ସୋନପୁର, ୨।୧୨(ନି.ପ୍ର.): ଗତ ସାଧାରଣ ନିର୍ବାଚନରେ ବ୍ୟବହୃତ ହୋଇଥିବା ବେସରକାରୀ ଗାଡିର ଭଡା ମିଳୁନି। ଗାଡି ମାଲିକ ମାନେ ବାରମ୍ବାର ଜିଲା ପ୍ରଶାସନର ଦ୍ୱାରସ୍ଥ ହୋଇଥିଲେ ହେଁ ସେମାନଙ୍କୁ ପ୍ରାୟ ୧୨ଲକ୍ଷ ଟଙ୍କାର ଭଡା ବାବଦ ପ୍ରାପ୍ୟ ମିଳି ନଥିବା ଅଭିଯୋଗ ହୋଇଛି । ତେଣୁ ସୋମବାର ଜିଲାପାଳଙ୍କ ଅଭିଯୋଗ ଶୁଣାଣି ଚାଲିଥିବା ବେଳେ ସମ୍ମୁଖରେ ଭିକ୍ଷାଥାଳ ଧରି ଗାଡି ମାଲିକମାନେ ଧାରଣାରେ ବସିଥିଲେ। ଏହା ଏକ ଭିନ୍ନ ପରିବେଶ ସୃଷ୍ଟି କରିଥିଲା। ପ୍ରକାଶ ଯେ, ଜିଲାର ପୋଲିସ ଅଧିକାରୀମାନେ ଏହି ଗାଡି ବ୍ୟବହାର କରିଥିଲେ। ଇନୋଭା, ବୋଲେରୋ, ସ୍କର୍ପିଓ, ପିକ୍ଅପ ଭ୍ୟାନ ଓ ମିନିଟ୍ରକ୍ ଆଦି ସରକାରୀଭାବେ ଭଡାରେ ୩୦ରୁ ୪୦ ଦିନ ବ୍ୟବହୃତ ହୋଇଥିବା ମାଲିକମାନେ ଦର୍ଶାଇଛନ୍ତି। ୬ ମାସ ପରେ ବି ୨୩ଜଣ ଗାଡି ମାଲିକଙ୍କୁ ଭଡା ମିଳି ନ ଥିବାରୁ ସେମାନେ ଅସୁବିଧା ଭୋଗୁଛନ୍ତି। ମାତ୍ର ନିର୍ବାଚନରେ ବ୍ୟବହାର ହୋଇଥିବା ଅନ୍ୟ ସବୁଗାଡିର ମାଲିକମାନେ ନିର୍ଦ୍ଧାରିତ ସମୟରେ ଭଡା ପାଇ ସାରିଛନ୍ତି। ସୋମବାର ଗାଡି ମାଲିକମାନେ ଜିଲାପାଳ ମୋନିଷା ବାନାର୍ଜୀଙ୍କୁ ଭେଟି ପ୍ରାପ୍ୟ ଦାବି କରିଥିଲେ। ଜିଲାପାଳ କହିଥିଲେ ଯେ, ଇତିମଧ୍ୟରେ ଜିଲା ଓ ରାଜ୍ୟ ନିର୍ବାଚନ ଅଧିକାରୀ ବଦଳିଛନ୍ତି। ପ୍ରାପ୍ୟ ପ୍ରଦାନରେ ବିଳମ୍ବ ହୋଇଛି। ଏଥିପାଇଁ ନିର୍ବାଚନ କମିଶନଙ୍କୁ ଚିଠି ଲେଖାଯାଇଛି। ଅନୁମତି ମିଳିଲେ ଟଙ୍କା ପ୍ରଦାନ କରାଯିବ ବୋଲି ଜିଲାପାଳ କହିଥିଲେ। ବରିଷ୍ଠ ଆଇନଜୀବୀ ବଳଦେବ ପ୍ରସାଦ ବେଦବାକ ଓ ପୁରୁଷୋତ୍ତମ ପାଣିଗ୍ରାହୀଙ୍କ ନେତୃତ୍ୱରେ ଗାଡି ମାଲିକ ସମ୍ବିତ ମେହେର, ସୁବ୍ରତ ପଧାନ, ପ୍ରହଲ୍ଲାଦ ପ୍ରଧାନ, ବିଭୂତି ବିଶ୍ୱାଳ, ଶଙ୍କର୍ଷଣ ବିଶି, ସୁଶାନ୍ତ ମହାକୁର, ସଞ୍ଜିବ କୁମାର ବେହେରା ଓ କୃପାସିନ୍ଧୁ ମହାପାତ୍ର ପ୍ରମୁଖ ଧାରଣାରେ ବସିଥିଲେ ।
