ନୂଆଦିଲ୍ଲୀ, ୧୯।୪(ପି.ଟି.)- ଜଣେ ଅଧିନାୟକଭାବେ ମହେନ୍ଦ୍ର ସିଂ ଧୋନୀ ଏକଦା ବିରାଟ କୋହଲିଙ୍କ ପ୍ରତି ଦୃଢ଼ ସମର୍ଥନ ଜଣାଇଥିଲେ। ଏହାକୁ ବିରାଟ ଭୁଲନ୍ତେ ବା କିପରି। ଏବେ ତାଙ୍କ ସମୟ ଆସିଛି। କୌଣସି ସମାଲୋଚନାକୁ ଖାତିର ନ କରି ସେ ଧୋନୀଙ୍କ ପ୍ରତି ନିଜର ପୂର୍ଣ୍ଣ ସମର୍ଥନ ଜଣାଇଛନ୍ତି। ଇଂଲଣ୍ଡରେ ହେବାକୁଥିବା ଆଇସିସି ବିଶ୍ୱକପ ପାଇଁ ଘୋଷିତ ୧୫ ଜଣିଆ ଦଳ କମ୍ବିନେଶନରେ ସନ୍ତୋଷ ପ୍ରକାଶ କରିଛନ୍ତି କୋହଲି। ”ଭାରତୀୟ ଦଳକୁ ନେଇ କେତେକ ଅସନ୍ତୋଷ ପ୍ରକାଶ କରିବା ଦୁଃଖଦାୟକ। ମୋ ପାଇଁ ନିଷ୍ଠା ଓ ଆନୁଗତ୍ୟର ମହତ୍ତ୍ୱ ଅନେକ“ ବୋଲି ବିରାଟ କହିଛନ୍ତି। ମୁଁ ଅନ୍ତର୍ଜାତୀୟ କ୍ୟାରିୟର ଆରମ୍ଭ କରିବା ସମୟରେ କିଛି ଗେମ୍ ପରେ ସେ ଅନ୍ୟ କାହାକୁ ପରୀକ୍ଷା କରିବାର ବିକଳ୍ପ ଥିଲା। ମାତ୍ର ମୁଁ ସୁଯୋଗର ସଦ୍ବ୍ୟବହାର କରିଥିଲି। ମାତ୍ର ମୋ ପାଇଁ ସେପରି ସମର୍ଥନ ଜଣାଇବା ବାସ୍ତବିକ କଷ୍ଟକର। ଧୋନୀ ମୋତେ ୩ ନମ୍ବର ସ୍ଥାନରେ ବ୍ୟାଟିଂ ସୁଯୋଗ ଦେଇଥିଲେ, କାରଣ ସେହି ସ୍ଥାନରେ ଖେଳିବାକୁ ଅଧିକ ଯୁବ ଖେଳାଳି ନ ଥିଲେ ବୋଲି ନିଜ ସମୟକୁ ମନେ ପକାଇ ପ୍ରକାଶ କରିଛନ୍ତି କୋହଲି।
କେବଳ ପଡ଼ିଆ ସଜ୍ଜା ଏବଂ ବୋଲିଂରେ ପରିବର୍ତ୍ତନକୁ ନେଇ ଆମେ ଆଲୋଚନା କରିଥାଉ ଏବଂ ପରସ୍ପର ମତକୁ ସମ୍ମାନ ଦେଇଥାଉ। ମ୍ୟାଚ ପରିସ୍ଥିତିକୁ ପଢ଼ିବାରେ ଧୋନୀଙ୍କଠାରୁ ବଡ଼ ମାହିର ଖେଳାଳି ଆଉ କେହି ନାହାନ୍ତି ବୋଲି ବିରାଟ କହିଛନ୍ତି। ”ସେ ଏକମାତ୍ର ବ୍ୟକ୍ତି ଯିଏକି ଗେମ୍ର ଅର୍ଥକୁ ଭଲଭାବେ ଜାଣିଛନ୍ତି। ପଡ଼ିଆରେ ପ୍ରଥମ ବଲ୍ରୁ ୩୦୦ ବଲ୍ (୫୦ ଓଭର) ପର୍ଯ୍ୟନ୍ତ ସେ ଗେମ୍କୁ ଭଲଭାବେ ବୁଝି ପାରନ୍ତି। ତାଙ୍କଭଳି ଜଣେ ମନୋଭାବ ସମ୍ପନ୍ନ ଖେଳାଳିଙ୍କୁ ଉଇକେଟ ପଛରେ ପାଇ ମୁଁ ଭାଗ୍ୟବାନ“ ବୋଲି କୋହଲି କହିଛନ୍ତି। ଧୋନୀ, କୋଚ୍ ରବି ଶାସ୍ତ୍ରୀ ଓ ଉପ ଅଧିନାୟକ ରୋହିତ ଶର୍ମାଙ୍କ ସହ ମିଶି ସେ ରଣନୀତି ପ୍ରସ୍ତୁତ କରିବାକୁ ଚାହିଁବେ ବୋଲି ସୂଚନା ଦେଇଛନ୍ତି। ଭାରତୀୟ ଦଳର ଚୟନ ହୋଇଥିବା ୧୫ ଖେଳାଳିଙ୍କୁ ନେଇ ମୁଁ ଖୁସି। ଏହା ଏକ ସନ୍ତୁଳିତ ଦଳ। ଏହାକୁ ନେଇ ସେ ରିଷଭ ପନ୍ତ ଓ ଅମ୍ବାତି ରାୟୁଡ଼ୁଙ୍କୁ ନେଇ ହେଉଥିବା ବିତର୍କ ଭିତରେ ପଶିବାକୁ ଚାହିଁନାହାନ୍ତି।
