ନିମାପଡ଼ା, ୧୬।୬(ଡି.ଏନ୍.ଏ.): ପୁରୀ ଜିଲାରେ କରୋନା ପଜିଟିଭଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି। ଏହି ପରିପ୍ରେକ୍ଷୀରେ ମଙ୍ଗଳବାର ଜିଲାରୁ ୧୫ କରୋନା ପଜିଟିଭ ଚିହ୍ନଟ ହୋଇଛନ୍ତି। ତେବେ ପ୍ରଥମ ଥର ପାଇଁ ନିମାପଡ଼ାକୁ କରୋନା ଛୁଇଁଛି। ନିମାପଡ଼ା ବ୍ଲକରୁ ୬ ଜଣ ସଂକ୍ରମିତ ଚିହ୍ନଟ ହୋଇଛନ୍ତି। ଏମାନଙ୍କ ମଧ୍ୟରୁ ନୁଆସନ୍ଥ ଗ୍ରାମ ପଞ୍ଚାୟତର ୨ଜଣ ସୁରଟ ଫେରନ୍ତା ଚିହ୍ନଟ ହୋଇଥିବା ବେଳେ କୋଟକୋସାଙ୍ଗ ପଞ୍ଚାୟତର ଜଣେ ଯୁବତୀ ହାଇଦ୍ରାବାଦ ଫେରନ୍ତା, ଭିଲି ଗ୍ରାମ ପଞ୍ଚାୟତରେ ଜଣେ ମହିଳା ଓ ଜଣେ ଯୁବକ ମୁମ୍ବାଇ ଓ ଉତ୍ତରପ୍ରଦେଶ ଫେରନ୍ତା ରହିଛନ୍ତି। ସେହିପରି ମିଟେଇପୁର ପଞ୍ଚାୟତର ଜଣେ ଯୁବକ ମହାରାଷ୍ଟ୍ର ଫେରନ୍ତା କରୋନା ପଜିଟିଭ ଚିହ୍ନଟ ହୋଇଛନ୍ତି। ଏ ନେଇ ବିଡିଓ ମନୋଜ କୁମାର ବେହେରା ସୂଚନା ଦେଇଛନ୍ତି। ତେବେ ଚିହ୍ନଟ ସମସ୍ତ ଆକ୍ରାନ୍ତ ବିଭିନ୍ନ ଗ୍ରାମ ପଞ୍ଚାୟତର ସରକାରୀ କ୍ୱାରାଣ୍ଟାଇନ ସେଣ୍ଟରରେ ରହିଥିଲେ। ଗତ ୧୩ ତାରିଖରେ ସେମାନଙ୍କ ସ୍ବାବ୍ ନମୁତା ସଂଗ୍ରହ କରାଯାଇ ପରୀକ୍ଷା ପାଇଁ ପଠାଯାଇଥିଲା। ରିପୋର୍ଟ ଆସିବା ପରେ ସେମାନେ ପଜିଟିଭ ଥିବା ଜଣାପଡ଼ିଛି। ଏହାପରେ ଚିକିତ୍ସା ପାଇଁ ସମସ୍ତଙ୍କୁ ଭୁବନେଶ୍ୱର କିମ୍ସ କୋଭିଡ ହସ୍ପିଟାଲକୁ ପଠାଯାଇଛି। ନିମାପଡ଼ାରେ ପ୍ରଥମ ଥର ପାଇଁ କରୋନା ପଜିଟିଭ ଚିହ୍ନଟ ହେବା ପରେ ଅଞ୍ଚଳବାସୀ ଆତଙ୍କିତ ହୋଇପଡ଼ିଛନ୍ତି।
