ମୁମ୍ବାଇ: ବଲିଉଡ୍ ଅଭିନେତା ନଓ୍ବାଜୁଦ୍ଦିନ ସିଦ୍ଦିକିଙ୍କୁ ତାଙ୍କ ସ୍ତ୍ରୀ ଆଲିଆ ସିଦ୍ଦିକି ଛାଡ଼ପତ୍ର ନୋଟିସ୍ ପଠାଇଛନ୍ତି। ବିବାହର ୧୦ବର୍ଷ ପରେ ସେ ତାଙ୍କ ସ୍ବାମୀଙ୍କୁ ଛାଡ଼ପତ୍ର ଦେବାକୁ ନିଷ୍ପତ୍ତି ନେଇଛନ୍ତି। ଏଥିପାଇଁ ସେ ହ୍ବାଟ୍ସଆପ ଜରିଆରେ ନଓ୍ବାଜ୍ଙ୍କ ପାଖକୁ ଆଇନଗତ ନୋଟିସ୍ ପଠାଇଛନ୍ତି। ଆଲିଆଙ୍କ ଆଡ୍ଭୋକେଟ୍ ଅଭୟ ସାହି ପ୍ରତିକ୍ରିୟା ଦେଇ କହିଛନ୍ତି, ଲକ୍ଡାଉନ୍ ଯୋଗୁ ଦେଶର ସମସ୍ତ ଡାକଘର ବନ୍ଦ ରହିଛି। ଫଳରେ ସ୍ପିଡ୍ପୋଷ୍ଟରେ ନୋଟିସ୍ ପଠାଯାଇ ପାରିବନାହିଁ। ସେଥିଲାଗି ହ୍ବାଟ୍ସ ଆପ୍ ଏବଂ ଇମେଲ୍ ମାଧ୍ୟମରେ ତାଙ୍କୁ ଛାଡ଼ପତ୍ର ନୋଟିସ୍ ପଠାଯାଇଛି। ଏହି ଦମ୍ପତ୍ତି ଦୀର୍ଘଦିନ ଧରି ପରସ୍ପରଠାରୁ ଅଲଗା ରହିଆସୁଥିଲେ। ନଓ୍ବାଜ୍ଙ୍କ ପିଲାମାନେ ତାଙ୍କ ସ୍ତ୍ରୀଙ୍କ ପାଖରେ ରୁହନ୍ତି। ନଓ୍ବାଜ୍ଙ୍କ ବିରୋଧରେ ଆଲିଆ ଅନେକ ଗୁରୁତର ଅଭିଯୋଗ କରିଛନ୍ତି। ସେ କହିଛନ୍ତି, ଆମର ସମ୍ପର୍କ କେବେ ବି ଭଲ ନ ଥିଲା। ଆମ ସମ୍ପର୍କରେ ସବୁବେଳେ ଟେନ୍ସନ୍ ଥିଲା। ମୁଁ ମୋ ସମ୍ପର୍କକୁ ବଞ୍ଚାଇବାକୁ ବହୁତ ଚେଷ୍ଟା କଲି, କିନ୍ତୁ ଶେଷରେ ମୁଁ ହାର୍ ମାନିଯାଇଛି। ଲକ୍ଡାଉନ୍ରେ ମୁଁ ଆମ ସମ୍ପର୍କ ବିଷୟରେ ବହୁତ ଭାବିଲା ପରେ ଛାଡ଼ପତ୍ର ନିଷ୍ପତ୍ତି ନେଇଛି ବୋଲି ଆଲିୟା କହିଛନ୍ତି।
