ଫିରିଙ୍ଗିଆ, ୫ା୨-ମଦ୍ୟପାନ କରି ବିଦ୍ୟାଳୟକୁ ଯିବା କନ୍ଧମାଳ ଜିଲା ଫିରିଙ୍ଗିଆ ବ୍ଲକ ଅଞ୍ଚଳର ଜଣେ ସହକାରୀ ଶିକ୍ଷକଙ୍କୁ ମହଙ୍ଗା ପଡ଼ିଛି। ତାଙ୍କ ବିରୋଧରେ ଆସିଥିବା ଅଭିଯୋଗର ବଳିଷ୍ଠ ପ୍ରମାଣକୁ ଭିତ୍ତିକରି ବ୍ଲକ ଶିକ୍ଷାଧିକାରୀ (ବିଇଓ) ନିଲମ୍ବିତ କରିଛନ୍ତି। ନିଲମ୍ବିତ ଶିକ୍ଷକ ହେଲେ ଶେଷଦେବ ବେହେରା ା ସଲଗୁଡା ପଞ୍ଚାୟତ ନେଡ଼ିପଦର ପ୍ରୋଜେକ୍ଟ ଉଚ୍ଚ ପ୍ରାଥମିକ ବିଦ୍ୟାଳୟରେ ସେ ଅବସ୍ଥାପିତ ଥିଲେ। ପ୍ରତିଦିନ ମଦ୍ୟପାନ କରି ବିଦ୍ୟାଳୟକୁ ଆସୁଥିବା ଓ ପିଲାଙ୍କୁ ପାଠ ନ ପଢ଼ାଇବା ନେଇ ତାଙ୍କ ନାମରେ ଅଭିଯୋଗ ରହିଥିଲା ା ସୋମବାର ମଧ୍ୟ ସହକାରୀ ଶିକ୍ଷକ ଜଣକ ନିଶାସକ୍ତ ହୋଇ ବିଦ୍ୟାଳୟରେ ହୋହଲ୍ଲା କରୁଥିଲେ ା କେହି ଜଣେ ତାଙ୍କର ଏଭଳି କାରନାମାର ଭିଡିଓ ଜିଲା ଶିକ୍ଷାଧିକାରୀ (ଡିଇଓ)ଙ୍କ ପାଖକୁ ପଠାଇଥିଲେ ା ଡିଇଓ ବିକାଶ ଚନ୍ଦ୍ର ପ୍ରଧାନ ତୁରନ୍ତ ଏହାର ତଦନ୍ତ କରିବାକୁ ବିଇଓ ବିନୋଦ ବିହାରୀ ଦିଗାଲଙ୍କୁ କହିଥିଲେ ା ବିଇଓ ଦିଗାଲ ସିଆରସିସି କୈଳାସ ଚନ୍ଦ୍ର କହଁରଙ୍କୁ ମଙ୍ଗଳବାର ଉକ୍ତ ବିଦ୍ୟାଳୟକୁ ପଠାଇଥିଲେ। ସିଆରସିସି କହଁର ତଦନ୍ତ ପାଇଁ ଯାଇଥିବା ବେଳେ ଶେଷଦେବ ମଦ୍ୟପାନ କରି ବସିଥିବା ଜାଣିବାକୁ ପାଇଥିଲେ ା ଏ ସମ୍ପର୍କରେ ପଚାରିବାରୁ ସେ ଦୁର୍ବ୍ୟବହାର ପ୍ରଦର୍ଶନ କରିଥିଲେ। ଏଥିପାଇଁ ତାଙ୍କୁ ନିଲମ୍ବନ କରାଯାଇଥିବା ବିଇଓ ଦିଗାଲ ପ୍ରକାଶ କରିଛନ୍ତି।
