ଭୁବନେଶ୍ୱର, ୨୯ା୧୨(ବ୍ୟୁରୋ)- ସାରା ଦୁନିଆ ଏବେ ଡିଜିଟାଲ୍ରୁ ଡିଜିଟାଲ୍ ପରବର୍ତ୍ତୀ ଯୁଗ ଆଡ଼କୁ ଗତି କରୁଛି। ଆଧୁନିକ ଓ ଅଭିନବ ପ୍ରଯୁକ୍ତି ଆମର ପରୀକ୍ଷା ନେବ। ଆମ ପାଇଁ ନୂଆ ଓ ଜଟିଳ ଆହ୍ବାନ ସୃଷ୍ଟି କରିବ। ପ୍ରଯୁକ୍ତିର ଅଦ୍ଭ୍ୟୁଦୟ ସହିତ ସେହି ଯୁଗରେ ତିଷ୍ଠି ରହିବା ଲାଗି ଆମକୁ ଏବେ ପୁନଃ ଆବିଷ୍କାର କରିବାକୁ ହେବ। ଇଣ୍ଡିଆନ ଇନଷ୍ଟିଚ୍ୟୁଟ୍ ଅଫ୍ ମ୍ୟାନେଜମେଣ୍ଟ (ଆଇଆଇଏମ୍) ସମ୍ବଲପୁର ପକ୍ଷରୁ ଭୁବନେଶ୍ୱରଠାରେ ଶନିବାର ଆରମ୍ଭ ହୋଇଥିବା ୧୩ତମ ଆଇଏସ୍ଡିଏସ୍ଆଇ ସମ୍ମିଳନୀରେ ପ୍ରଫେସର ମହାଦେଓ ଜୈସ୍ଓ୍ବାଲ ଏହି ଆହ୍ବାନ ଦେଇଛନ୍ତି।
ତିନିଦିନ ଧରି ଚାଲିବାକୁ ଥିବା ଏହି ସମ୍ମିଳନୀର ବିଷୟ ବସ୍ତୁ ରହିଛି ‘ଡିଜିଟାଲ ପରବର୍ତ୍ତୀ ଯୁଗରେ ଶିଳ୍ପ ପରିବର୍ତ୍ତନର ପରିଚାଳନା’। ଆଇଆଇଏମ୍ ସମ୍ବଲପୁରର ନିର୍ଦ୍ଦେଶକ ତଥା ଆଇଏସ୍ଡିଏସ୍ଆଇ ସଭାପତି ପ୍ରଫେସର ଜୈସ୍ୱାଲ ଯୋଗଦେଇ କହିଛନ୍ତି ଯେ, ଆଇଆଇଏମ୍ ସମ୍ବଲପୁରର ଗବେଷଣା ୩ ଡି’ (ଡିଜିଟାଲାଇଜେଶନ, ଡି-କାର୍ବନାଇଜେଶନ ଓ ବ୍ୟବସାୟର ଡେମୋକ୍ରାଟାଇଜେଶନ) ଉପରେ ପର୍ଯ୍ୟବସିତ। ଏହି ସମ୍ମିଳନୀ ଶିଳ୍ପକୁ ବର୍ତ୍ତମାନ ଏବଂ ଭବିଷ୍ୟତର ବିକାଶ ଉପରେ ଅପ୍ଡେଟ୍ ରଖିବ ଏବଂ ଆମେ ପ୍ରବେଶ କରିବାକୁ ଯାଉଥିବା ଗୁରୁତ୍ୱପୂର୍ଣ୍ଣ ସମୟକୁ ନେଇ ସମସ୍ତ ଅଂଶୀଦାରଙ୍କୁ ପ୍ରସ୍ତୁତ କରିବାରେ ସହାୟକ ହେବ। ଡିଜିଟାଲ ପରବର୍ତ୍ତୀ ଯୁଗରେ କ୍ୱାଣ୍ଟମ୍ କମ୍ପ୍ୟୁଟିଂ, ବ୍ଲକ୍ ଚେନ୍ ସିଷ୍ଟମ୍ ଓ ବିଟ୍ କଏନ୍ ମୁଦ୍ରା ଦେଖିବାକୁ ମିଳିବ। ଏସବୁ ଶିଳ୍ପ ସମେତ ପରିଚାଳନା ଏବଂ ପ୍ରଶାସନରେ ଅନେକ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ଆଣିବ। ତେଣୁ ଡିଜିଟାଲ ପରବର୍ତ୍ତୀ ଯୁଗରେ ପ୍ରାସଙ୍ଗିକତା ରହିବା ପାଇଁ ବିଶ୍ୱବିଦ୍ୟାଳୟ, ମ୍ୟାନେଜ୍ମେଣ୍ଟ ଅନୁଷ୍ଠାନ ଏବଂ ଶିଳ୍ପକୁ ଏହି ଗୁରୁତ୍ୱପୂର୍ଣ୍ଣ ପରିବର୍ତ୍ତନ ଲାଗି ନିଜକୁ ବ୍ୟବସ୍ଥିତ କରିବାକୁ ପଡ଼ିବ ବୋଲି ପ୍ରଫେସର ଜୈସୱାଲ ଗୁରୁତ୍ୱାରୋପ କରିଛନ୍ତି। ଉଦ୍ଘାଟନୀ ସଭାରେ ୟୁଏସ୍ଏ ଡିସିଶନ ସାଇନ୍ସ ଇନଷ୍ଟିଚ୍ୟୁଟ୍ର ସଭାପତି ପ୍ରଫେସର ବିଜୟ ଆର. କନନ, ବିଡବ୍ଲ୍ୟୁ ବିଜନେସ ୱାର୍ଲଡ ଅଧ୍ୟକ୍ଷ ଓ ମୁଖ୍ୟ ସମ୍ପାଦକ ଅନୁରାଗ ବାତ୍ରା, ଆଇଆଇଏମ୍ ତ୍ରିଚିର ନିର୍ଦ୍ଦେଶକ ପ୍ରଫେସର ଭିମରାୟ ମେତ୍ରୀ ପ୍ରମୁଖ ଯୋଗଦେଇଥିଲେ। ଏହି ସମ୍ମିଳନୀରେ ଭାରତ ସମେତ ଯୁକ୍ତରାଷ୍ଟ୍ର ଆମେରିକା, ଚୀନ୍, ୟୁରୋପ, ନ୍ୟୁଜିଲ୍ୟାଣ୍ଡ ଓ ଦକ୍ଷିଣ ଆଫ୍ରିକାର ୩୦୦ରୁ ଅଧିକ ପ୍ରଫେସର, ସ୍କଲାର୍ ଓ ଶିଳ୍ପ ପ୍ରବନ୍ଧକ ଯୋଗ ଦେଇଛନ୍ତି।
