ନୂଆଦିଲ୍ଲୀ,୧୩।୫(ପି.ଟି.): ଇଂଲଣ୍ଡରେ ଗତବର୍ଷ ଅନୁଷ୍ଠିତ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ଦିନିକିଆ ବିଶ୍ୱକପ୍ରେ ଆୟୋଜକ ଇଂଲଣ୍ଡ ଚାମ୍ପିୟନ ହୋଇଥିଲା। ତେବେ ଇଂଲଣ୍ଡ ସମେତ ରନର୍ସଅପ୍ ନ୍ୟୁଜିଲାଣ୍ଡକୁ ଯୁଗ୍ମ ବିଜେତା ଭାବେ ଘୋଷିତ କରାଯିବା ଉଚିତ ବୋଲି ଭାରତୀୟ ପୂର୍ବତନ କ୍ରିକେଟର ଗୌତମ ଗମ୍ଭୀର କହିଛନ୍ତି।
ବିଶ୍ୱକପ୍ର ଐତିହାସିକ ଫାଇନାଲ ମ୍ୟାଚ୍ ସୁପର ଓଭର ପରେ ମଧ୍ୟ ମ୍ୟାଚ୍ ଟାଇ ରହିଥିଲା। ତେବେ ବାଉଣ୍ଡାରୀ ସଂଖ୍ୟ ଦୃଷ୍ଟିକୋଣରୁ ନ୍ୟୁଜିଲାଣ୍ଡ ପଛରେ ପଡିଯିବାରୁ ଇଂଲଣ୍ଡ ଚାମ୍ପିୟନ ଘୋଷିତ ହୋଇଥିଲା। କିନ୍ତୁ ଇଂଲଣ୍ଡ ସମେତ ନ୍ୟୁଜିଲାଣ୍ଡକୁ ମଧ୍ୟ ଚାମ୍ପିୟନ ଘୋଷଣା କରାଯିବା ଉଚିତ୍ ଥିଲା ବୋଲି ଗମ୍ଭୀର ଷ୍ଟାର ସ୍ପୋଟର୍ସ ଶୋ’ ‘କ୍ରିକେଟ କନେକ୍ଟେଡ’କୁ ସାକ୍ଷାତକାର ଦେଇ କହିଛନ୍ତି। ବିଶ୍ୱକପ୍ର ବିଭିନ୍ନ ସଂସ୍କରଣରେ ଦମ୍ଦାର ପ୍ରଦର୍ଶନ କରିଥିଲେ ମଧ୍ୟ ନ୍ୟୁଜିଲାଣ୍ଡକୁ କେବେ ଶ୍ରେୟ ପ୍ରଦାନ କରାଯାଇ ନାହିଁ। ମୋଟାମୋଟି ଉପରେ ରେକର୍ଡ ଦେଖିଲେ ନୁଜିଲାଣ୍ଡ ଏହି ମେଗା ଇଭେଣ୍ଟରେ ସବୁବେଳେ ସ୍ଥିର ପ୍ରଦର୍ଶନ କରିଆସିଛି। କ୍ରମାଗତ ଗତ ଦୁଇଟି ବିଶ୍ୱକପ୍ରେ ନୁଜିଲାଣ୍ଡ ଫାଇନାଲରେ ପରାସ୍ତ ହୋଇ ରନର୍ସଅପ ହୋଇଥିଲା। କ୍ରିକେଟର ୩ଟି ଯାକ ଫର୍ମାଟ୍ରେ ଓ ସବୁ ପ୍ରକାର ପରିସ୍ଥିତିରେ ନ୍ୟୁଜିଲାଣ୍ଡ ସବୁବେଳେ ଭଲ ପ୍ରଦର୍ଶନ କରି ଆସିଛି। ନ୍ୟୁଜିଲାଣ୍ଡକୁ ତା’ର ଦକ୍ଷତା ଅନୁସାରେ ପ୍ରକୃତ ଶ୍ରେୟ କେବେ ପ୍ରଦାନ କରାଯାଇ ନାହିଁ ବୋଲି ସେ କହିଛନ୍ତି।
