ଯୋଡା, ୩୦।୫(ଡି.ଏନ.ଏ.)-କେନ୍ଦୁଝର ଜିଲା ଯୋଡା ଖଣିମଣ୍ଡଳ ତଥା ବାମେବାରୀ ଥାନା ଅନ୍ତର୍ଗତ ଟାଟାଷ୍ଟିଲର ଖଣ୍ଡବନ୍ଧ ଖଣି ପାର୍କିଂରେ ଏକ ଡମ୍ପର ଧକାରେ ଜଣେ ଡ୍ରାଇଭର ଗୁରୁତର ଆହତ ହୋଇ ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ଖବର ନେବାରୁ ଜଣାପଡିଛି ଯେ, ଶନିବାର ଅପରାହ୍ନରେ ଡମ୍ପର ଡ୍ରାଇଭର ଭୋଲା ଦାସ ଉକ୍ତ ଖଣିର ପାର୍କିଂ ସ୍ଥଳରେ ଡମ୍ପର ରଖି ଠିଆ ହୋଇଥିଲେ। ଏହି ସମୟରେ ଅନ୍ୟ ଏକ ଡମ୍ପର ପାର୍କିଂ ଭିତରକୁ ପ୍ରବେଶ କରିବା ପାଇଁ ନେଉଥିବାବେଳେ ପୂର୍ବରୁ ସେଠାରେ ଛିଡା ହୋଇଥିବା ଡ୍ରାଇଭର ଭୋଲା ଦାସ ଡମ୍ପର ଚକ ତଳେ ଚାପି ହୋଇଯାଇଥିଲେ। ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଯୋଡା ଟାଟାଷ୍ଟିଲ ଡାକ୍ତରଖାନାରେ ଭର୍ତ୍ତି କରାଯାଇଛି। ଅନ୍ୟପକ୍ଷେ ଖଣିରୁ ବିପୁଳ ପରିମାଣରେ ଖଣିଜ ପରିବହନ ହେଉଥିଲେ ହେଁ, ବହୁ ସଂଖ୍ୟକ ଭାରିଯାନ ପାଇଁ ସେଠାରେ ପର୍ଯ୍ୟାପ୍ତ ପରିମାଣର ପାର୍କିଂ ସ୍ଥାନ ନ ଥିବାରୁ ବାରମ୍ବାର ଦୁର୍ଘଟଣା ଘଟୁଛି ବୋଲି ଟ୍ରକ ମାଲିକ ଶୀବାଜୀ ମିଶ୍ର କହିଛନ୍ତି।
