ଅନୁଗୋଳ ଅଫିସ, ୮।୬ – ଅନୁଗୋଳ ସହର ଉପକଣ୍ଠରେ ଥିବା ଏକ ତେଲ ଗୋଦାମରେ ଅପମିଶ୍ରିତ କାରବାର ହେଉଥିବା ସନ୍ଦେହ କରି ଜିଲା ପ୍ରଶାସନ ପକ୍ଷରୁ ଶୁକ୍ରବାର ଚଢ଼ାଉ କରାଯାଇଛି। ଉକ୍ତ ଗୋଦାମକୁ ପ୍ରଶାସନ ନିଜ ହେପାଜତକୁ ନେଇଥିବା ବେଳେ ପରୀକ୍ଷା ପାଇଁ ତେଲର ନମୁନା ପଠାଯାଇଛି। ଯଦି ତେଲ ଅପମିଶ୍ରିତ ହେଉଥିବା ରିପୋର୍ଟ ଆସେ ତା’ହେଲେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଉପଜିଲାପାଳ ବାସୁଦେବ ଶତପଥୀ ସୂଚନା ଦେଇଛନ୍ତି।
ଅନୁଗୋଳ ପଞ୍ଚମହଲାରୁ ଶରଧାପୁର ଯିବା ରାସ୍ତାରେ ଏକ ଘରେ ଏହି ଗୋଦାମ ଚାଲିଥିବା ପ୍ରଶାସନକୁ ସୂଚନା ମିଳିଥିଲା। ଏହାପରେ ପ୍ରଶାସନ ପକ୍ଷରୁ ଉପଜିଲାପାଳଙ୍କ ନେତୃତ୍ୱରେ ଯୋଗାଣ ବିଭାଗ ଅଧିକାରୀ, ଓଜନ ଓ ମାନଦଣ୍ଡ ଇନ୍ସପେକ୍ଟର, ପୋଲିସ ଘଟଣାସ୍ଥଳରେ ଚଢ଼ାଉ କରିଥିଲେ। ଏହି ସମୟରେ ଜନୈକ ବ୍ୟକ୍ତିଙ୍କ ଘରେ ୧୫ ଶହ ଟନ୍ ରିଫାଇନ ତେଲ ଥିବା ପ୍ରଶାସନ ଦେଖିବାକୁ ପାଇଥିଲା। ତେବେ ସମ୍ପୃକ୍ତ ବ୍ୟକ୍ତି ସଫେଇ ଦେଇଛନ୍ତି ଯେ, କଲିକତାରୁ ଟ୍ୟାଙ୍କର ଯୋଗେ ପ୍ରଥମ ଥର ରିଫାଇନ ତେଲ ବ୍ୟବସାୟ ପାଇଁ ଆଣିଥିଲେ। ଏହା କୌଣସି ଅପମିଶ୍ରିତ ହୋଇ ନ ଥିବା ସେ କହିଛନ୍ତି। ଘଟଣାସ୍ଥଳକୁ ଜିଲାପାଳଙ୍କ ନିର୍ଦ୍ଦେଶରେ ଯାଇଥିବା ଉପଜିଲାପାଳ ଶତପଥୀ କହିଛନ୍ତି, ତେଲରେ ଅପମିଶ୍ରଣ ନେଇ ପୂର୍ବରୁ ବହୁବାର ଅଭିଯୋଗ ହୋଇ ଆସୁଥିଲା। ତେଣୁ ଉକ୍ତ ଗୋଦାମ ଉପରେ ଗୋପନୀୟ ଭାବେ ନଜର ରଖାଯାଇଥିଲା। ତେଲ ଆସିବା ପରେ ଖବର ପାଇ ଶୁକ୍ରବାର ଚଢ଼ାଉ ହୋଇଛି। ପରୀକ୍ଷା ପରେ ଏହା ସ୍ବଚ୍ଛ କି ଅପମିଶ୍ରିତ ତାହା ସ୍ପଷ୍ଟ ହେବ।
