ଲକ୍ଷ୍ନୌ,୨୮।୪: ଉତ୍ତରପ୍ରଦେଶ ଗାଜିଆବାଦ୍ରେ ଘଟିଛି ଏକ ଅଭାବନୀୟ ଘଟଣା। ଏଠାରେ ଦ୍ୱିତୀୟ ବିବାହ କରୁଥିବା ଜଣେ ଯୁବକଙ୍କୁ ବେଦୀରେ ଚପଲରେ ପିଟିଛନ୍ତି ତାଙ୍କ ପ୍ରଥମ ସ୍ତ୍ରୀ। ନୀତିନ ବର୍ମା ନାମକ ଜଣେ ଯୁବକ ସ୍ଥାନୀୟ ସିହାଣି ଗେଟ୍ ଥାନା ଅଞ୍ଚଳରେ ବିବାହ କରିବାକୁ ଆସିଥିବାବେଳେ ଏହା ଘଟିଥିଲା। ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ପ୍ରଥମ ସ୍ତ୍ରୀଙ୍କ ପ୍ରମାଣ ଆଧାରରେ ବିବାହ ଉତ୍ସବକୁ ବନ୍ଦ କରିବାକୁ ନିର୍ଦ୍ଦେଶ ଦେଇଥିଲେ। ମିରଠ ବ୍ରହ୍ମପୁରୀ ଅଞ୍ଚଳରେ ରହୁଥିବା ସୋନିଆଙ୍କ ସହିତ ୪ ବର୍ଷ ତଳେ ନୀତିନଙ୍କର ବିବାହ ହୋଇଥିଲା। ତେବେ ଦୁଇଜଣଙ୍କ ମଧ୍ୟରେ ଲଗାତାର ଗଣ୍ଡଗୋଳ ଲାଗି ରହିଥିଲା। ଏନେଇ ସୋନିଆ ସ୍ଥାନୀୟ ଥାନାରେ ମଧ୍ୟ ମାମଲା ଦାଏର କରିଥିଲେ। ପୋଲିସ ଅଭିଯୁକ୍ତ ନୀତିନଙ୍କୁ ଗିରଫ କରି ତଦନ୍ତ ଜାରି ରଖିଛି।
