ଭୁବନେଶ୍ୱର,୧।୩(ବ୍ୟୁରୋ): ଟ୍ରେନ୍ ଓ ଷ୍ଟେଶନରେ ଟିକେଟ ଚେକିଂ ନାଁରେ ଯାତ୍ରୀଙ୍କୁ ନାନା ପ୍ରକାର ହଇରାଣ କରାଯାଉଥିବା ବିଭିନ୍ନ ସମୟରେ ଅଭିଯୋଗ ହେଉଛି। ଶନିବାର ଭୁବନେଶ୍ୱର ରେଳ ଷ୍ଟେଶନ ମୁଖ୍ୟ ଫାଟକରେ ଜଣେ ଯାତ୍ରୀଙ୍କୁ ଟିକେଟ କଲେକ୍ଟର (ଟିସି) ଦୁର୍ବ୍ୟବହାର କରିବା ସହ ତଣ୍ଟିଆ ମାରିବାକୁ ନେଇ ତୁମୁଳକାଣ୍ଡ ଘଟିଛି। ଅନ୍ୟ ଯାତ୍ରୀମାନେ ଏହି ଘଟଣାକୁ ନେଇ ତୀବ୍ର ପ୍ରତିବାଦ କରିବା ସହ ଷ୍ଟେଶନ ପରିସର ସିଟିଆଇ କାର୍ଯ୍ୟାଳୟକୁ ଘେରାଉ କରି ହୋହଲ୍ଲା କରିଥିଲେ। ଏପରି କି ଆକ୍ରମଣକାରୀ ଟିସି ଜଣକ ଉକ୍ତ କାର୍ଯ୍ୟାଳୟ ବାହାରକୁ ନ ଆସିବାରୁ ଯାତ୍ରୀମାନେ ଧସେଇ ପଶିବାକୁ ଉଦ୍ୟମ କରିଥିଲେ। ସେଠାରେ ଉପସ୍ଥିତ ଥିବା ପୋଲିସ ଓ ଯାତ୍ରୀଙ୍କ ମଧ୍ୟରେ କିଛି ସମୟ ଧରି ଧସ୍ତାଧସ୍ତି ହୋଇଥିଲା। ଫଳରେ ଦୀର୍ଘ ସମୟ ଧରି ଷ୍ଟେଶନରେ ଉତ୍ତେଜନା ଦେଖିବାକୁ ମିଳିଥିଲା। ଶେଷରେ ପୋଲିସ ଯାତ୍ରୀଙ୍କୁ ବୁଝାଶୁଝା କରିବା ସହ ଜିଆର୍ପି ଥାନାରେ ଅଭିଯୋଗ କରିବାକୁ ପରାମର୍ଶ ଦେଇଥିଲା। ପରେ ଟିସି ଜଣକ ଭୁଲ୍ ମାଗିବା ପରେ ପରିସ୍ଥିତି ଶାନ୍ତ ପଡିଥିଲା।
ମିଳିଥିବା ସୂଚନା ଅନୁଯାୟୀ, କେନ୍ଦ୍ରାପଡା ପଟ୍ଟାମୁଣ୍ଡାଇର କିଶୋରଚନ୍ଦ୍ର ବେହେରା ପୁଣେରେ ପାଣି ପାଇପ୍ କାମ କରନ୍ତି। ସେ ସ୍ତ୍ରୀ ଓ ୯ ମାସର ଶିଶୁ ସହ କୋଣାର୍କ ଏକ୍ସପ୍ରେସ୍ରେ ଘରକୁ ଫେରୁଥିଲେ। ଶନିବାର ଅପରାହ୍ନ ପ୍ରାୟ ୪ଟା ୪୫ରେ ଭୁବନେଶ୍ୱର ଷ୍ଟେଶନରେ ଟ୍ରେନ୍ରୁ ଓହ୍ଲାଇଥିଲେ। ପରେ ସେମାନେ ଲଗେଜ ଧରି ଷ୍ଟେଶନରୁ ବାହାରୁଥିଲେ। ଏହି ସମୟରେ ପ୍ରସ୍ଥାନ ଗେଟ ନିକଟରେ ଜଣେ ଟିସି ସେମାନଙ୍କୁ ଅଟକାଇ ଟିକେଟ ମାଗିଥିଲେ। ଟିକେଟ ସ୍ତ୍ରୀଙ୍କ ପାଖରେ ରହିଥିଲା। କିଶୋର ଟିକେଟ କାଢ଼ିବାକୁ ତାଙ୍କ ସ୍ତ୍ରୀଙ୍କୁ କହିଥିଲେ। ହେଲେ ତାଙ୍କ ସ୍ତ୍ରୀ ୯ମାସର ଶିଶୁକୁ କାଖେଇ ଥିବାରୁ ଟିକେଟ ପର୍ସରୁ କାଢିବାରେ ବିଳମ୍ବ ହୋଇଥିଲା। କ’ଣ ପାଇଁ ବିଳମ୍ବ କରୁଛୁ, ଟିକେଟ ନ କରି ଟ୍ରେନରେ ଆସିଛୁ। ଖୋଜିବା ଆଳରେ ମିଛ ବାହାନା ଦେଖାଉଛୁ ବୋଲି ଟିସିି ଜଣକ କିଶୋରଙ୍କୁ କହିବା ସହ ଅସଭ୍ୟ ଭାଷାରେ ଗାଳିଗୁଲଜ ଓ ଦୁର୍ବ୍ୟବହାର କରିଥିଲେ। କିଶୋର ପ୍ରତିବାଦ କରିବାରୁ ଟିସି ଜଣକ ତାଙ୍କୁ ତଣ୍ଟିଆ ମାରିଥିଲେ। ଫଳରେ ସେ ତଳେ ପଡିଯାଇଥିଲେ। ସେଠାରେ ଥିବା ଅନ୍ୟ ଯାତ୍ରୀମାନେ ଏହା ଦେଖି ଟିସିଙ୍କୁ ବିରୋଧ କରିଥିଲେ। କ୍ରମଶଃ ଯାତ୍ରୀଙ୍କ ଗହଳି ବଢ଼ିବା ସହ ହୋହଲ୍ଲା କରିବାରୁ ସମ୍ପୃକ୍ତ ଟିସି ସେଠାରୁ ଖସିଯାଇ ସିଟିଆଇ କାର୍ଯ୍ୟାଳୟ ଭିତରକୁ ପଶିଯାଇଥିଲେ। ଯାତ୍ରୀମାନେ ଉକ୍ତ କାର୍ଯ୍ୟାଳୟ ଆଗରେ ଗହଳି ଜମାଇ ସମ୍ପୃକ୍ତ ଅଧିକାରୀଙ୍କୁ ବାହାରକୁ ଆସି ଉତ୍ତର ଦେବାକୁ ପାଟିକରି ଡାକିବା ସହ ହୋହଲ୍ଲା କରିଥିଲେ। ଖବର ପାଇ ରେଳ ସୁରକ୍ଷା ବଳ (ଆର୍ପିଏଫ୍) ଓ ଜେନେରାଲ ରେଲ୍ଓ୍ବେ ପୋଲିସ (ଜିଆର୍ପି) ସେଠାରେ ପହଞ୍ଚତ୍ ପରିସ୍ଥିତିକୁ ନିୟନ୍ତ୍ରଣ କରିଥିଲା।
ରାଜୁ ରାଉତ ନାମକ ଜଣେ ଯାତ୍ରୀ କହିଛନ୍ତି ଯେ,ପୂର୍ବରୁ ସେ ଏହି ଷ୍ଟେଶନରୁ ବାହାରିବା ସମୟରେ ଟିକେଟ ଯାଞ୍ଚ କରୁଥିବା ଅଧିକାରୀମାନେ ବିଳମ୍ବ ପାଇଁ ତାଙ୍କୁ ମଧ୍ୟ ଦୁର୍ବ୍ୟବହାର କରିଥିଲେ। ସେମାନେ ଗାଳିଗୁଲଜ କରିବା ସହ ମାଡ଼ ମାରିବାକୁ ଉଦ୍ୟମ କରିଥିଲେ। ଅଧିକାରୀ ଓ କର୍ମଚାରୀମାନେ ଅନ୍ୟ ଉଦ୍ଦେଶ୍ୟ ରଖି କିଛି ଗୋଟେ ବାହାନା କରି ହଇରାଣ କରୁଛନ୍ତି। ସେହିଭଳି ଟିଟିଇମାନେ ମଧ୍ୟ ଟିକେଟ ଯାଞ୍ଚ ନାଁରେ ହଇରାଣ କରୁଥିବା ଅନ୍ୟଜଣେ ଯାତ୍ରୀ କହିଛନ୍ତି। ତେବେ ଶନିବାର ଘଟଣା ସଂକ୍ରାନ୍ତରେ ଷ୍ଟେଶନ ନିର୍ଦ୍ଦେଶକ ଚିତ୍ତରଞ୍ଜନ ନାୟକ କହିଛନ୍ତି, ଏ ନେଇ ମୋ ନିକଟରେ ଖବର ରହିଛି। ପ୍ରକୃତରେ ଘଟଣା କ’ଣ ହୋଇଛି ପୂରା ଯାଞ୍ଚ କରୁଛୁ। ଯଦି ଅଭିଯୋଗର ପ୍ରମାଣ ମିଳେ ନିଶ୍ଚିତ ପଦକ୍ଷେପ ନିଆଯିବ, ଆଗକୁ ଯେଭଳି ଯାତ୍ରୀମାନେ ଏଭଳି ସମସ୍ୟାର ସମ୍ମୁଖୀନ ନ ହେବେ ସେଥିପ୍ରତି ଗୁରୁତ୍ୱ ଦିଆଯିବ ବୋଲି ସେ କହିଛନ୍ତି।
