ବ୍ରହ୍ମପୁର ଅଫିସ,୧ା୩ – ରବିବାରରୁ ଜିଲାରେ ଯାନବାହନ ଯାଞ୍ଚ କଡାକଡି ହେବ। ଯେଉଁମାନେ ଏବେ ସୁଦ୍ଧା ଗାଡିର ଆବଶ୍ୟକ କାଗଜପତ୍ର କରି ପାରିନାହାନ୍ତି ସେମାନଙ୍କ ମଧ୍ୟରେ ଏବେ ଭାଳେଣି ପଡ଼ିଲାଣି। ଲୋକଙ୍କୁ ଯଥେଷ୍ଟ ସମୟ ଦିଆଯାଇଛି। ପରିବହନ ସମ୍ପର୍କିତ ପ୍ରମାଣପତ୍ର ପ୍ରସ୍ତୁତ ପାଇଁ ୨ଟି ପର୍ଯ୍ୟାୟରେ ପ୍ରାୟ ୬ ମାସ କୋହଳ କରାଯାଇଥିଲା। ନିର୍ଦ୍ଧାରିତ ସମୟ ଶେଷ ହୋଇ ଆସୁଥିବା ବେଳେ ଗତ ୨ ଦିନ ତଳେ ବ୍ରହ୍ମପୁର ଉନ୍ନୟନ କର୍ତ୍ତୃପକ୍ଷ (ବିଡ଼ିଏ) ଅଫିସରେ ଅସ୍ଥାୟୀ ଭାବେ ଆଞ୍ଚଳିକ ପରିବହନ ବିଭାଗ ପକ୍ଷରୁ ଗାଡି ଚାଳକଙ୍କ ଆବଶ୍ୟକ କାଗଜପତ୍ର କରିବା ଲାଗି ଏକ ଅସ୍ଥାୟୀ କ୍ୟାମ୍ପ ଖୋଲାଯାଇଛି। ନିୟମ ଅନୁସାରେ ମୋଟା ଅଙ୍କର ଜରିମାନା ଭୟରେ ଲୋକେ କାଗଜପତ୍ର ଯୋଗାଡ଼ କରିବାରେ ଲାଗିଛନ୍ତି। ଲର୍ନିଂ ଲାଇସେନ୍ସ ଓ ଲାଇସେନ୍ସ ପାଇବା ପାଇଁ ଲୋକଙ୍କ ଭିଡ଼ ଲାଗି ରହିଥିବା ଦେଖିବାକୁ ମିଳିଛି। ଗାଡି ଚାଳକଙ୍କ ପାଇଁ ହେଲ୍ମେଟ୍, ଡ୍ରାଇଭିଂ ଲାଇସେନ୍ସ, ଇନ୍ସ୍ୟୁରାନ୍ସ ଓ ପ୍ରଦୂଷଣ ସାର୍ଟିଫିକେଟ ବାଧ୍ୟତାମୂଳକ କରାଯାଇଛି। ବର୍ତ୍ତମାନ ଏହି ୩ଟି ବିଭାଗରେ ଭିଡ ଏବେ ବି ଦେଖିବାକୁ ମିଳୁଛି। ୨୦୧୯ ସେପ୍ଟେମ୍ବରରୁ ଦେଶରେ ନୂତନ ଟ୍ରାଫିକ ନିୟମ ଲାଗୁ କରାଯାଇଥିଲା। ଅଧିକାଂଶ ଲୋକେ ଏହି ସବୁ ପ୍ରମାଣପତ୍ର ରଖି ନ ଥିବାରୁ ମୋଟା ଅଙ୍କର ଟଙ୍କା ଗଣିଥିଲେ। ଫଳରେ ଏହାକୁ ନେଇ ବିଭିନ୍ନ ସମୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିଲା। ଏହାକୁ ଦୃଷ୍ଟିରେ ରଖି ସରକାର ୨ଟି ପର୍ଯ୍ୟାୟରେ ପ୍ରାୟ ୬ ମାସ ମହଲତ ଦେଇଥିଲେ। ଏହି ମହଲତ ସରିବା ପରେ ଏବେ ପୁଣି ଥରେ ନୂତନ ଟ୍ରାଫିକ ନିୟମ ଲାଗୁ ହେବାକୁ ଯାଉଛି। ନିୟମ ଲାଗୁ ହେବା ଶୁଣି ଲୋକେ ଏବେଠୁ ସତର୍କ ହୋଇଗଲେଣି। ସହରରେ ବିଭିନ୍ନ ଛକରେ ଲାଗିଥିବା ଇଣ୍ଟିଗ୍ରେଟେଡ଼ ଟ୍ରାଫିକ ମ୍ୟାନେଜମେଣ୍ଟ ସିଷ୍ଟମ (ଆଇଟିଏମଏସ) ନିୟମ ପାଳନ କରୁଛନ୍ତି।
