ଛତ୍ରପୁର, ୨୭।୪(ଡି.ଏନ୍.ଏ.): ଗଞ୍ଜାମ ଜିଲାର ସବୁ ଘରୋଇ ଔଷଧ ଦୋକାନୀ ସେମାନଙ୍କ ଦୋକାନରୁ ଔଷଧ କିଣୁଥିବା ଲୋକଙ୍କ ତଥ୍ୟ ଦୈନିକ ଡ୍ରଗ ଇନ୍ସପେକ୍ଟରଙ୍କୁ ଦେବା ବାଧ୍ୟତାମୂଳକ ରହିଛି। ତେବେ ଗତ ତିନିଦିନରେ ଜିଲାର ୪୮୮ ଦୋକାନରୁ ୭ ହଜାର ୭୪୨ ଜଣ ଔଷଧ କିଣିଥିଲେ। ତେବେ ରିପୋର୍ଟ ଅନୁଯାୟୀ, ୮୧ ଜଣଙ୍କ ଠାରେ କୋଭିଡ ଲକ୍ଷଣ ରହିଛି। ସେମାନଙ୍କ ସ୍ବାବ୍ ଟେଷ୍ଟ ପରେ ୧୬ ଜଣଙ୍କଠାରେ ଶ୍ୱାସକ୍ରିୟା ଜନିତ ସମସ୍ୟା ଓ ୬୫ ଜଣଙ୍କ ଠାରେ ଫ୍ଲୁ ରହିଥିବା ସ୍ପଷ୍ଟ ଜଣାପଡ଼ିଛି।
କରୋନା ସଂକ୍ରମଣକୁ ପ୍ରତିହତ କରିବା ପରିପ୍ରେକ୍ଷୀରେ ଏହି ସର୍ଭେ ଚାଲିଛି। ରୋଗୀ ପାଇଁ କେଉଁ ସମ୍ପର୍କୀୟ କିମ୍ବା ରୋଗୀ ନିଜେ କି ଔଷଧ କିଣୁଛନ୍ତି, କେଉଁ ରୋଗ ଅଛି, କିଣିଥିବା ବ୍ୟକ୍ତିଙ୍କ ନାମ ଓ ସମ୍ପୂର୍ଣ୍ଣ ଠିକଣା ଦୋକାନୀ ମାନେ ପାଇଥିଲେ।
