ବ୍ରହ୍ମପୁର ଅଫିସ୍,୧ା୬-ଜିଲା ମୁଖ୍ୟ ଚିକିତ୍ସାଧିକାରୀଙ୍କ କାର୍ଯ୍ୟାଳୟ ପରିସରରେ ଥିବା ଆଇଇସି ହଲ୍ଠାରେ ଶୁକ୍ରବାର ବିଶ୍ୱ ତମାଖୁ ବର୍ଜନ ଦିବସ ପାଳିତ ହୋଇଯାଇଛି । ଜିଲା ମୁଖ୍ୟ ଚିକିତ୍ସାଧିକାରୀ ତଥା ଜନସ୍ବାସ୍ଥ୍ୟ ଅଧିକାରୀ ଡା. ବିଜୟ କୁମାର ପାଣିଗ୍ରାହୀ ଏଥିରେ ଅଧ୍ୟକ୍ଷତା କରି ତମାଖୁ ସେବନ ଅଭ୍ୟାସ କିଭଳି ମୃତ୍ୟୁକୁ ଡାକିଆଣେ, ସେ ସମ୍ପର୍କରେ କହିଥିଲେ । ଜିଲା ଜନସ୍ବାସ୍ଥ୍ୟ ଅଧିକାରୀ ଡା. ଆର୍ ଜଗଦୀଶ ପଟ୍ଟନାୟକ ଜାତୀୟ ତମାଖୁ ନିୟନ୍ତ୍ରଣ କାର୍ଯ୍ୟକ୍ରମ ବିଷୟରେ ଆଲୋଚନା କରିଥିଲେ । ଅନ୍ୟମାନଙ୍କ ମଧ୍ୟରେ ଅତିରିକ୍ତ ନିର୍ଦ୍ଦେଶିକା ସ୍ବାସ୍ଥ୍ୟ ବିଭାଗ-୧ ଡା. ହିମାଂଶୁବାଳା ପଟ୍ଟନାୟକ, ଜିଲା ଭେଷଜ ଅଧିକାରୀ ଡା. କୁର୍ମେୟା, ଜିଲା ପରିବାର କଲ୍ୟାଣ ଅଧିକାରୀ ଡା. ସରୋଜିନୀ ଦେବୀ, ବହୁଜନ ବ୍ୟାଧି ନିୟନ୍ତ୍ରକ ଡା. ଅଶୋକ ମିଶ୍ର, ସାବିତ୍ରୀ ରାଉତ, ମାନସିକ ରୋଗ ବିଭାଗର ସହକାରୀ ଅଧ୍ୟାପକ ଡା. ବିଭୁ କଲ୍ୟାଣ ସାହୁ, ଜାତୀୟ ସ୍ବାସ୍ଥ୍ୟ ମିଶନର୍ ଜିଲା କାର୍ଯ୍ୟକ୍ରମ ପରିଚାଳକ ଶ୍ୟାମ ସୁନ୍ଦର ତ୍ରିପାଠୀ ମଞ୍ଚାସୀନ ଥିଲେ । ଚଳିତ ବର୍ଷର ଥିମ୍ ରହିଛି ‘ତମାଖୁ ଏବଂ ଫୁସ୍ଫୁସ୍ର ସ୍ବାସ୍ଥ୍ୟ’ । କର୍କଟ ରୋଗଠାରୁ ପୁରାତନ ଶ୍ୱାସ ରୋଗ ପର୍ଯ୍ୟନ୍ତ, ମନୁଷ୍ୟ ସ୍ବାସ୍ଥ୍ୟ ଉପରେ ତମାଖୁର କିପରି କୁପ୍ରଭାବ ପଡ଼ିଥାଏ, ଏକ ସୁସ୍ଥମୟ ଜୀବନଯାପନ କରିବାରେ ଫୁସ୍ଫୁସ୍ର ଭୂମିକା, ତମାଖୁ ସେବନ ତଥା ତମାଖୁର ବ୍ୟବହାରକୁ ନିୟନ୍ତ୍ରଣ କରିବା ସକାଶେ ଠିକ୍ ପଦକ୍ଷେପ ନେବା ବିଷୟରେ ଅତିଥିମାନେ ବକ୍ତବ୍ୟ ଦେଇଥିଲେ।
