ଲଣ୍ଡନ,୧୯ା୭(ପିଟି)- ଅନ୍ତର୍ଜାତୀୟ ମ୍ୟାଚ୍ରେ ଧିମା ବୋଲିଂ ହାର ଯୋଗୁ ଦଳର ଅଧିନାୟକଙ୍କୁ ଆଉ ସସ୍ପେଣ୍ଡ କରାଯିବ ନାହିଁ। ଏ ନେଇ ଆଇସିସି ନିଷ୍ପତ୍ତି ନେଇଛି। ଏଭଳି ନିୟମ ଭଙ୍ଗ କରିବା ଲାଗି ମ୍ୟାଚ୍ ବିଜେତାଙ୍କୁ ମିଳିବାକୁ ଥିବା ପଏଣ୍ଟ ଆଉ ମିଳିବ ନାହିଁ ଓ ପୂରା ଦଳକୁ ଜରିମାନା କରାଯିବ। ଏହି ନିୟମ ବିଶ୍ୱ ଟେଷ୍ଟ ଚାମ୍ପିୟନଶିପଠାରୁ କାର୍ଯ୍ୟକାରୀ ହେବ। ଆଇସିସି କ୍ରିକେଟ କମିଟି ଦ୍ୱାରା କରାଯାଇଥିବା ସୁପାରିସକୁ ମଞ୍ଜୁରୀ ମିଳିସାରିଛି। ବିଶ୍ୱ ଟେଷ୍ଟ ଚାମ୍ପିୟନଶିପ ଆସନ୍ତା ୧ ତାରିଖରୁ ଆଶେସ ସିରିଜ୍ ସହ ଆରମ୍ଭ ହେବ। ଏହା ୨୦୨୧ ପର୍ଯ୍ୟନ୍ତ ଚାଲିବ। ବିଶ୍ୱ ଟେଷ୍ଟ ଚାମ୍ପିୟନଶିପ ମ୍ୟାଚ୍ରେ କୌଣସି ଦଳ ଧାର୍ଯ୍ୟ ସମୟରେ ଓଭର ଶେଷ ନ କରିପାରିଲେ, ବଳକା ଥିବା ପ୍ରତ୍ୟେକ ଓଭର ପିଛା ପ୍ରତିଯୋଗିତାର ୨ ପଏଣ୍ଟ କାଟ୍ କରାଯିବ। ବାରମ୍ବାର ଧିମା ବୋଲିଂ ହାର ଯୋଗୁ ଆଉ ଅଧିନାୟକଙ୍କୁ ସସ୍ପଣ୍ଡେ କରାଯିବ ନାହିଁ। ଦଳର ପ୍ରତ୍ୟେକ ଖେଳାଳିଙ୍କୁ ଦାୟୀ କରାଯାଇ ସମାନ ଜରିମାନା କରାଯିବ ବୋଲି ଆଇସିସି ପକ୍ଷରୁ କୁହାଯାଇଛି। ପୂର୍ବ ନିୟମ ଅନୁଯାୟୀ, ଗୋଟିଏ ଦଳ ଦୁଇ ଥର ଧାର୍ଯ୍ୟ ସମୟରେ ଆବଶ୍ୟକ ଓଭର ବୋଲିଂ ନ କରିପାରିଲେ, ଉକ୍ତ ଅଧିନାୟକଙ୍କୁ ଗୋଟିଏ ମ୍ୟାଚ୍ରୁ ବାସନ୍ଦ କରାଯାଉଥିଲା।
