କଟକ ଅଫିସ,୨୪।୧୨- ଭାରତ ଓ ୱେଷ୍ଟଇଣ୍ଡିଜ ମଧ୍ୟରେ ଏକଦିବସୀୟ ମ୍ୟାଚ୍ ଆୟୋଜନ କରିବା ପରେ ପୁଣିଥରେ ବାରବାଟୀ ଷ୍ଟାଡିୟମରେ ଅନ୍ତର୍ଜାତୀୟ ଖେଳାଳିଙ୍କ ଆସର ଜମିବ। ଆସନ୍ତା ୪ରୁ ଏଠାରେ ସିନିୟର ମହିଳା ଟି୨୦ ଚ୍ୟାଲେଞ୍ଜର ଟ୍ରଫି ଖେଳାଯିବ। ଯେଉଁଥିରେ ଭାରତୀୟ ମହିଳା କ୍ରିକେଟ୍ ଦଳର ଅନେକ ନାମିଦାମୀ ଖେଳାଳି ଭାଗ ନେବେ। ହରମନପ୍ରୀତ କୌର, ତାନିୟା ଭାଟିଆ, ପ୍ରିୟା ପୁନିଆ, ସ୍ମୃତି ମନ୍ଧନା, ଜେମିମା ରୋଡ୍ରିଗ୍ବେଜ, ଶିଖା ପାଣ୍ଡେ, ଭେଦା କ୍ରୀଷ୍ଣାମୁର୍ତ୍ତିଙ୍କ ପରି ଖେଳାଳି ଏଠାରେ ମୁକାବିଲାକୁ ଓହ୍ଲାଇବେ।
ପ୍ରତିଯୋଗିତାରେ ଇଣ୍ଡିଆ-ଏ, ଇଣ୍ଡିଆ-ବି ଓ ଇଣ୍ଡିଆ-ସି ନାମରେ ୩ଟି ଦଳ ରହିଛି। ଅଲରାଉଣ୍ଡର ହରମନପ୍ରୀତ ଇଣ୍ଡିଆ-ଏ ଦଳର ଅଧିନାୟିକା ଥିବା ବେଳେ ସ୍ମୃତି ଇଣ୍ଡିଆ-ବି ଦଳର ଓ କ୍ରୀଷ୍ଣାମୃତ୍ତି ଇଣ୍ଡିଆ-ସି ଦଳର ନେତୃତ୍ୱ ନେବେ। ୪ରୁ ୯ ତାରିଖ ପର୍ଯ୍ୟନ୍ତ ପ୍ରତ୍ୟେକ ଦଳ ପରସ୍ପର ବିପକ୍ଷରେ ୪ଟି ଲେଖାଏ ମ୍ୟାଚ୍ ଖେଳିବେ। ୧୧ରେ ଫାଇନାଲ ମୁକାବିଲା ହେବ। ୨ ତାରିଖରେ ସମସ୍ତ ଖେଳାଳି ବାରବାଟୀରେ ପହଞ୍ଚିବେ ବୋଲି ଜଣାପଡ଼ିଛି। ଅନ୍ୟପକ୍ଷରେ ଏହି ପ୍ରତିଯୋଗିତା ନିମନ୍ତେ ବିସିସିଆଇ ଦ୍ୱାରା ଘୋଷିତ ଦଳରେ ଦୁଇ ଓଡ଼ିଆ ଖେଳାଳି ସ୍ଥାନ ପାଇଛନ୍ତି। ଏମାନେ ହେଲେ ସୁଶ୍ରୀ ଦିବ୍ୟଦର୍ଶିନୀ ଓ ମାଧୁରୀ ମେହେତା। ସୁଶ୍ରୀ ଇଣ୍ଡିଆ-ବି ପକ୍ଷରୁ ଓ ମାଧୁରୀ ଇଣ୍ଡିଆ-ସି ପକ୍ଷରୁ ପ୍ରତିନିଧିତ୍ୱ କରିବେ।
ଇଣ୍ଡିଆ-ଏ ଦଳ: ହରମନପ୍ରୀତ କୌର(ଅଧିନାୟିକା), ତାନିୟା ଭାଟିଆ(ଉଇକେଟ କିପର), ଜେସିଆ ଅଖତାର(ଉଇକେଟ କିପର), ପ୍ରିୟା ପୁନିଆ, ଦୀପ୍ତି ଶର୍ମା, ଦେବିକା ବୈଦ୍ୟ, ସ୍ନେହ ରାଣା, ମାନସୀ ଯୋଶୀ, ମେଘନା ସିଂ, ଜେ କୋମଲ, ମିନୁ ମାନି, ରାଧା ଯାଦବ, ଭାରତ ଫୁଲମଲି।
ଇଣ୍ଡିଆ-ବି ଦଳ: ସ୍ମୃତି ମନ୍ଧନା(ଅଧିନାୟିକା), ସୁଷମା ବର୍ମା(ଉଇକେଟ କିପର), ଆର୍ କଳ୍ପନା(ଉଇକେଟ କିପର), ଭି.ଆର. ଭନିଥା, ଜେମିମା ରୋଡ୍ରିଗ୍ବେଜ, ଅନୁଜା ପାଟିଲ, ପୁନମ ଯାଦବ, ପୂଜା ଭସ୍ତ୍ରକାର, ଶିଖା ପାଣ୍ଡେ, ରେଣୁକା ସିଂ, ଅଞ୍ଜଳି ଶ୍ରାବଣୀ, ସୁଶ୍ରୀ ଦିବ୍ୟଦର୍ଶିନୀ, ଟି.ପି. କନୱାର, ରିଚା ଘୋଷ।
ଇଣ୍ଡିଆ-ସି ଦଳ: ଭେଦ କ୍ରୀଷ୍ଣାମୃତ୍ତି(ଅଧିନାୟିକା), ନୁଜହତ ପରୱିନ(ଉଇକେଟ କିପର), ଶେଫାଳି ବର୍ମା(ଉଇକେଟ କିପର), ୟସ୍ତିକା ଭାଟିଆ, ଡି. ହେମଲତା, ହରଲିନ ଦେଓଲ, ମନାଲୀ ଦକ୍ଷିଣୀ, ଜିନସି ଜର୍ଜ, ଅରୁନ୍ଧତୀ ରେଡ୍ଡୀ, ମୋନିକା ପଟେଲ, ଭୃଷାଳି ଭଗତ, ରାଜେଶ୍ୱରୀ ଗାଏକ୍ବାଡ଼, ତନୁଶ୍ରୀ ସରକାର, ମାଧୁରୀ ମେହେତା।
ଘରୋଇ ପରିବେଶରେ ଭଲ ଖେଳିବି- ସୁଶ୍ରୀ
ଡାହାଣହାତୀ ଅଫ୍ସ୍ପିନର ଓ ବ୍ୟାଟ୍ସଓମ୍ୟାନ ସୁଶ୍ରୀ ଇଣ୍ଡିଆ-ବି ଦଳରେ ସ୍ଥାନ ପାଇଛନ୍ତି। ଏହି ଦଳର ନେତୃତ୍ୱ ନେବେ ଭାରତୀୟ ଦଳର ଓପନର ସ୍ମୃତି ମନ୍ଧନା। ଘରୋଇ ପରିବେଶରେ ଭଲ ପ୍ରଦର୍ଶନ କରିବା ସହଜ ହେବ ବୋଲି ସୁଶ୍ରୀ ନିଜ ପ୍ରତିକ୍ରିୟାରେ କହିଛନ୍ତି। ଏହାଛଡ଼ା ସ୍ମୃତିଙ୍କ ସହ ପୂର୍ବରୁ କେମେଷ୍ଟ୍ରି ଭଲ ରହିଛି। ମୋ ବୟସ ବର୍ଗର ବିଭିନ୍ନ ମ୍ୟାଚ୍ ତାଙ୍କ ଖେଳିଛି। ଏଣୁ ଏହି ଦଳରେ ଏକ ପାରିବାରିକ ଅନୁଭୂତି ଭିତରେ ରହିବାର ସୁବିଧା ମିଳିବ ବୋଲି ସେ କହିଥିଲେ। ଭୁବେନଶ୍ୱରର ନୟାପଲ୍ଲୀରେ ଜନ୍ମିତ ସୁଶ୍ରୀ ରାଜ୍ୟ ଦଳର ଜଣେ ପ୍ରମୁଖ ଖେଳାଳି। ପୂର୍ବରୁ ମଧ୍ୟ ସେ ବିଭିନ୍ନ ବୟସବର୍ଗର ଟୁର୍ନାମେଣ୍ଟରେ ଭାରତୀୟ-ଏ ଦଳରୁ ପ୍ରତିନିଧିତ୍ୱ କରିଛନ୍ତି।
ଦଳଗତ ପ୍ରଦର୍ଶନ ଭଲ ରହିବ- ମାଧୁରୀ
ଅଭ୍ୟାସ ଜୋରଦାର ଚାଲିଛି। କିଛିଦିନ ହେବ ଫିଟନେସ୍ ଉପରେ ବିଶେଷ ଧ୍ୟାନ ଦେଉଛି ବୋଲି ଇଣ୍ଡିଆ-ସି ଦଳରେ ସ୍ଥାନ ପାଇଥିବା ରାଜ୍ୟର ପ୍ରତିଭାବାନ ମହିଳା କ୍ରିକେଟ୍ ଖେଳାଳି ମାଧୁରୀ ମେହେତା କହିଛନ୍ତି। ବଲାଙ୍ଗୀରରେ ଜନ୍ମିତ ଡାହାଣହାତୀ ବ୍ୟାଟ୍ସଓମ୍ୟାନ ମାଧୁରୀ ପୂର୍ବରୁ ଭାରତ ପକ୍ଷରୁ ୨ଟି ଲେଖାଏ ଟି୨୦ ଓ ଏକଦିବସୀୟ ମ୍ୟାଚ୍ ଖେଳି ସାରିଛନ୍ତି। ମାଧୁରୀ କହିଛନ୍ତି ଯେ, କ୍ରୀଷ୍ଣାମୃତ୍ତିଙ୍କ ନେତୃତ୍ୱରେ ଘୋଷିତ ହୋଇଥିବା ଦଳ ବହୁତ ଭଲ ଅଛି। ଦଳଗତ ପ୍ରଦର୍ଶନ ଆମର ଭଲ ରହିବ। ଆମେ ଜିତିବାକୁ ଚେଷ୍ଟା କରିବୁ।
