ୍। ମଦନପୁର ରାମପୁର ବ୍ଲକର ଡୁଡୁକାଠେଙ୍ଗା, ବାରବନ୍ଧା, ଉର୍ଲାଦାନୀ, ଲୁବେନଗଡ, ଦେଢ଼ଶୁଳି, ମୋହନଗିରି, ଶିଙ୍ଗପୁର, ଡମ କର୍ଲାଖୁଣ୍ଟା, ଗୋଚ୍ଛାଡେଙ୍ଗେନ ଆର ମାଣିକେରା ପଁଚେତ୍ର ଅତଡ଼ିଆ ଅଂଚଲରେ ଥିବାର ଗଁାମାନକେ ଦିନୁଦିନ୍କେ ପିଇଲା ପାଏନ୍ ସମସିଆ ବଢ଼ତେଲ ଯାଉଛେ। ସେନ୍ତା ଲାଞ୍ଜିଗଡ଼ ବ୍ଲକର ୨୬ଟା ପଁଚେତ୍ରୁ କମର୍ଦ୍ଧା, ଭୁର୍ଟ୍ଟିଗଡ଼, କଦମଗୁଡ଼ା, ଗୁଣ୍ଡୁରି ବାତେଲିମା, ମାଲିଜୁବାଙ୍ଗ, ବନ୍ଧପାରି, ଲାଖବାହାଲି, ଲାଞ୍ଜି, ବେନଗଁା, ଗୁମଖାଲ ଆର ବିଜେପୁର ଲେଖେଁ ପଁଚେତ୍ମାନର ଲୋକ୍ ଏଭ୍ଠାନୁ ପାଏନ୍ ଲାଗି ଗୁଲ୍ଗୁଲା ହେଉଛନ୍। ଥୁଆମୂଳ ରାମପୁର ବ୍ଲକର ୧୬ଟା ପଁଚେତ୍ରୁ ବଡଛତ୍ରଙ୍ଗ, କର୍ଲାପାଟ, ବାଗଡ଼ିଆଣି, ଥୁଆମୂଳ, ବିରିକୋଟ, କେରପାଇ, ଡୁମେରପଦର, କିଆପଦର, ମହୁଲପାଟଣା, ମାଲିଗଁା, ନାକରୁଣ୍ଡି, କାଣୀଗୁମା ଆର ଅଡ୍ରି ପଁଚେତ୍ର ବହୁତ୍ ଗଁାରେ ବଡ଼ଭାରି ପିଇଲା ପାଏନ୍ ସମସିଆ ଦେଖାଦେଇଛେ। ଇ ଅଂଚଲମାନକେ ଗ୍ରାମ୍ୟ ଜଳ ଯୋଗାଣ ବିଭାଗ ତରଫୁ ଗଭୀର ନଲ୍ଚୁଅଁା, ସାନିଟାରୀ ବୋରଓ୍ବେଲର ବେବସ୍ତା କରାଯାଇଛେ। ହେଲେ ଖରାଦିନ ଆଗ୍ରୁ ଭୁତଲ ଜଲ ତଲକେ ପଲେଇ ଯାଉଛେ। ଏନ୍ତାଥି ଲୋକ୍ମାନେ ପିଇଲା ପାଏନ୍ ସମସିଆରେ ଯୁଝୁଛନ୍। ଇଆଡ଼େ ଗଁାମାନକେ ଥିବାର ନଲ୍ଚୁଅଁାମାନକର ଦେଖ୍ଭାଲ ଠିକ୍ ସମିଆରେ ନାଇଁ ହେବାର ଲାଗି ଅନେକ ନଲ୍ଚୁଅଁା ଅଚଲ ହେଇ ପଡ଼ିଛେ। ଏନ୍ତାଥି ଅଂଚଲବାସୀ ବଛରକୁତା ଝରନା ପାଏନ୍କେ ପିଇଲା ପାଏନ୍ ହିସାବେ ବେଭାର କରୁଥିଲାବେଲେ ଖରାଦିନେ ପାଏନ୍ ଶୁଖିଗଲେ ବାଲିଚୁଅଁା କୁଡ଼ି ସେ ପାଏନ୍କେ ଖାଏବା ପିଇବାରେ ବେଭାର କରୁଛନ୍। ବଛର ବଛର ହେଲା ପିଇଲା ପାଏନ୍ ସମସିଆ ଲାଗି ରହିଥିଲେ ବି ଜିଲା ଆର ବ୍ଲକ ପରଶାସନ ଅନ୍ଦେଖା କରୁଥିବାର ଅଂଚଲବାସୀ ଅଭିଯୋଗ କରିଛନ୍। ସେନ୍ତା ଖରାଦିନେ ଅଂଚଲବାସୀ ପିଇଲା ପାଏନ୍ ଲାଗି ବହୁତ୍ ଦହଗଁଜ୍ ହେଉଥିବାର କହିଛନ୍। ରାଏଜ୍ ସରକାର ଇ ଦିଗେ ଦୁରୁଷ୍ଟି ଦେଇ ପଦକ୍ଷେପ ନେବାକେ ଅଂଚଲବାସୀ ଦାବି କରିଛନ୍।
