ଅହମଦାବାଦ, ୧୪।୬: ଦିନରେ ୨ଟି ଆସ୍ପ୍ରିନ୍ ଔଷଧ ସେବନ କରୁଥିବା ବ୍ୟକ୍ତିଙ୍କ କ୍ଷେତ୍ରରେ କ୍ୟାନସର ହେବାର ଆଶଙ୍କା ଯଥେଷ୍ଟ କମ୍ ହୋଇଥାଏ ବୋଲି ଏକ ଗବେଷଣା ରିପୋର୍ଟରେ ଉଲ୍ଲେଖ କରାଯାଇଛି। ଶରୀରରେ ଯନ୍ତ୍ରଣା, ଜଳାପୋଡ଼ା ଅବା ଜ୍ୱରରୁ ମୁକ୍ତି ପାଇଁ ପ୍ରାୟତଃ ଏହାର ବ୍ୟବହାର କରାଯାଇଥାଏ। ତେବେ ଏହା ଅନ୍ତଃନଳୀ କ୍ୟାନସର, ଗର୍ଭାଶୟ କ୍ୟାନସର, କ୍ଷୁଦ୍ରାନ୍ତ୍ର ଏବଂ ବୃହଦାନ୍ତ୍ର ଆଦି କ୍ୟାନସର ଆଶଙ୍କା କମ୍ କରିଥାଏ ବୋଲି ମେଡିକାଲ ପତ୍ରିକା ଲାନ୍ସେଣ୍ଟ୍ରେ ଏକ ରିପୋର୍ଟ ପ୍ରକାଶ ପାଇଛି। ଆସ୍ପ୍ରିନ୍ କ୍ୟାନସରକୁ କିପରି ଦୂରେଇ ରଖୁଛି ସେନେଇ ଅହମଦାବାଦର ଡାକ୍ତର ହର୍ଷ ସେଠ୍, ବ୍ରିଟେନ୍ର ଡାକ୍ତର ପ୍ରଫସେର ଟିମୋଥି ବିଶପ୍ ଏବଂ ପ୍ରଫେସର ସାର୍ ଜନ୍ ବୁର୍ନଙ୍କ ଦ୍ୱାରା ଅଧ୍ୟୟନ କରାଯାଇଥିଲା। ୨ରୁ ଅଢ଼େଇ ବର୍ଷ ଏଭଳି କରୁଥିବା ୫୦ରୁ ୭୦ ବର୍ଷ ବୟସ୍କଙ୍କ ଲୋକଙ୍କ କ୍ଷେତ୍ରରେ କ୍ୟାନସର ଆଶଙ୍କା କମିଯାଇଥାଏ ବୋଲି ରିପୋର୍ଟରେ ଦର୍ଶାଯାଇଛି। ଗବେଷକ ୪୨୭ଜଣ ଲୋକଙ୍କୁ ଆସ୍ପ୍ରିନ୍ ଏବଂ ୪୩୪ ଲୋକଙ୍କୁ ଅନ୍ୟ ଔଷଧ ସେବନ କରିବାକୁ ଦେଇଥିଲେ। ଆସ୍ପ୍ରିନ୍ ସେବନ କରୁଥିବା ଲୋକଙ୍କଠାରେ ଅନ୍ତଃନଳୀ କ୍ୟାନସର, ଗର୍ଭାଶୟ କ୍ୟାନସର, କ୍ଷୁଦ୍ରାନ୍ତ୍ର ଏବଂ ବୃହଦାନ୍ତ୍ର ଆଦି କ୍ୟାନସର ଆଶଙ୍କା କମି ଯାଇଥିବା ରିପୋର୍ଟରେ ପ୍ରକାଶ ପାଇଛି।
