ଭୁବନେଶ୍ୱର, ୨।୨(କ୍ରୀଡ଼ା ପ୍ରତିନିଧି)- ବରୋଦାରେ ନ୍ୟାଶନାଲ ମାଷ୍ଟର୍ସ ଗେମ୍ସର ୩ୟ ସଂସ୍କରଣ ଚଳିତ ମାସ ୫ରୁ ୯ ପର୍ଯ୍ୟନ୍ତ ଅନଷ୍ଠିତ ହେବ। ଏଥିରେ ମହିଳା ଓ ପୁରୁଷ ଫୁଟବଲ, ଆଥଲେଟିକ୍ସ, ବ୍ୟାଡ୍ମିଣ୍ଟନ ଓ ଭଲିବଲ ଆଦି ଇଭେଣ୍ଟରେ ଓଡ଼ିଶାଦଳ ଅଂଶଗ୍ରହଣ କରିବ। ପ୍ରତିଯୋଗିତାରେ ଓଡ଼ିଶାର ୧୦୬ ଜଣିଆ ପ୍ରତିନିଧି ଦଳ ଭାଗ ନେବାର କାର୍ଯ୍ୟକ୍ରମ ରହିଛି। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ଓଡ଼ିଶାର ପ୍ରଥମ ମହିଳା ଫୁଟବଲ ଅଧିନାୟିକା ଗୀତାଞ୍ଜଳି ସାମନ୍ତରାୟ ଆଗାମୀ ଟୁର୍ନାମେଣ୍ଟରେ ଓଡ଼ିଶା ଦଳର ନେତୃତ୍ୱ ନେବେ। ଅତୀତରେ ଓଡ଼ିଶାରେ ମହିଳା ଫୁଟବଲର ଚିହ୍ନ ନ ଥିବାବେଳେ ସାହସ ଦେଖାଇଥିଲେ ଗୀତାଞ୍ଜଳି। ତାଙ୍କର ବଳିଷ୍ଠ ନେତୃତ୍ୱ ଓଡ଼ିଶାରେ ମହିଳା ଫୁଟବଲର ଭିତ୍ତି ପକାଇଥିଲା। ସେତେବେଳେ ତାଙ୍କର ସେହି ସାହସ ଏବଂ ନେତୃତ୍ୱ ଦକ୍ଷତା ଯୋଗୁ ଜାତୀୟ ଦୃଶ୍ୟପଟରେ ଓଡ଼ିଶା ମହିଳା ଫୁଟବଲ ନିଜର ସ୍ଥିତି ଜାହିର କରିଥିଲା। ଫଳସ୍ବରୂପ ପରବର୍ତ୍ତୀ ସମୟରେ ଶ୍ରଦ୍ଧାଞ୍ଜଳି ସାମନ୍ତରାୟଙ୍କ ପରି ଅନେକ ଓଡ଼ିଆ ଖେଳାଳି ଅନ୍ତର୍ଜାତୀୟ ସ୍ତରରେ ନିଜକୁ ପ୍ରତିଷ୍ଠିତ କରିବାର ସୁଯୋଗ ପାଇଥିଲେ। ସମ୍ପ୍ରତି ନାଲ୍କୋରେ କାର୍ଯ୍ୟରତ ଗୀତାଞ୍ଜଳି ଏବେ ପୁଣିଥରେ ନିଜ ନେତୃତ୍ୱର ଯାଦୁ ଦେଖାଇବାକୁ ଯାଉଛନ୍ତି। ବରୋଦାରେ ମହିଳା ଫୁଟବଲ ଇଭେଣ୍ଟ ଆସନ୍ତା ୬ରୁ ୮ ପର୍ଯ୍ୟନ୍ତ ଅନୁଷ୍ଠିତ ହେବ। ଓଡ଼ିଶାର ୧୧ ଜଣିଆ ଦଳ ରବିବାର ସକାଳେ ବରୋଦା ଯିବା କାର୍ଯ୍ୟକ୍ରମ ରହିଛି। ଏହି ପରିପ୍ରେକ୍ଷୀରେ ଶନିବାର କଳିଙ୍ଗ ଷ୍ଟାଡିୟମରେ କ୍ରୀଡ଼ାଛାତ୍ରାବାସର ଅନ୍ତେବାସୀ ଏବଂ କୋଚ୍/ଅଫିସିଆଲମାନେ ଗୀତାଞ୍ଜଳିଙ୍କ ଟିମ୍କୁ ସମ୍ବର୍ଦ୍ଧିତ କରିଥିଲେ। ଓଡ଼ିଶା ଦଳରେ ଗୀତାଞ୍ଜଳିଙ୍କ ବ୍ୟତୀତ କଳ୍ପନା ସାହୁ, ପ୍ରଥମା ପ୍ରିୟଦର୍ଶିନୀ, ସରିତା ପଣ୍ଡା, ଦେବୀ ମହାନ୍ତି, ମମ୍ତାଜ ବେଗମ୍, ସମସେର ବେଗମ୍, ଦୀପ୍ତି ମିଶ୍ର ପ୍ରମୁଖ ପୁରୁଣା ପ୍ରତିଷ୍ଠିତ ଖେଳାଳିମାନେ ସ୍ଥାନ ପାଇଛନ୍ତି।
ନୂଆ ଅନୁଭୂତି ହେବ
”ମହିଳା ଫୁଟବଲ ଟିମ୍ରେ ସାମିଲ ଥିବା ସମସ୍ତ ଖେଳାଳି ଅଭିଜ୍ଞ। ମାତ୍ର ଦୀର୍ଘଦିନଧରି ଖେଳରୁ ଦୁରେଇ ରହିଥିବାରୁ ଏଥର ଏକ ନୂଆ ଅନୁଭୂତି ହେବ । ଆମେ ଯେତେବେଳେ ୧୯୯୨ରେ ପ୍ରଥମଥରପାଇଁ ଆସାମ ଯାଇଥିଲୁ ସେତେବେଳେ ଠିକ୍ଭାବେ ଖେଳିବା ଜାଣି ନ ଥିଲୁ। ଏବେ ସେ ସ୍ଥିତି ଯଦିଓ ନାହିଁ ତେବେ ସେହି ସମୟର କଥା ସ୍ମରଣକୁ ଆସୁଛି। ପୁଣିଥରେ ନୂଆକରି ଖେଳିବାକୁ ଯିବାଭଳି ଲାଗୁଛି। କାରଣ ଏକ ବଡ଼ ବ୍ୟବଧାନରେ ପରେ ମୁଁ ପୁଣି ଓଡ଼ିଶା ଦଳର ନେତୃତ୍ୱ ନେବାକୁ ଯାଉଛି। ଖେଳରୁ ଦୂରରେ ରହିଥିଲେ ହେଁ ମୁଁ ଗେମ୍କୁ ସମ୍ପୂର୍ଣ୍ଣ ଛାଡ଼ି ନ ଥିଲି। ମାତ୍ର ଅନ୍ୟ ପିଲାମାନଙ୍କର ଫିଟ୍ନେସ ସ୍ତର ସେତେ ଭଲ ନାହିଁ। ପାରିବାରିକ ସମସ୍ୟା ଥିବାଯୋଗୁ କେତେକ ଖେଳାଳି ଯିବା ମଧ୍ୟ ସମ୍ଭବ ହେଉନି। ଦୀର୍ଘ ୧୫-୧୬ ବର୍ଷ ପରେ ପୁଣିଥରେ ଏକ ରାଜ୍ୟ ଦଳର ନେତୃତ୍ୱ ନେଉଛି। ଭଲ ପ୍ରଦର୍ଶନ ପାଇଁ ଆଶା ଅଛି। ନିଯୁକ୍ତିସଂସ୍ଥା ନାଲ୍କୋ ଏବଂ ପରିବାରରୁ ସମର୍ଥନ ମିଳିଥିବାରୁ ଏବେ ପୁଣିଥରେ ଖେଳିବାକୁ ବାହାରକୁ ଯିବା ସମ୍ଭବ ହେଉଛି“ ବୋଲି ଗୀତାଞ୍ଜଳି ପ୍ରକାଶ କରିଛନ୍ତି। ପ୍ରକାଶ ଯୋଗ୍ୟ ଯେ, ଗୁଜରାଟ ମାଷ୍ଟର୍ସ ଗେମ୍ସ ଆସୋସିଏଶନ ଆନୁକୂଲ୍ୟରେ ହେବାକୁ ଯାଉଥିବା ଏହି ପ୍ରତିଯୋଗିତାରେ ଆଥଲେଟିକ୍, ହକି, ଶୁଟିଂ, ବାସ୍କେଟବଲ, ଟେବୁଲ ଟେନିସ, ସୁଇମିଂ, ବ୍ୟାଡ୍ମିଣ୍ଟନ, କବାଡ଼ି, ଭାରୋତ୍ତୋଳନ, ଆର୍ଚେରୀ, ଭଲିବଲ, ହ୍ୟାଣ୍ଡବଲ, ଫୁଟବଲ ଓ ଲନ୍ଟେନିସ ଆଦି ଇଭେଣ୍ଟ ଅନୁଷ୍ଠିତ ହେବ।
ଫୁଟବଲ ଦଳ।
