କଟକ ଅଫିସ୍,୨୯ା୩: ଲକ୍ଡାଉନ୍ ଯୋଗୁ ଜନସାଧାରଣ ଯେମିତି ହଇରାଣ ନ ହୁଅନ୍ତି, ସେ ଦିଗରେ ପୋଲିସ ବିଭାଗ ତରଫରୁ ଅନେକ ଗୁରୁତ୍ୱପୂର୍ଣ୍ଣ ପଦକ୍ଷେପ ନିଆଯାଉଛି। ଏହି କ୍ରମରେ ଥାନା କିମ୍ବା ଜିଲା ପୋଲିସ କାର୍ଯ୍ୟାଳୟକୁ ନ ଯାଇ ଲୋକମାନେ ଅଭିଯୋଗ ରୁଜୁ କରିପାରିବା ପାଇଁ ଟେଲିଫୋନ୍ ହେଲ୍ପଲାଇନ୍ ବ୍ୟବସ୍ଥା ଆରମ୍ଭ କରାଯାଇଛି। ଶନିବାର ରାଜ୍ୟ ପୋଲିସ ମୁଖ୍ୟାଳୟ ପକ୍ଷରୁ ପ୍ରେସ୍ ବିବୃତିରେ କୁହାଯାଇଛି, ରାଜ୍ୟବ୍ୟାପୀ ଲକ୍ଡାଉନ ଫଳରେ ଲୋକେ ସେମାନଙ୍କ ଅଭିଯୋଗ ଦାଖଲ ପାଇଁ ଥାନା କିମ୍ବା ଜିଲା ପୋଲିସ କାର୍ଯ୍ୟାଳୟକୁ ଯିବା ସମ୍ଭବ ହେଉନାହିଁ। ଏଥିପାଇଁ ଓଡ଼ିଶା ପୋଲିସ ପକ୍ଷରୁ ଟେଲିଫୋନ୍ ହେଲ୍ପଲାଇନ୍ ମାଧ୍ୟମରେ ଅଭିଯୋଗର ସମାଧାନ ପାଇଁ ବ୍ୟବସ୍ଥା କରାଯାଇଛି। ଏ ନେଇ ଶୁକ୍ରବାର ସମସ୍ତ ଏସ୍ପି ଏବଂ ଡିସିପିଙ୍କ ସହ ଭିଡିଓ କନ୍ଫରେନ୍ସିଂ ମାଧ୍ୟମରେ ଆଲୋଚନା ହୋଇଥିଲା। ଏହାପରେ ଡିଜିପିଙ୍କ କାର୍ଯ୍ୟାଳୟରୁ ଏସ୍ପିମାନଙ୍କୁ ନିର୍ଦ୍ଦେଶ ଦିଆଯାଇଛି। ତଦନୁଯାୟୀ, ରାଜ୍ୟରେ ୫ଶହରୁ ଊର୍ଦ୍ଧ୍ୱ ଟେଲିଫୋନ୍ ନମ୍ବରକୁ ନେଇ ଏକ ହେଲ୍ପଲାଇନ୍ ବ୍ୟବସ୍ଥା କରାଯାଇଛି। ପ୍ରତ୍ୟେକ ଜିଲା ପୋଲିସ ସଦର ମହକୁମାରେ ଏକ କିମ୍ବା ଏକାଧିକ ଫୋନ୍କୁ ନେଇ ନିୟନ୍ତ୍ରଣ କକ୍ଷ କାର୍ଯ୍ୟ କରୁଛି। ଲୋକେ ଏହି ନିୟନ୍ତ୍ରଣ କକ୍ଷରେ ସେମାନଙ୍କ ଅଭିଯୋଗ ଦାଖଲ କରିପାରିବେ। ଜିଲା କଣ୍ଟ୍ରୋଲ୍ ରୁମ୍ ଟେଲିଫୋନ୍ ନମ୍ବର, ସବୁ ଥାନାର ଲ୍ୟାଣ୍ଡଫୋନ୍ ଓ ସିୟୁଜି ମୋବାଇଲ୍ ନମ୍ବରଗୁଡ଼ିକ ସଂପୃକ୍ତ ଜିଲାର ଟୁଇଟର୍, ଫେସ୍ବୁକ୍ ଓ ଗଣମାଧ୍ୟମରେ ପ୍ରକାଶ କରାଯାଇଛି। ଏସ୍ପି ଏବଂ ଡିସିପିମାନେ ବ୍ୟକ୍ତିଗତ ଭାବେ ଥାନାଗୁଡ଼ିକର ଏହି ଟେଲିଫୋନ୍ ନମ୍ବରରେ ଆସିଥିବା ଅଭିଯୋଗର ସମୀକ୍ଷା କରିବେ। ସମସ୍ତ ନିୟନ୍ତ୍ରଣ କକ୍ଷର ଫୋନ୍ ନମ୍ବର ଓଡ଼ିଶା ପୋଲିସ ୱେବ୍ସାଇଟ୍ରେ ଅପ୍ଲୋଡ୍ କରାଯାଇଛି ବୋଲି ରାଜ୍ୟ ପୋଲିସ ମୁଖ୍ୟାଳୟ ତରଫରୁ ସୂଚନା ଦିଆଯାଇଛି।
