ସେଣ୍ଟ ଜୋନ୍ସ (ଆଣ୍ଟିଗୁଆ),୯।୬(ଏପି): କୋଭିଡ୍-୧୯ ମହାମାରୀର ଆତଙ୍କ ଜାରି ରହିଥିବା ବେଳେ ଏକ ୩ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ ଖେଳିବାକୁ ଓ୍ବେଷ୍ଟଇଣ୍ଡିଜ କ୍ରିକେଟ ଦଳ ଇଂଲଣ୍ଡରେ ପହଞ୍ଚିଛି । ଆଣ୍ଟିଗୁଆରୁ ଦଳ ଏକ ଚାର୍ଟର ବିମାନ ଯୋଗେ ଗସ୍ତ ଆରମ୍ଭ କରିଥିଲା। ଦଳ ମଙ୍ଗଳବାର ସକାଳେ ମାଞ୍ଚେଷ୍ଟରର ଓଲ୍ଡ ଟ୍ରାଫର୍ଡରେ ଓହ୍ଲାଇଛି। ପହଞ୍ଚିବା ପରେ ଓ୍ବେଷ୍ଟଇଣ୍ଡିଜ ଖେଳାଳିମାନେ ଏବେ କ୍ୱାରାଣ୍ଟାଇନ୍ରେ ରହିବେ ଓ ସେମାନଙ୍କର କୋଭିଡ୍-୧୯ ପରୀକ୍ଷା କରାଯିବ। ଅବଶ୍ୟ ଯାତ୍ରା ଆରମ୍ଭ କରିବା ପୂର୍ବରୁ ଖେଳାଳିମାନଙ୍କର ପରୀକ୍ଷା ହୋଇଥିଲା ଓ ସେମାନେ ନେଗେଟିଭ ବୋଲି ଜଣାପଡିଥିଲା। ଓ୍ବେଷ୍ଟଇଣ୍ଡିଜ ଖେଳାଳିମାନଙ୍କୁ ଜୈବ ସୁରକ୍ଷିତ ପରିବେଶରେ ରଖାଯିବ ଓ ଖେଳିବାର ସୁଯୋଗ ଦିଆଯିବ। ତେବେ ଖେଳାଳିମାନଙ୍କୁ ସରକାରଙ୍କ ନିର୍ଦ୍ଦେଶନାମା ମାନିବାକୁ ହେବ। ୨୧ ଦିନ ମଧ୍ୟରେ ୩ଟି ଯାକ ଟେଷ୍ଟ ଖେଳାଯିବ। ପ୍ରଥମ ଟେଷ୍ଟ ସାଉଥାମ୍ପଟନଠାରେ ଜୁଲାଇ ୮ ତାରିଖରୁ, ଦ୍ୱିତୀୟ ଟେଷ୍ଟ ଜୁଲାଇ ୧୬ ତାରିଖରୁ ଓ ତୃତୀୟ ଟେଷ୍ଟ ଜୁଲାଇ ୨୪ ତାରିଖରୁ ଆରମ୍ଭ ହେବ। ଦ୍ୱିତୀୟ ଓ ତୃତୀୟ ଟେଷ୍ଟ ଓଲ୍ଡ ଟ୍ରାଫର୍ଡରେ ଖେଳାଯିବ। ପ୍ରଥମେ ଏହି ଗସ୍ତ ମେ ଓ ଜୁନ୍ରେ ଆୟୋଜନ ହେବା କାର୍ଯ୍ୟକ୍ରମ ଥିଲା। ତେବେ କରୋନା ଭାଇରସ୍ ସଂକ୍ରମଣ ପାଇଁ ଏହାକୁ ଘୁଞ୍ଚାଇ ଦିଆଯାଇଥିଲା।
ଓ୍ବେଷ୍ଟଇଣ୍ଡିଜ ଟେଷ୍ଟ ଦଳ: ଜାସନ ହୋଲ୍ଡର (ଅଧିନାୟକ), ଜେର୍ମାଇନ୍ ବ୍ଲାକଉଡ୍, ଏନ୍କ୍ରୁମା ବୋନର, କ୍ରେଗ୍ ବ୍ରାଥଓ୍ବେଟ୍, ଶମରା ବ୍ରୁକ୍ସ, ଜନ କ୍ୟାମ୍ପବେଲ, ରୋଷ୍ଟନ ଚେଜ୍, ରାହାକିମ କର୍ନଓ୍ବାଲ, ଶେନ ଡୋରିଚ୍, ଚେମର ହୋଲ୍ଡର, ସାଇ ହୋପ୍, ଅଲଜାରି ଜୋସେଫ, ରେମନ ରେଇଫର ଓ କେମର ରୋଚ୍।
