ତାଳଚେର,୧୯ା୧(ନି.ପ୍ର.) – ତାଳଚେର ପୌରାଞ୍ଚଳ ଦେଉଳବେଡା ତେଲିସାହିରେ ମାଟି ଦବିବା ଘଟଣାକୁ ନେଇ ହୋଇଥିବା ଦ୍ୱିପାକ୍ଷିକ ନିଷ୍ପତ୍ତି କାର୍ଯ୍ୟକାରୀ ନ ହେବା ପ୍ରତିବାଦରେ ଶନିବାର କ୍ଷତିଗ୍ରସ୍ତ ଗ୍ରାମବାସୀ ଓ ଯୁବ ସମାଜ ପକ୍ଷରୁ ସ୍ଥାନୀୟ ଉପଜିଲାପାଳଙ୍କୁ ସ୍ମାରକପତ୍ର ପ୍ରଦାନ କରାଯାଇଛି। ଉକ୍ତ ଦାବିପତ୍ରରେ ଉଲ୍ଲେଖ କରାଯାଇଛି ଯେ, ୧୫ ତାରିଖରେ ଗ୍ରାମର ଜଣଙ୍କ ଚାଷ ଜମି ଦବିଯିବା ପରେ କ୍ଷତିପୂରଣ ପାଇଁ ଗ୍ରାମବାସୀ ଓ ଯୁବ ସମାଜ ତରଫରୁ ଆନ୍ଦୋଳନ ହୋଇଥିଲା। ଖବରପାଇ ତହସିଲଦାର, ଉପଖଣ୍ଡ ଆରକ୍ଷୀ ଅଧୀକ୍ଷକ, ଏମ୍ସିଏଲ୍ ସିଏମ୍ଡି ଓ ସମସ୍ତ କ୍ଷେତ୍ରର ମହାପ୍ରବନ୍ଧକ ଘଟଣାସ୍ଥଳକୁ ଆସି ସତ୍ୟାସତ୍ୟ ଅନୁସନ୍ଧାନ କରିଥିଲେ। ପରେ ଏମ୍ସିଏଲ୍ ସିଏମ୍ଡିଙ୍କ ଅନୁରୋଧକ୍ରମେ ଏକ ତ୍ରିପାକ୍ଷିକ ବୈଠକ ବସିଥିଲା। ୨୪ଘଣ୍ଟା ମଧ୍ୟରେ ସମସ୍ତ ଦାବି ପୂରଣ ସହ କ୍ଷତିପୂରଣ ଦେବା ପାଇଁ ଏମ୍ସିଏଲ୍ କର୍ତ୍ତୃପକ୍ଷ ରାଜି ହୋଇଥିଲେ। କିନ୍ତୁ ୪ ଦିନ ବିତିଯାଇଥିଲେ ମଧ୍ୟ କର୍ତ୍ତୃପକ୍ଷ ପ୍ରତିଶ୍ରୁତି ପାଳନ କରିନାହାନ୍ତି। ଆସନ୍ତା ୨୦ ତାରିଖ ମଧ୍ୟରେ ଦାବି ପୂରଣ ନ ହେଲେ ୨୧ତାରିଖଠାରୁ ଖଣି ବନ୍ଦ କରାଯିବ ବୋଲି କ୍ଷତିଗ୍ରସ୍ତ ଗ୍ରାମବାସୀ ଓ ଯୁବ ସମାଜ ପକ୍ଷରୁ ଚେତାବନୀ ଦିଆଯାଇଛି। ଦାବିପତ୍ର ପ୍ରଦାନ ବେଳେ ତୁଷାର କୁମାର ସାହୁ, ବିଘ୍ନେଶ୍ୱର ସାହୁ, ଜିତେନ୍ଦ୍ର ସାହୁ, ସୁମନ୍ତ ସାହୁ, ପ୍ରଦୀପ ଶତପଥୀ, ସୁବ୍ରତ ସାହୁ, ଦୀପୁ ସାହୁ ପ୍ରମୁଖ ଉପସ୍ଥିତ ଥିଲେ।
