ଦିଗପହଣ୍ଡି,୧।୬(ଡି.ଏନ.ଏ.)-ଗଞ୍ଜାମ ଜିଲା ଦିଗପହଣ୍ଡି ଥାନା ବଡଡୁମ୍ବୁଳା ପଞ୍ଚାୟତ ଅଧୀନ ସାନ ଡୁମ୍ବୁଳା ଗ୍ରାମରେ ରବିବାର ରାତିରେ ଲୁଟ୍ ହୋଇଛି। ଗ୍ରାମର ଜି.ରାଧାକାନ୍ତ ପ୍ରଧାନ ଓ ତାଙ୍କ ସାନଭାଇ ଜି. ଲକ୍ଷ୍ମୀ ପ୍ରଧାନଙ୍କ ଘର କବାଟ ଭାଙ୍ଗି ଦୁର୍ବୃତ୍ତମାନେ ସୁନା, ରୂପାଗହଣା ଓ ନଗଦ ଟଙ୍କା ଲୁଟି ନେଇଥିବା ଦିଗପହଣ୍ଡି ଥାନାରେ ଅଭିଯୋଗ ହୋଇଛି। ବିଳମ୍ବିତ ରାତିରେ ଚୋରମାନେ ପ୍ରଥମେ ବଡ଼ଭାଇ ରାଧାକାନ୍ତଙ୍କ ବାରି କବାଟ ଭାଙ୍ଗି ଘର ଭିତରେ ପଶି ଆଲମାରି ତାଡି ସେଥିରେ ଥିବା ୪ ଭରି ଓଜନର ସୁନାହାର, ୨ଟି କାନଫୁଲ, ୧୨ ଭରି ରୂପା ଅଳଙ୍କାର ଓ ନଗଦ ୧୫ ହଜାର ଟଙ୍କା ଲୁଟି ନେଇଥିଲେ। ପରେ ପଡିଶା ଘରେ ରହୁଥିବା ସାନଭାଇ ଲକ୍ଷ୍ମୀଙ୍କ ବାରି ପଟ କବାଟ ଭାଙ୍ଗି ଘରେ ପଶି ଦୁର୍ବୃତ୍ତମାନେ ଆଲମିରା ତାଡି ସେଥିରେ ଥିବା ସୁନା ମୁଦି ୬ଟି, ଗୋଟିଏ ସୁନା ଚେନ, ୩ହଳ ସୁନା କାନଫୁଲ, ୪୭ ଗ୍ରାମ ଓଜନର ସୁନାହାର, ପ୍ରାୟ ୫ ଶହ ଗ୍ରାମ ଓଜନର ବିଭିନ୍ନ ରୁପା ଅଳଙ୍କାର ଓ ନଗଦ ୪୫ ହଜାର ଟଙ୍କା ଲୁଟି ନେଇଥିବା ଅଭିଯୋଗପତ୍ରରେ ଦର୍ଶାଯାଇଛି। ପୋଲିସ ପହଞ୍ଚି ତଦନ୍ତ ଚଳାଇଛି।
