ପିପିଲି, ୨୪ା୪(ସ୍ବ.ପ୍ର/ଡି.ଏନ.ଏ): ବର୍ତ୍ତମାନ ମୁଗ, ବିରି ଆଦି ରବି ଫସଲ ବିକ୍ରି ପାଇଁ ଚାଷୀଙ୍କୁ ହଇରାଣ ହେବାକୁ ପଡ଼ିିବନି। ସେମାନେ ଅମଳ କରିଥିବା ଫସଲକୁ ସରକାର ଉଚିତ ମୂଲ୍ୟରେ କିଣିନେବେ। ଚାଷୀ ଆଉ କ୍ଷତିରେ ପଡ଼ିବେ ନାହିଁ ବୋଲି ଶୁକ୍ରବାର ପିପିଲି ଆତ୍ମା କାର୍ଯ୍ୟାଳୟରେ ଅନୁଷ୍ଠିତ ମଣ୍ଡି ଖୋଲିବା ସଂକ୍ରାନ୍ତ ବୈଠକରେ ଆତ୍ମା ଅଧ୍ୟକ୍ଷ ଧରଣୀଧର ସାହୁ କହିଛନ୍ତି। ଏହି ବୈଠକରେ ସାହୁ ଅଧ୍ୟକ୍ଷତା କରିଥିଲେ। କୃଷି ଅଧିକାରୀ ରାକେଶ କୁମାର ରାଉତ ଯୋଗଦେଇ ପିପିଲି ବ୍ଲକର ତେଇଶିପୁର ସେବା ସମବାୟ ସମିତି ଓ ସୁଆବରାଇ ସେବା ସମବାୟ ସମିତିରେ ମୁଗ, ବିରି ମଣ୍ଡି ଖୋଲିବା ପାଇଁ ନିଷ୍ପତ୍ତିି ହୋଇଛି ବୋଲି କହିଥିଲେ। ପିପିଲି ବ୍ଲକ ଅଧୀନ ୧୫ଟି ପଞ୍ଚାୟତ ଓ ପୌରାଞ୍ଚଳର ଚାଷୀ ତେଇଶିପୁର ସେବା ସମବାୟ ସମିତି ଏବଂ ଅନ୍ୟ ୧୦ଟି ପଞ୍ଚାୟତର ଚାଷୀ ସୁଆବରାଇ ସେବା ସମବାୟ ସମିତିରେ ସେମାନଙ୍କ ମୁଗ, ବିରି ବିକ୍ରି କରିପାରିବେ। ଏଥିପାଇଁ ସେମାନଙ୍କୁ କୃଷକସାଥିମାନଙ୍କଠାରୁ ଟୋକନ ସଂଗ୍ରହ କରିବାକୁ ପଡ଼ିବ। ମୁଗ ଦର କୁଇଣ୍ଟାଲ ପିଛା ୭୦୫୦ ଟଙ୍କା ଓ ବିରି କୁଇଣ୍ଟାଲ ପିଛା ୫୭୦୦ ଟଙ୍କା ସରକାର ଧାର୍ଯ୍ୟ କରିଛନ୍ତି। ଜଣେ ଚାଷୀ ଏକର ଚାଷଜମି ପିଛା ୩ କୁଇଣ୍ଟାଲ ଏବଂ ୮ ଏକର ଜମିପିଛା ୨୫ କୁଇଣ୍ଟାଲ ମୁଗ, ବିରି ମଣ୍ଡିରେ ବିକ୍ରି କରିପାରିବେ ବୋଲି ବୈଠକରେ ନିଷ୍ପତ୍ତି ନିଆଯାଇଛି। କୃଷକସାଥିମାନଙ୍କୁ ହ୍ବାଟ୍ସ୍ଅପ୍ ଗ୍ରୁପ୍ ମାଧ୍ୟମରେ ଚାଷୀମାନଙ୍କୁ ଖବର ଦେବା ପାଇଁ ଅଧିକାରୀ ରାଉତ୍ କହିଥିଲେ। ଏହି ବୈଠକରେ ସମବାୟ ସମ୍ପ୍ରସାରଣ ଅଧିକାରୀ ସୁରେନ୍ଦ୍ରନାଥ ଦାଶ, ପିପିଲି ମଣ୍ଡଳ ବୈଷୟିକ ପରିଚାଳକ ଉମାକାନ୍ତ ଦଳେଇ, ଆଇନଜୀବୀ ଶ୍ରୀଧର ପ୍ରଧାନଙ୍କ ସମେତ ପିପିଲି ବ୍ଲକର ସମବାୟ ସମିତି ସମ୍ପାଦକ, ଗ୍ରାମ କୃଷି କର୍ମଚାରୀମାନେ ଉପସ୍ଥିତ ଥିଲେ ା
