ପୁରୁଷୋତ୍ତମପୁର,୧୬।୩(ଡି.ଏନ୍.ଏ.): କରୋନା ଲାଗି ଗଞ୍ଜାମ ଜିଲାର ପ୍ରସିଦ୍ଧ ଶକ୍ତିପୀଠ ଇଷ୍ଟଦେବୀ ମା’ ତାରାତାରିଣୀଙ୍କ ପୀଠରେ ପ୍ରଶାସନ ଅଙ୍କୁଶ ଲଗାଇଛି। ମୁଣ୍ଡନ କାର୍ଯ୍ୟକୁ ସମ୍ପୂର୍ଣ୍ଣ ରୂପେ ବନ୍ଦ କରି ଦିଆଯାଇଛି । ମନ୍ଦିରକୁ ସଂଯୋଗ କରୁଥିବା ତିନି ଗୋଟି ମୁଖ୍ୟ ରାସ୍ତା (ତାରାତାରିଣୀ ଛକ, କେଶପୁର ରାସ୍ତା, ଛତ୍ରପୁର ରାସ୍ତା)କୁ ପ୍ରଶାସନ ପକ୍ଷରୁ ବାଉଁଶ ଓ ଦଉଡ଼ି ବନ୍ଧାଯାଇ ସିଲ କରିଦିଆଯାଇଛି। ଏହା ଦ୍ୱାରା କୌଣସି ଗାଡ଼ି ମୋଟର ଯାତାୟାତ କରିପାରୁନାହିଁ । ଚୈତ୍ର ମଙ୍ଗଳବାର ଯାତ୍ରାରେ ମୁଣ୍ଡନ ଲାଗି ଜିଲା ଓ ଜିଲା ବାହାରୁ ଶିଶୁଙ୍କୁ ନେଇ ଆସିଥିବା ଭକ୍ତମାନେ ନାହିଁ ନ ଥିବା ସମସ୍ୟାର ସମ୍ମୁଖୀନ ହୋଇ ନିରାଶରେ ଫେରିଛନ୍ତି । ପ୍ରଶାସନର ଏହି ନିଷ୍ପତ୍ତିକୁ କିଛି ଶ୍ରଦ୍ଧାଳୁ ସ୍ବାଗତ କରିଛନ୍ତି । ମନ୍ଦିର ଇତିହାସରେ ମା’ ତାରାତାରିଣୀଙ୍କ ପବିତ୍ର ଚୈତ୍ର ମଙ୍ଗଳବାର ଯାତ୍ରାରେ ମୁଣ୍ଡନ ନ ହେବା ଓ ଭକ୍ତ ଫେରିଯିବା ଘଟଣା ପ୍ରଥମ । ମନ୍ଦିର ପରିସରରେ ଥିବା ସମସ୍ତ ଦୋକାନକୁ ବନ୍ଦ କରି ଦିଆଯିବା ସହ ୯୯୯ ପାହାଚ ଦେଇ ପାହାଡ଼ ଉପରକୁ ଯିବା ପାଇଁଥିବା ସିଂହଦ୍ୱାର ରାସ୍ତାର ମୁଖଶାଳାରେ କପଡା ଘୋଡାଇ ବନ୍ଦ କରି ପୋଲିସ ଜଗି ରହିଛି । ଏହା ସହ ପାହାଡ଼ ଉପରକୁ ଥିବା ରୋଡ, ରୋପୱେକୁ ମଧ୍ୟ ବନ୍ଦ କରିଦିଆଯାଇଛି। ସମସ୍ତ ସ୍ଥାନରେ ପୋଲିସ ଫୋର୍ସ ମୁତୟନ ରହି କଡ଼ା ଯାଞ୍ଚ ପ୍ରକ୍ରିୟା ଜାରି ରଖିଛନ୍ତି। ମନ୍ଦିରରେ କେବଳ ମା’ଙ୍କ ରୀତିନୀତି ଅନୁସାରେ ପୂଜାର୍ଚ୍ଚନା ହେବ ବୋଲି ମନ୍ଦିର ଟ୍ରଷ୍ଟ ବୋର୍ଡ ପକ୍ଷରୁ କୁହାଯାଇଛି । ଜିଲାପାଳ ବିଜୟ ଅମୃତା କୁଲାଙ୍ଗେ, ଛତ୍ରପୁର ଉପଜିଲାପାଳ ପ୍ରିୟରଞ୍ଜନ ପୃଷ୍ଟି ଆସି ତଦାରଖ କରିଥିବା ବେଳେ ପୁରୁଷୋତ୍ତମପୁର ଏସ୍ଡିପିଓ ସୀମା ସ୍ବାଇଁଙ୍କ ନେତୃତ୍ୱରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇ ଭକ୍ତଙ୍କୁ ସଚେତନ କରାଯାଉଛି।
