ନୂଆଦିଲ୍ଲୀ,୯-୧: ବୁଧବାର ଦେଶବ୍ୟାପୀ ଧର୍ମଘଟ ଯୋଗୁ ବ୍ୟାଙ୍କିଙ୍ଗ ସେବା ପ୍ରଭାବିତ ହୋଇଛି। ସରକାରଙ୍କ ବିଭିନ୍ନ ଜନ ବିରୋଧି ନିଷ୍ପତ୍ତିକୁ ବିରୋଧ କରି ଦେଶର ୧୦ କେନ୍ଦ୍ରୀୟ ଶ୍ରମିକ ସଙ୍ଗଠନ ଧର୍ମଘଟକୁ ଓହ୍ଲାଇଥିଲେ। ବନ୍ଦ ଯୋଗୁ ବ୍ୟାଙ୍କ ଶାଖାଗୁଡିକରେ ଟଙ୍କା ଉଠାଣ, ଜମା ପ୍ରଭାବିତ ହୋଇଛି। ବ୍ୟାଙ୍କ ଶାଖାରେ ପିକେଟିଂ କରି ଏହାକୁ ବନ୍ଦ କରାଯାଇଥିଲା। ଏହା ଯୋଗୁ ଦେଶର ବିଭିନ୍ନ ସ୍ଥାନରେ ବ୍ୟାଙ୍କିଙ୍ଗ କାରବାର ପ୍ରଭାବିତ ହୋଇଥିବା ଜଣାପଡିଛି। ବ୍ୟାଙ୍କଗୁଡିକ କାରବାର ପ୍ରଭାବିତ ହେବା ନେଇ ପୂର୍ବରୁ ଗ୍ରାହକଙ୍କୁ ସୂଚାଇ ଦେଇଥିଲେ। ଧର୍ମଘଟରେ ଅଲ ଇଣ୍ଡିଆ ବ୍ୟାଙ୍କ ଏମ୍ପ୍ଲଇଜ୍ ଆସୋସିଏଶନ(ଏଆଇବିଇଏ), ଅଲ୍ ଇଣ୍ଡିଆ ବ୍ୟାଙ୍କ ଅଫିସର୍ସ ଆସୋସିଏଶନ(ଏଆଇବିଓଏ), ବିଇଏଫ୍ଆଇ, ଆଇଏନ୍ବିଇଏଫ୍, ଆଇଏନ୍ବିଓସି, ବ୍ୟାଙ୍କ କର୍ମଚାରୀ ସେନା ମହାସଂଘ(ବିକେଏସ୍ଏମ୍) ଭଳି ସଂଘ ଯୋଗ ଦେଇଥିଲେ। ଜମା, ଉଠାଣ, ଚେକ୍ କ୍ଲିୟରାନ୍ସ, ଇନଷ୍ଟ୍ରୁମେଣ୍ଟ କ୍ଲିୟରାନ୍ସରେ ବାଧା ଉପୁଜିଥିଲା। ଏଭଳି ସ୍ଥିତିରେ ଘରୋଇ ବ୍ୟାଙ୍କ ସେବାରେ ବିଶେଷ ପ୍ରଭାବ ପଡି ନ ଥିବା ଜଣାପଡିଛି।
୧୦ ଶ୍ରମିକ ସଙ୍ଗଠନର ଏହି ଧର୍ମଘଟକୁ ବ୍ୟାଙ୍କ କର୍ମଚାରୀମାନେ ସମର୍ଥନ ଦେଇଥିବା ଏଆଇବିଇଏର ସାଧାରଣ ସମ୍ପାଦକ ସି.ଏଚ୍. ଭେଙ୍କଟଚଳମ ସୂଚନା ଦେଇଛନ୍ତି। ବ୍ୟାଙ୍କ ମିଶ୍ରଣ, ଘରୋଇକରଣ, ଫି ବୃଦ୍ଧି ସମେତ ବେତନ ସଂକ୍ରାନ୍ତ ବିଭିନ୍ନ ପ୍ରସଙ୍ଗ ଆଧାରରେ ସରକାରଙ୍କ ନୀତିକୁ ବିରୋଧ କରାଯାଇଥିବା ସେ ସ୍ପଷ୍ଟ କରିଛନ୍ତି। ଅଲ୍ ଇଣ୍ଡିଆ ରିଜର୍ଭ ବ୍ୟାଙ୍କ ଏମ୍ପ୍ଲଇ ଆସୋସିଏଶନ(ଏଆଇଆର୍ବିଇଏ), ଅଲ୍ ଇଣ୍ଡିଆ ରିଜର୍ଭ ବ୍ୟାଙ୍କ ଓ୍ବାକର୍ସ ଫେଡେରେଶନ(ଏଆଇଆର୍ବିଡ୍ଲ୍ୟୁଏଫ୍) ଏବଂ ବୀମା ସଂଘଗୁଡିକ ଧର୍ମଘଟକୁ ସମର୍ଥନ ଦେଇଥିବା ଜଣାପଡିଛି।
ଆଇଏନ୍ଟିୟୁସି, ଏଆଇଟିୟୁସି, ଏଚ୍ଏମ୍ଏସ୍, ସିଆଇଟିୟୁ, ଏଆଇଟିୟୁସି, ଟିୟୁସିସି, ଏସ୍ଇଡବ୍ଳ୍ୟୁଏ, ଏଆଇସିଟିୟୁ, ଏଲ୍ପିଏଫ୍, ୟୁଟିୟୁସି ଭଳି ଶ୍ରମିକ ସଙ୍ଗଠନ ଧର୍ମଘଟରେ ସାମିଲ ହୋଇଥିଲେ। ଏହାବାଦ ବିଭିନ୍ନ କ୍ଷେତ୍ରରେ ସ୍ବାଧୀନ ମହାସଂଘ, ସଙ୍ଗଠନ ମଧ୍ୟ ଏଥିରେ ଯୋଗ ଦେଇଥିଲେ। ସାରା ଦେଶରେ ପ୍ରାୟ ୨୫ କୋଟି ଲୋକ ସାମିଲ ହୋଇଥିବା ନେଇ ଶ୍ରମିକ ସଂଘଠନଗୁଡିକ ପକ୍ଷରୁ ବୁଧବାର କୁହାଯାଇଛି। ଚଳିତ ବର୍ଷ ଜାନୁୟାରୀରେ ଶ୍ରମ ମନ୍ତ୍ରଣାଳୟ ପକ୍ଷରୁ ଅନୁଷ୍ଠିତ ହୋଇଥିବା ବୈଠକରେ ସରକାର ଶ୍ରମିକମାନଙ୍କର ଦାବିକୁ ପୂରଣ କରିବାରେ ଅକ୍ଷମତା ପ୍ରକାଶ କରିଛନ୍ତି। ସରକାର ଦାବି ଶୁଣିବାକୁ ଅଗ୍ରାହ୍ୟ କରିଦେଉଛନ୍ତି। ବିଭିନ୍ନ ଅସୁବିଧା ଆଧାରରେ ଶ୍ରମିକ ବିରୋଧୀ, ଲୋକ ବିରୋଧୀ, ଜାତୀୟତା ବିରୋଧୀ ନୀତିକୁ ବିରୋଧ କରି ଧର୍ମଘଟ କରାଯାଇଥିବା ସଂଘଗୁଡିକ ପକ୍ଷରୁ କୁହାଯାଇଛି।
