ଛେଣ୍ଡିପଦା,୨୫।୬(ସ୍ବ.ପ୍ର) ଅନୁଗୋଳ ଜିଲା ଛେଣ୍ଡିପଦା ସଦରମହକୁମାରେ ଥିବା ଦୁଗ୍ଧ ଶୀତଳୀକରଣ କେନ୍ଦ୍ରରେ ଚାଷୀମାନେ ଠକେଇର ଶିକାର ହେବା ସହ ସେମାନଙ୍କୁ ଠିକ୍ ସମୟରେ କ୍ଷୀର ବାବଦ ଟଙ୍କା ମିଳୁ ନ ଥିବା ଅଭିଯୋଗ ହୋଇଥିଲା। ସୋମବାର ଏହାକୁ କେନ୍ଦ୍ର କରି ଦୁଗ୍ଧ ଚାଷୀଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଥିଲା। ଅନିୟମିତତାର ତଦନ୍ତ ଓ ବକେୟା ଟଙ୍କା ପ୍ରଦାନ ଦାବିରେ ଚାଷୀମାନେ ଶୀତଳୀକରଣ କେନ୍ଦ୍ର ଅଧିକାରୀଙ୍କୁ ଘେରାଉ କରିଥିଲେ।
ଚାଷୀଙ୍କ ଅଭିଯୋଗ ମୁତାବକ, ଉକ୍ତ ଦୁଗ୍ଧ ଶୀତଳୀକରଣ କେନ୍ଦ୍ର ଉପରେ ୧୨ଟି ସମବାୟ ସମିତିର ଚାଷୀ ନିର୍ଭର କରୁଛନ୍ତି। ପ୍ରତିଦିନ ଚାଷୀମାନଙ୍କ ଦ୍ୱାରା ଉତ୍ପାଦିତ କ୍ଷୀର କେନ୍ଦ୍ରକୁ ଆସିଥାଏ। ଦୁଗ୍ଧ ଶୀତଳୀକରଣ ତଥା ଓମ୍ଫେଡ କର୍ତ୍ତୃପକ୍ଷ ପ୍ରତି ୧୦ ଦିନରେ ଚାଷୀମାନଙ୍କ ଅର୍ଥରାଶିକୁ ସମିତି ମାଧ୍ୟମରେ ଓମ୍ଫେଡ କର୍ତ୍ତୃପକ୍ଷ ସମିତିର ବ୍ୟାଙ୍କ ଖାତାକୁ ଦେଇଥାନ୍ତି। ହେଲେ ୫ମାସରୁ ଊର୍ଦ୍ଧ୍ୱ ହେଲା ଶୀତଳୀକରଣ କେନ୍ଦ୍ରରେ ସମିତିର ୨ଲକ୍ଷରୁ ଊର୍ଦ୍ଧ୍ୱ ଟଙ୍କା ବକେୟା ରହିବା ସହିତ ଚାଷୀଙ୍କୁ ଔଷଧ ନ ଦେଇ ସେ ବାବଦରେ ସେମାନଙ୍କ ଖାତାରୁ ଟଙ୍କା କାଟି ଦିଆଯାଉଛି। ଏହା ପ୍ରତିବାଦରେ ବହୁ ଚାଷୀ କେନ୍ଦ୍ର ଅଧିକାରୀ ଯତୀନ କୁମାର ମିଶ୍ରଙ୍କୁ ଘେରାଉ କରିଥିଲେ। ବକେୟା ଟଙ୍କା ନ ମିଳିବା ପର୍ଯ୍ୟନ୍ତ ଅଧିକାରୀଙ୍କୁ ଛାଡ଼ିବେ ନାହିଁ ବୋଲି ଅଡ଼ି ବସିଥିଲେ। ଆଗାମୀ ଦିନରେ ଚାଷୀଙ୍କୁ ପ୍ରତି ୧୦ଦିନରେ ବକେୟା ଅର୍ଥ ଦିଆଯିବା ସହ ଚାଷୀଙ୍କ ଔଷଧ ବକେୟା ଟଙ୍କା ୧ ସପ୍ତାହ ମଧ୍ୟରେ ପ୍ରଦାନ କରାଯିବ ବୋଲି ମିଶ୍ର ପ୍ରତିଶ୍ରୁତି ଦେବାପରେ ଚାଷୀମାନେ ଆନ୍ଦୋଳନରୁ ଓହରିଥିଲେ।
