ଲକ୍ଷ୍ନୌ,୧୧।୭: ଉତ୍ତର ପ୍ରଦେଶ ବରେଲିର ଜଣେ ବିଧାୟକଙ୍କ ଝିଅ ଦଳିତ ଯୁବକଙ୍କୁ ବିବାହ କରିବାର ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଉକ୍ତ ଭିଡିଓରେ ଉଭୟ ସୁରକ୍ଷା ପାଇଁ ନିବେଦନ କରୁଥିବା ଦେଖିବାକୁ ମିଳିଛି। ସୂଚନା ଅନୁଯାୟୀ, ଝିଅ ଜଣଙ୍କ ବରେଲିର ବିଧାୟକ ରାଜେଶ ମିଶ୍ରଙ୍କ ଝିଅ ସାକ୍ଷୀ ମିଶ୍ର(୨୩) ହୋଇଥିବା ବେଳେ ପୁଅ ଜଣଙ୍କ ହେଉଛନ୍ତି ଅଜିତେଶ କୁମାର ଯେ କି ଏକ ଦଳିତ ପରିବାରର। ତେଣୁ ବିଧାୟକଙ୍କ ପରିବାର ଲୋକେ ଏହି ବିବାହକୁ ଗ୍ରହଣ କରି ପାରୁ ନାହାଁନ୍ତି। ଏମିତିକି ସେ ଘରୁ ଚାଲିଯାଇ ଯେଉଁଠି ବିବାହ କରିଛନ୍ତି ସେଠାକୁ ମଧ୍ୟ ବିଧାୟକଙ୍କ ଲୋକ ଯାଇ ସେମାନଙ୍କୁ ଖୋଜାଖୋଜି କରୁଥିବା ଉଭୟ ଭିଡିଓରେ କହୁଛନ୍ତି। ଏହାପରେ ସାକ୍ଷୀ କହିଛନ୍ତି ଯଦି ତାଙ୍କୁ ସୁରକ୍ଷା ନ ମିଳେ ତେବେ ତାଙ୍କ ବିଧାୟକ ପିତା ହୁଏତ ତାଙ୍କୁ ଜୀବନରୁ ମାରି ଦେଇ ପାରନ୍ତି। ତେଣୁ ତାଙ୍କୁ ସୁରକ୍ଷା ଦିଆଯାଉ ବୋଲି ସେ ଅନୁରୋଧ କରିଛନ୍ତି। ଏବେ ଏମିତି ପ୍ରାୟ ୨ଟି ଭିଡିଓ ବରେଲିରେ ଭାଇରାଲ ହେବାରେ ଲାଗିଛି।
