ତାଳଚେର,୧ା୧୨(ନି.ପ୍ର.)- କଲିୟାରୀ ପୋଲିସ ଡକାୟତି ଯୋଜନା କରୁଥିବା ୮ ଜଣଙ୍କୁ ଗିରଫ କରି କୋର୍ଟଚାଲାଣ କରିଛି। ଗିରଫ ଦୁର୍ବୃତ୍ତମାନେ ହେଲେ ସମଲ ଚନ୍ଦ୍ରବିଲ ଗ୍ରାମର ଦିପୁ ଓରଫ ଦୀପକ ପ୍ରଧାନ, କଟକ ଦରଘାବଜାରର ଏମ୍ଡି ଇଞ୍ଜେମାନ, ସେଣ୍ଟ୍ରାଲ କଲେନୀର ନିପୁ ନାଏକ, ଦରଘାବଜାରର ଏସ୍.କେ. ଜାହିର, ଚାଳଗଡର ସାହିଲ ନାଏକ, ଦେଉଳବେଡ଼ା କଲୋନୀର ଆଶୁତୋଷ ବାରିକ, ବଲଣ୍ଡାର ଏମା ବହାଦର ଥାପା ଓ ହିନ୍ଦୋଳ କୁରୁମିଡାର କାହ୍ନୁଚରଣ ବେହେରା। ଏମାନଙ୍କ ଠାରୁ ପୋଲିସ ୨ଟି ପିସ୍ତଲ, ୧୦ ଜୀବନ୍ତ ଗୁଳି, ଗୋଟିଏ ବୋଲେରୋ, ୩ ବାଇକ୍, ୭ ମୋବାଇଲ ଜବତ କରିଛି। ଶନିବାର ରାତିରେ ସମ୍ପୃକ୍ତ ୮ ଜଣ ବଳରାମ କୋଇଲା ଖଣି ଅଞ୍ଚଳରେ ଏକତ୍ରିତ ହୋଇ ଡକାୟତି ପ୍ରସ୍ତୁତି ଚଳାଇଥିଲେ। ଖବରପାଇ କଲିୟାରୀ ଆଇଆଇସି ସବ୍ୟସାଚୀ ରାଉତ ଓ ଟିମ୍ ଘଟଣାସ୍ଥଳରେ ଚଢାଉ କରି ୮ଜଣଙ୍କୁ ଗିରଫ କରିଥିଲେ। ଏ ସଂକ୍ରାନ୍ତରେ କଲିୟାରୀ ଥାନାରେ ନଂ. ୪୧୮/୧୯ରେ ଏକ ମାମଲା ରୁଜୁ କରାଯାଇଛି। ଗିରଫ ଦୁର୍ବୃତ୍ତମାନଙ୍କ ନାମରେ ତାଳଚେର ଓ କଲିୟାରୀ ଥାନାରେ ଏକାଧିକ ମାମଲା ରହିଥିବା ପୋଲିସ ପକ୍ଷରୁ କୁହାଯାଇଛି।
